ഭൂമിയുടെ ഭ്രമണപഥം നിരീക്ഷിക്കാൻ പുതിയ പേടകങ്ങളുമായി അമേരിക്കൻ കമ്പനി

ബഹിരാകാശത്ത് മറ്റ് ഉപഗ്രഹങ്ങളുടെ പ്രവർത്തനങ്ങൾ സൂക്ഷ്മമായി നിരീക്ഷിക്കുന്നതിനായി അമേരിക്കൻ കമ്പനി പുതിയ പേടക ശ്രേണി വികസിപ്പിച്ചു. സാൻ ഫ്രാൻസിസ്കോ ആസ്ഥാനമായി പ്രവർത്തിക്കുന്ന ആസ്ട്രാനിസ് എന്ന കമ്പനിയാണ് ‘പെർസെപ്റ്റർ’ എന്ന പേരിൽ ഈ പുതിയ സംവിധാനം അവതരിപ്പിച്ചിരിക്കുന്നത്.

ജിയോസ്റ്റേഷനറി ഓർബിറ്റിലുള്ള ഉപഗ്രഹങ്ങളെയും അവയുടെ ചുറ്റുപാടുകളെയും കൃത്യമായി നിരീക്ഷിക്കുക എന്നതാണ് ഈ പുതിയ ബഹിരാകാശ പേടകങ്ങളുടെ പ്രധാന ലക്ഷ്യം. ഭൂമിയിൽ നിന്ന് ഏകദേശം 35,786 കിലോമീറ്റർ ഉയരത്തിലാണ് ജിയോസ്റ്റേഷനറി ഭ്രമണപഥം സ്ഥിതി ചെയ്യുന്നത്.

ഈ പ്രത്യേക ഉയരത്തിൽ ഉപഗ്രഹങ്ങളുടെ ഭ്രമണ വേഗവും ഭൂമിയുടെ വേഗവും ഒരേപോലെ വരുന്നതിനാൽ, ഭൂമിയിൽ നിന്ന് നോക്കുമ്പോൾ ഉപഗ്രഹം ഒരേ പ്രദേശത്തിന് മുകളിൽ സ്ഥിരമായി നിൽക്കുന്നതായി തോന്നും. ആശയവിനിമയം, കാലാവസ്ഥാ നിരീക്ഷണം, രഹസ്യാന്വേഷണം തുടങ്ങിയ അതിപ്രധാന ആവശ്യങ്ങൾക്കായി ഈ ഭ്രമണപഥം വ്യാപകമായി ഉപയോഗിക്കുന്നുണ്ട്.

ആഗോളതലത്തിൽ ബഹിരാകാശ ശക്തികൾ പരസ്പരം നിരീക്ഷണം ശക്തമാക്കുന്ന സാഹചര്യത്തിൽ ഈ മേഖല കൂടുതൽ തന്ത്രപ്രധാനമായി മാറിയിരിക്കുകയാണ്. നിലവിൽ ജിയോ ഭ്രമണപഥത്തിൽ ആസ്ട്രാനിസിന്‍റെ അഞ്ച് ഉപഗ്രഹങ്ങൾ പ്രവർത്തിക്കുന്നുണ്ട്.

അമേരിക്കൻ സൈന്യത്തിന് ആവശ്യമായ പിന്തുണ നൽകുക, വിദൂര പ്രദേശങ്ങളിൽ കണക്റ്റിവിറ്റി ഉറപ്പാക്കുക, ജിപിഎസ് പോലുള്ള നിർണായക സേവനങ്ങൾ ലഭ്യമാക്കുക എന്നിവയാണ് ഇവയുടെ ചുമതലകൾ. ഈ മേഖലയിലെ മുൻകാല അനുഭവങ്ങൾ പൂർണ്ണമായും ഉപയോഗപ്പെടുത്തിയാണ് പുതിയ ‘പെർസെപ്റ്റർ’ പേടകങ്ങൾ രൂപകൽപ്പന ചെയ്തിരിക്കുന്നത്.

അമേരിക്കൻ സർക്കാരിനും മറ്റ് ഉപഭോക്താക്കൾക്കും ജിയോ ഭ്രമണപഥത്തിലെ സംഭവവികാസങ്ങളെക്കുറിച്ച് കൂടുതൽ വ്യക്തത നൽകാൻ ഇതിലൂടെ സാധിക്കും. വലിപ്പത്തിൽ ചെറുതാണെങ്കിലും അത്യാധുനിക സംവിധാനങ്ങളാണ് ഇവയിലുള്ളത്.

