കഴിഞ്ഞ രണ്ട് പതിറ്റാണ്ടിലേറെയായി തൊഴിലിനും നീതിക്കും വേണ്ടി സർക്കാർ ഓഫീസുകൾ കയറിയിറങ്ങുന്ന ഭിന്നശേഷിക്കാരിയായ യുവതിക്ക് അധികൃതരുടെ അവഗണനയിൽ ദുരിതമനുഭവിക്കേണ്ടി വരുന്നു. കാവശ്ശേരി കൊങ്ങാളക്കോട് ചെമ്പകശ്ശേരിയിൽ ജ്യോതി (49) ആണ് നീതി തേടി വീണ്ടും സമരമുഖത്തേക്ക് ഇറങ്ങുന്നത്.
2013-ൽ അന്നത്തെ മുഖ്യമന്ത്രി ഉമ്മൻചാണ്ടിയുടെ ഇടപെടലിനെത്തുടർന്ന് കേരള സ്റ്റേറ്റ് കൺസ്യൂമർ ഫെഡറേഷന്റെ കുഴൽമന്ദം ത്രിവേണി ഗോഡൗണിൽ സെയിൽസ് ഹെൽപർ തസ്തികയിൽ ഇവർക്ക് താൽക്കാലിക നിയമനം ലഭിച്ചിരുന്നു. ആറു മാസത്തെ കാലാവധി നിശ്ചയിച്ചിരുന്ന ഈ നിയമനം, പൂർത്തിയാകുന്നതിന് മുൻപേ റദ്ദാക്കുകയായിരുന്നു.
“ഭിന്നശേഷി സംഘടനാ പ്രവർത്തനങ്ങളിൽ നിന്ന് വിട്ടുനിൽക്കണമെന്ന നിർദേശം അംഗീകരിക്കാത്തതിനെ തുടർന്ന് കാലാവധി പൂർത്തിയാകും മുൻപേ പിരിച്ചുവിടുകയായിരുന്നു”വെന്ന് ജ്യോതി വ്യക്തമാക്കി. ജീവിതസാഹചര്യങ്ങൾ അതീവ ദുഷ്കരമാണ്.
35 വർഷം മുൻപ് പിതാവ് മരിച്ചതിനെത്തുടർന്ന്, കൂലിപ്പണി ചെയ്ത് കുടുംബത്തെ പോറ്റിയിരുന്ന മാതാവും വിടവാങ്ങിയതോടെ ജ്യോതി ഒറ്റപ്പെട്ടു. ഇതിനുപിന്നാലെ വിവാഹബന്ധം വേർപിരിഞ്ഞതും ഇവരുടെ ജീവിതത്തെ കൂടുതൽ പ്രതിസന്ധിയിലാക്കി.
പത്താം ക്ലാസ് വിദ്യാഭ്യാസ യോഗ്യതയുള്ള ജ്യോതി എംപ്ലോയ്മെന്റ് എക്സ്ചേഞ്ചിൽ റജിസ്റ്റർ ചെയ്ത ശേഷമാണ് മുൻപ് താൽക്കാലിക നിയമനം നേടിയത്. തൊഴിൽ നഷ്ടപ്പെട്ടതിനെത്തുടർന്ന് സെക്രട്ടേറിയറ്റിനു മുന്നിൽ പലതവണ പ്രതിഷേധങ്ങൾ നടത്തിയിട്ടും അധികൃതരുടെ ഭാഗത്തുനിന്ന് അനുകൂല നടപടികളുണ്ടായില്ല.
നിലവിൽ ലഭിക്കുന്ന തുച്ഛമായ പെൻഷൻ തുകയിലാണ് ജീവിതം മുന്നോട്ടുപോകുന്നത്. പഞ്ചായത്തും സന്നദ്ധ സംഘടനയും ചേർന്ന് നൽകിയ നാല് സെന്റ് സ്ഥലത്തെ ചെറിയ വീട്ടിലാണ് താമസം.
സർക്കാർ വിഷയത്തിൽ നീതിപൂർവ്വമായ ഇടപെടൽ നടത്തില്ലെന്ന ബോധ്യത്തോടെ, ഈ മാസം 25 മുതൽ സെക്രട്ടേറിയറ്റിനു മുന്നിൽ അനിശ്ചിതകാല ഉപവാസം ആരംഭിക്കാനാണ് ജ്യോതിയുടെ തീരുമാനം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
