നരിക്കുനിയിൽ ദാരുണ സംഭവം: ഓൺലൈൻ ട്രേഡിങ് സ്ഥാപന ഉടമ തീകൊളുത്തി ജീവനൊടുക്കി; മകൾക്ക് പൊള്ളലേറ്റു

നരിക്കുനിയിൽ ഓൺലൈൻ ട്രേഡിങ് സ്ഥാപനത്തിനുള്ളിൽ ഉടമ തീകൊളുത്തി ജീവനൊടുക്കി. കുരുവട്ടൂർ കാരാട്ടുതാഴം നടുവിലക്കണ്ടി വി.ടി.

വിനീഷ് കുമാർ (48) ആണ് മരിച്ചത്. സംഭവത്തിൽ ഇദ്ദേഹത്തിന്റെ ഒൻപത് വയസ്സുള്ള മകൾ അമേഘയ്ക്ക് ഗുരുതരമായി പൊള്ളലേറ്റു.

കുട്ടി നിലവിൽ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലാണ്. കൊടുവള്ളി റോഡിലെ സ്വകാര്യ കെട്ടിടത്തിന്റെ ഒന്നാം നിലയിൽ പ്രവർത്തിക്കുന്ന ‘വി.ജെ.

ട്രേഡേഴ്സ്’ എന്ന സ്ഥാപനത്തിന്റെ ഉടമയാണ് മരിച്ച വിനീഷ് കുമാർ. മകളെയും കൂട്ടി സ്ഥാപനത്തിലെത്തിയ വിനീഷ്, ഷട്ടർ താഴ്ത്തി അകത്തു കയറിയ ശേഷം തീനാളം പടർത്തുകയായിരുന്നു.

തിന്നർ പോലുള്ള ജ്വലനശേഷിയുള്ള ദ്രാവകം ഉപയോഗിച്ചാണ് ഇദ്ദേഹം കൃത്യം നിർവഹിച്ചതെന്ന് പ്രാഥമിക അന്വേഷണത്തിൽ വ്യക്തമായതായി പൊലീസ് അറിയിച്ചു. സംഭവസമയത്ത് മകളെ ചേർത്തുപിടിച്ചാണ് വിനീഷ് തീയിട്ടത്.

എന്നാൽ, പിതാവിന്റെ പിടിയിൽ നിന്ന് കുതറിമാറി മുറിയുടെ ഒരു വശത്തേക്ക് മാറിനിന്നതിനാൽ വൻ ദുരന്തത്തിൽനിന്ന് കുട്ടി അത്ഭുതകരമായി രക്ഷപ്പെട്ടു. മുറിക്കുള്ളിൽ നിന്നുണ്ടായ ഉഗ്രശബ്ദം കേട്ട് ഓടിയെത്തിയ നാട്ടുകാരാണ് അഗ്നിരക്ഷാ സേനയെ വിവരം അറിയിച്ചത്.

അഗ്നിരക്ഷാ സേന ഉടൻ സ്ഥലത്തെത്തി ഷട്ടർ ഉയർത്തി അകത്തു കടന്നപ്പോഴാണ് പൊള്ളലേറ്റ നിലയിൽ കുട്ടിയെ കണ്ടെത്തിയത്. കുട്ടിയെ ഉടൻ പുറത്തെത്തിച്ചെങ്കിലും അപ്പോഴേക്കും വിനീഷ് കുമാർ മരണപ്പെട്ടിരുന്നു.

മുറിക്കുള്ളിൽ നിന്ന് ആത്മഹത്യക്കുറിപ്പ് കണ്ടെടുത്തതായി കൊടുവള്ളി പൊലീസ് അറിയിച്ചു. ഫൊറൻസിക് സംഘം സ്ഥലത്തെത്തി പരിശോധനകൾ പൂർത്തിയാക്കി.

പറമ്പിൽക്കടവ് ചൂലങ്ങോട്ട് എ.വി. വിജയന്റെയും രമണിയുടെയും മകനാണ് വിനീഷ് കുമാർ.

ഭാര്യ: ജിഷ. മകൻ: അഭിനവ്.

സഹോദരങ്ങൾ: വിനോദ് കുമാർ, സിന്ധു. നരിക്കുനി ഗവ.

ആശുപത്രിയിൽ പ്രാഥമിക ചികിത്സ നൽകിയ ശേഷം മെഡിക്കൽ കോളജ് ആശുപത്രിയിലേക്ക് മാറ്റിയ അമേഘയുടെ ആരോഗ്യനില നിലവിൽ അപകടനില തരണം ചെയ്തതായി അധികൃതർ വ്യക്തമാക്കി.