കമ്പനിയുടെ ‘മൈക്രോജിയോ’ ഉപഗ്രഹ പ്ലാറ്റ്‌ഫോമിനെ അടിസ്ഥാനമാക്കിയാണ് പെർസെപ്റ്റർ നിർമിക്കുന്നത്. സാധാരണ ജിയോ ഉപഗ്രഹങ്ങളെ അപേക്ഷിച്ച് ഇവയ്ക്ക് വലിപ്പം വളരെ കുറവായിരിക്കും.

മറ്റ് ബഹിരാകാശ പേടകങ്ങളുടെ ശേഷി വിലയിരുത്താനും പ്രശ്നങ്ങൾ കണ്ടെത്താനും വിവിധ സെൻസറുകൾ ഇവയിൽ ഘടിപ്പിച്ചിട്ടുണ്ട്. സഖ്യരാജ്യങ്ങളുടെ ഉപഗ്രഹങ്ങൾക്ക് എന്തെങ്കിലും തകരാറുണ്ടായാൽ പെട്ടെന്ന് തിരിച്ചറിയാനും ഈ സംവിധാനം സഹായിക്കുമെന്ന് കമ്പനി വ്യക്തമാക്കിയിട്ടുണ്ട്.

ഉയർന്ന ചലനശേഷിയാണ് പെർസെപ്റ്റർ പേടകങ്ങളുടെ മറ്റൊരു പ്രധാന പ്രത്യേകത. വൈദ്യുത പ്രൊപ്പൽഷൻ സംവിധാനത്തിന്റെ സഹായത്തോടെ ജിയോസ്റ്റേഷനറി ഭ്രമണപഥത്തിന്റെ വലിയൊരു ഭാഗത്ത് സഞ്ചരിക്കാൻ ഇവയ്ക്ക് സാധിക്കും.

ഒരു ദൗത്യകാലയളവിൽ നിരവധി തവണ സ്ഥാനം മാറ്റാനും വിവിധ ഉപഗ്രഹങ്ങളെ അടുത്തേക്ക് ചെന്ന് നിരീക്ഷിക്കാനും ഈ പേടകങ്ങൾക്ക് കഴിയുമെന്ന് കമ്പനി അവകാശപ്പെടുന്നു. ഇത്തരം ശക്തമായ നിരീക്ഷണ സംവിധാനങ്ങളുടെ ആവശ്യകത നിലവിൽ വർധിച്ചുവരികയാണെന്ന് കമ്പനി ചൂണ്ടിക്കാണിക്കുന്നു.

റഷ്യയുടെയും ചൈനയുടെയും ഉപഗ്രഹങ്ങളുടെ സമീപകാല നീക്കങ്ങൾ ഇതിന് ഉദാഹരണമാണ്. 2020ൽ രണ്ട് റഷ്യൻ ബഹിരാകാശ പേടകങ്ങൾ ഒരു അമേരിക്കൻ രഹസ്യാന്വേഷണ ഉപഗ്രഹത്തിന്റെ 160 കിലോമീറ്റർ പരിധിക്കുള്ളിൽ എത്തിയത് ഏറെ ആശങ്ക സൃഷ്ടിച്ചിരുന്നു.

അതുപോലെ 2023ലും ചൈനയുടെ ടി ജെ എസ്-3 ജിയോ ഉപഗ്രഹം അമേരിക്കൻ രഹസ്യാന്വേഷണ ഉപഗ്രഹങ്ങളെ അടുത്തുനിന്ന് നിരീക്ഷിച്ചതായി വിദഗ്ധർ റിപ്പോർട്ട് ചെയ്തിരുന്നു. പെർസെപ്റ്റർ പേടകങ്ങളുടെ ആദ്യ ദൗത്യം എപ്പോഴായിരിക്കുമെന്ന കാര്യത്തിൽ ആസ്ട്രാനിസ് ഇതുവരെ ഔദ്യോഗികമായി തീയതി പ്രഖ്യാപിച്ചിട്ടില്ല.

എങ്കിലും ഭാവിയിൽ ബഹിരാകാശ സുരക്ഷ ഉറപ്പാക്കുന്നതിലും കൃത്രിമ ഉപഗ്രഹങ്ങളുടെ സംരക്ഷണത്തിലും ഇത്തരം പേടകങ്ങൾ നിർണായക പങ്കുവഹിക്കുമെന്നാണ് വിലയിരുത്തപ്പെടുന്നത്.