കൊച്ചൗസേപ്പ് ചിറ്റിലപ്പിള്ളിയുടെ വിജയക്കുതിപ്പ്; ഓഹരി വിപണിയിൽ പുതിയ ചരിത്രമെഴുതാൻ വീഗാലാൻഡ് ഡവലപ്പേഴ്സ്

‘ദ് നെയിം യു ക്യാന്‍ ട്രസ്റ്റ്’ എന്ന ബ്രാൻഡ് വാക്യവുമായി സംരംഭലോകത്തേക്ക് കാലെടുത്തുവെച്ച കൊച്ചൗസേപ്പ് ചിറ്റിലപ്പിള്ളിയുടെ ആത്മവിശ്വാസം എന്നും അടിയുറച്ചതായിരുന്നു. വി-ഗാർഡും വണ്ടർലയും വീഗാലാൻഡ് ഡവലപ്പേഴ്സും നൽകിയ വിജയങ്ങൾ ആ വിശ്വാസത്തെ പൂർണ്ണമായും ശരിവെക്കുന്നതായിരുന്നു.

ഇപ്പോഴിതാ വി-ഗാർഡ് ഇൻഡസ്ട്രീസിനും വണ്ടർലയ്ക്കും പിന്നാലെ വീഗാലാൻഡ് ഡവലപ്പേഴ്സും പ്രാരംഭ ഓഹരി വിൽപനയിലൂടെ (ഐപിഒ) ഓഹരി വിപണിയിലേക്ക് പ്രവേശിക്കുമ്പോൾ അത് അദ്ദേഹത്തിന്റെ സംരംഭക ജീവിതത്തിലെ തിളക്കമാർന്ന മറ്റൊരു നാഴികക്കല്ലായി മാറുകയാണ്. വി-ഗാർഡ് കുടുംബത്തിൽ നിന്നെത്തുന്ന മൂന്നാമത്തെ ഐപിഒ ആണിത്.

ഒപ്പം കേരളത്തിൽ നിന്ന് ഓഹരി വിപണിയിൽ പ്രവേശിക്കുന്ന ആദ്യ റിയൽ എസ്റ്റേറ്റ് കമ്പനിയെന്ന വലിയ നേട്ടവും ഇതിലൂടെ വീഗാലാൻഡ് ഡവലപ്പേഴ്സ് സ്വന്തമാക്കുന്നു. അഞ്ച് പതിറ്റാണ്ടിലേറെ നീളുന്ന തന്റെ ബിസിനസ്സ് പാരമ്പര്യം വിശ്വാസ്യതയിലും വ്യതിരിക്തതയിലും മാത്രം പടുത്തുയർത്തിയ പ്രതിഭയാണ് കൊച്ചൗസേപ്പ് ചിറ്റിലപ്പിള്ളി.

വൈദ്യുതി വ്യതിയാനങ്ങളിൽ നിന്ന് ഗൃഹോപകരണങ്ങളെ സംരക്ഷിക്കാൻ ‘ഞങ്ങൾ രക്ഷിക്കാം’ എന്ന ഉറപ്പുമായി തുടങ്ങിയ വി-ഗാർഡ് പിന്നീട് വൻ വിജയമായി മാറി. കേരളത്തിന് അപരിചിതമായിരുന്ന അമ്യൂസ്‌മെന്റ് പാർക്ക് എന്ന ആശയവുമായി 1997-ൽ നിർമ്മാണം തുടങ്ങി 2000-ത്തിൽ വീഗാലാൻഡ് അമ്യൂസ്‌മെന്റ് പാർക്ക് പ്രവർത്തനസജ്ജമായതോടെയാണ് അദ്ദേഹം മറ്റൊരു മേഖലയിൽ കൂടി തന്റെ മികവ് തെളിയിക്കുന്നത്.

പിന്നീട് ഈ അമ്യൂസ്‌മെന്റ് പാർക്കുകൾ വണ്ടർലയായി വളർന്നു. കൃത്യമായ പ്ലാനിങ്ങും സുരക്ഷയും ഉറപ്പാക്കിക്കൊണ്ട് 62,500 സ്ക്വയർ മീറ്റർ (6,72,744 സ്ക്വയർ ഫീറ്റ്) വിസ്തൃതിയിലുള്ള ബൃഹത്തായ നിർമ്മാണ പ്രവർത്തനങ്ങളാണ് ഇതിലൂടെ പൂർത്തിയാക്കിയത്.

തന്റെ അറുപതാം വയസ്സിൽ ബിസിനസ്സിന്റെ ചുക്കാൻ അടുത്ത തലമുറയ്ക്ക് കൈമാറിയ അദ്ദേഹം, നിർമ്മാണ രംഗത്തെ അനുഭവസമ്പത്ത് മലയാളിക്ക് പ്രയോജനപ്പെടുത്തുക എന്ന ലക്ഷ്യത്തോടെ 2011-ൽ റിയൽ എസ്റ്റേറ്റ് രംഗത്തേക്ക് കടന്നുവന്നു. അമ്യൂസ്‌മെന്റ് പാർക്കുകളുടെ പേര് വണ്ടർല എന്നാക്കിയെങ്കിലും, ജനമനസ്സുകളിൽ മായാതെ നിന്ന വീഗാലാൻഡ് എന്ന പേരിൽ തന്നെ അദ്ദേഹം റിയൽ എസ്റ്റേറ്റ് കമ്പനിയും ആരംഭിച്ചു.

