എറണാകുളം ജില്ലയിലെ കിഴക്കമ്പലം പരിധിയിൽ സ്കൂട്ടർ അപകടത്തിൽ പരുക്കേറ്റ ഭാര്യ നൽകിയ പരാതിയുടെ അടിസ്ഥാനത്തിൽ ഭർത്താവിനെതിരെ പൊലീസ് കേസെടുത്തു. വെങ്ങോല അറയ്ക്കപ്പടി സ്വദേശിനിയായ വീട്ടമ്മ നൽകിയ സ്വകാര്യ അന്യായം പരിഗണിച്ചാണ് കുന്നത്തുനാട് പൊലീസ് നടപടി സ്വീകരിച്ചിരിക്കുന്നത്.
സംഭവം നടന്നത് കഴിഞ്ഞ ഏപ്രിൽ 16-ന് രാത്രി 9.30 ഓടെയാണ്. ചീനിക്കുഴി റബർ പാർക്ക് റോഡിലൂടെ ഭർത്താവിനൊപ്പം സ്കൂട്ടറിൽ യാത്ര ചെയ്യുകയായിരുന്ന പരാതിക്കാരി, എടിഎം കൗണ്ടറിന് സമീപമുള്ള വേഗത്തടയിൽ എത്തിയപ്പോൾ അപകടത്തിൽപ്പെടുകയായിരുന്നു.
ഭർത്താവ് വാഹനം അമിതവേഗതയിലും അതീവ അശ്രദ്ധമായും ഓടിച്ചതിനെത്തുടർന്ന് സ്കൂട്ടറിന്റെ നിയന്ത്രണം നഷ്ടപ്പെടുകയും താൻ റോഡിലേക്ക് തെറിച്ചു വീഴുകയുമായിരുന്നുവെന്ന് പരാതിയിൽ വ്യക്തമാക്കുന്നു. അപകടത്തിന്റെ ആഘാതത്തിൽ യുവതിയുടെ മുഖത്തും പുരികത്തിലും ഗുരുതരമായി പരുക്കേറ്റു.
സംഭവത്തിൽ നിജസ്ഥിതി ബോധ്യപ്പെട്ടതിനെത്തുടർന്ന് കോലഞ്ചേരി ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതി സ്വകാര്യ പരാതി ഫയലിൽ സ്വീകരിച്ചു. തുടർന്ന് വിശദമായ അന്വേഷണം നടത്തുന്നതിനായി കേസ് കുന്നത്തുനാട് പൊലീസിന് കൈമാറുകയായിരുന്നു.
കോടതി നിർദ്ദേശപ്രകാരം കേസ് റജിസ്റ്റർ ചെയ്ത് തുടർനടപടികൾ ആരംഭിച്ചതായി ഉദ്യോഗസ്ഥർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