പുതിയ നാഴികക്കല്ലും തലപ്പത്തെ പ്രമുഖരും
കേരളത്തിൽ നിന്ന് ഓഹരി വിപണിയിൽ ലിസ്റ്റ് ചെയ്യപ്പെടുന്ന ആദ്യ റിയൽ എസ്റ്റേറ്റ് സ്ഥാപനമായി വീഗാലാൻഡ് ഡവലപ്പേഴ്സ് മാറുന്നു എന്നത് ചരിത്രപരമായ നേട്ടമാണ്. കമ്പനി പ്രവർത്തനം ആരംഭിച്ചതിന്റെ പതിനഞ്ചാം വർഷത്തിലാണ് ഈ അപൂർവ്വ നേട്ടം കൈവരിക്കുന്നത്.

കൂടാതെ കേരളത്തിൽ നിന്ന് മൂന്ന് കമ്പനികൾ ഓഹരി വിപണിയിൽ എത്തിച്ച ഒരേയൊരു വ്യവസായി എന്ന റെക്കോർഡും ഇതിലൂടെ കൊച്ചൗസേപ്പ് ചിറ്റിലപ്പിള്ളി സ്വന്തമാക്കി. ബാങ്കിംഗ് രംഗത്ത് നാല് പതിറ്റാണ്ടിന്റെ പരിചയസമ്പത്തുള്ള സിൻഡിക്കേറ്റ് ബാങ്കിന്റെ മുൻ മാനേജിംഗ് ചെയർമാനും ഡയറക്ടറുമായിരുന്ന ജോർജ് ജോസഫ് ആണ് വീഗാലാൻഡ് ഡവലപ്പേഴ്സ് ലിമിറ്റഡിന്റെ ചെയർമാനും സ്വതന്ത്ര ഡയറക്ടറുമായി ചുമതലയേറ്റിരിക്കുന്നത്.

കൂടാതെ സാമ്പത്തിക വിദഗ്ധരായ സരളാദേവിയും ഡോ. വിജയകുമാറും സ്വതന്ത്ര ഡയറക്ടർമാരായി കമ്പനിയെ നയിക്കുന്നു.

വളർച്ചയുടെ വഴികൾ
എറണാകുളത്തെ വാഴക്കാലയിൽ ‘വീഗാലാൻഡ് ഗ്രീൻ ക്ലൗഡ്സ്’ എന്ന പദ്ധതിയിലൂടെയാണ് കമ്പനി റിയൽ എസ്റ്റേറ്റ് രംഗത്ത് സ്കൈവില്ലാമെന്റ് ആശയം നടപ്പിലാക്കിയത്. ഇതുവരെ പത്ത് പ്രോജക്ടുകൾ വിജയകരമായി പൂർത്തിയാക്കി കൈമാറിയ കമ്പനി, കേരളത്തിലെ വിവിധ നഗരങ്ങളിലായി പന്ത്രണ്ടോളം പദ്ധതികളുടെ നിർമ്മാണ പ്രവർത്തനങ്ങളും ഇപ്പോൾ നടത്തിവരുന്നു.

റെറ നിയമം വരുന്നതിന് മുൻപ് തന്നെ ആ നിലവാരത്തിലുള്ള സുരക്ഷയും നിയമപാലനങ്ങളും നടപ്പിലാക്കാൻ വീഗാലാൻഡിന് സാധിച്ചിരുന്നു. പ്രകൃതിയെ സംരക്ഷിച്ചുകൊണ്ടുള്ള ‘ബയോഫിലിിക് ലിവിങ്’ എന്ന ആശയമാണ് കമ്പനി തങ്ങളുടെ എല്ലാ പദ്ധതികളിലും മുഖമുദ്രയാക്കിയിരിക്കുന്നത്.

സോളാർ പ്ലാന്റുകൾ, ഇവി ചാർജിംഗ് പോയിന്റുകൾ എന്നിവയിലൂടെ ഊർജ്ജ സംരക്ഷണത്തിനും വീഗാലാൻഡ് വലിയ പ്രാധാന്യം നൽകുന്നുണ്ട്. സ്വകാര്യതയ്ക്കും ആഡംബരത്തിനും പ്രാധാന്യം നൽകിക്കൊണ്ട് ഇടപ്പള്ളിയിൽ ‘വീഗാലാൻഡ് ഫ്ലോറ’യും തിരുവനന്തപുരത്ത് ‘വീഗാലാൻഡ് ലൂവിയ ഗാർഡൻ’ തുടങ്ങിയ പ്രീമിയം പ്രോജക്റ്റുകളും കമ്പനി ഇതിനോടകം ആരംഭിച്ചിട്ടുണ്ട്.

നിരവധി പുരസ്കാരങ്ങളും അംഗീകാരങ്ങളും വീഗാലാൻഡ് ഡവലപ്പേഴ്സിനെ തേടിയെത്തിയിട്ടുണ്ട്. നാഷണൽ സേഫ്റ്റി കൗൺസിലിന്റെ സുരക്ഷാ പുരസ്കാരങ്ങൾ തുടർച്ചയായി സ്വന്തമാക്കിയ അപൂർവ്വ നേട്ടവും കമ്പനിക്കുണ്ട്.

കൊച്ചിയിലും കോഴിക്കോടുമായി കൂടുതൽ നൂതന പദ്ധതികൾ ആസൂത്രണം ചെയ്ത് വളർച്ചയുടെ അടുത്ത ഘട്ടത്തിലേക്ക് ചുവടുവെക്കാൻ ഒരുങ്ങുകയാണ് വീഗാലാൻഡ് ഡവലപ്പേഴ്സ്.