ദിലീപ് നായകനാകുന്ന ‘ഹെനോക്ക്’ സിനിമയുടെ ചിത്രീകരണം ആലപ്പുഴയില്‍ ആരംഭിച്ചു

ജനപ്രിയ നായകൻ ദിലീപ് നായകനാകുന്ന പുതിയ ചിത്രമായ ‘ഹെനോക്ക്’ സിനിമയുടെ ചിത്രീകരണം ആലപ്പുഴയില്‍ ആരംഭിച്ചു. ചിത്രത്തില്‍ ഒരു ഫോറന്‍സിക് സര്‍ജനായാണ് ദിലീപ് എത്തുന്നത്.

എം സ്റ്റാർ എൻ്റര്‍ടെയ്ന്‍‍മെന്‍റ്സ് ആണ് ചിത്രത്തിന്‍റെ നിര്‍മ്മാണം നിർവ്വഹിക്കുന്നത്. ആലപ്പുഴ കല്ലുപാലത്ത് തിരുവതാംകൂർ സഹോദരിമാരായ ലളിത- പത്മിനി- രാഗിണിമാരുടെ പുരാതനമായ തറവാട്ടിലായിരുന്നു ചിത്രീകരണത്തിന് തുടക്കം കുറിച്ചത്.

ദിലീപും മറ്റ് അഭിനേതാക്കളും അണിയറപ്രവർത്തകരും ചേർന്ന് ഭദ്രദീപം തെളിച്ചാണ് ചടങ്ങുകൾക്ക് തുടക്കമിട്ടത്. പ്രശസ്‌ത നിർമ്മാതാവ് ജോബി ജോർജ് ചടങ്ങിന്റെ സ്വിച്ചോൺ കർമ്മം നിർവ്വഹിച്ചു.

‘ദി മാന്‍ ഇന്‍ ദി മിസ്റ്റ്’ എന്ന ടാഗ്‌ലൈനോടെയാണ് ഈ ചിത്രം പ്രദർശനത്തിനെത്തുന്നത്. ഹെനോക് എന്ന ബൈബിൾ വാക്കിന്‍റെ അര്‍ഥം ദൈവത്തിനൊപ്പം സഞ്ചരിക്കുന്നവൻ എന്നാണ്.

ഈ ചിത്രത്തിലെ ഫോറൻസിക് സർജൻ ദൈവത്തിനൊപ്പം സഞ്ചരിക്കുമ്പോൾ എന്തെല്ലാം നീതിയാണ് ലഭിക്കുന്നത്? നിഗൂഢത നിറഞ്ഞ കഥാപശ്ചാത്തലവും ഉദ്വേഗം നിറഞ്ഞ അന്വേഷണവുമാണ് ചിത്രത്തെ മുന്നോട്ടു നയിക്കുന്നതെന്നാണ് ടൈറ്റിൽ സൂചിപ്പിക്കുന്നത്. തുടക്കം മുതൽ ഉദ്വേഗത്തിൻ്റെ മുൾമുനയിലൂടെ സഞ്ചരിക്കുന്ന ഒരു ചിത്രമാണിത്.

കഥയുടെ കെട്ടുറപ്പിലും പുതുമയിലും അവതരണ മികവിലും വേറിട്ട ഒരു ദൃശ്യാനുഭവം പ്രേക്ഷകർക്കു സമ്മാനിക്കുവാനുള്ള ശ്രമത്തിലാണ് സംവിധായകൻ ഉല്ലാസ് കൃഷ്‌ണ.

പുഷ്പകവിമാനമെന്ന ആദ്യ ചിത്രത്തിലൂടെ തൻ്റെ കൈയ്യൊപ്പ് പതിപ്പിച്ച സംവിധായകൻ ഈ ചിത്രത്തിലൂടെ വലിയൊരു കാൻവാസിലേക്കാണ് ചുവടുവെക്കുന്നത്. വലിയ താരനിരയുടെ അകമ്പടിയോടെയെത്തുന്ന ഈ ചിത്രത്തിന് భారీ മുതൽ മുടക്കാണുള്ളത്.

ആലപ്പുഴ, കുട്ടനാട്, പൂനെ എന്നിവിടങ്ങളിലായിട്ടാണ് ചിത്രീകരണം പുരോഗമിക്കുന്നത്. റോബിനും ഉല്ലാസ് കൃഷ്ണയും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.

ജോണി ആന്റണി, എമിൽ ജോർജ്, അർജുൻ രാധാകൃഷ്ണൻ, ഗ്രേസ് ആന്റണി, മനോജ് കെ യു, സുധി കോപ്പ, പ്രാർത്ഥന എസ്, ശ്രുതി ജയൻ, ഷാജു ശ്രീധർ, രഘുനാഥ് പലേരി, നിസ്താർ സേഠ്, പ്രമോദ് വെളിയനാട്, സോഹൻ സീനുലാൽ, വിനോദ് കെടാമംഗലം, ആശാ മഠത്തിൽ, ശ്രീകാന്ത് തുടങ്ങിയവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ഛായാഗ്രഹണം: ഷാജികുമാർ, എഡിറ്റിംഗ്: ഷഫീഖ് വി ബി, സംഗീതം: മുജീബ് മജീദ്, എക്സിക്യൂട്ടീവ് പ്രൊഡ്യൂസർ: എമിൽ ജോർജ്, പ്രൊഡക്ഷൻ കോഡിനേറ്റർ: നോബിൾ ജേക്കബ്, പ്രൊഡക്ഷൻ ഡിസൈനർ: സുനിൽ ദാസ്, മേക്കപ്പ്: റോണക്സ് സേവ്യർ, കോസ്റ്റ്യൂം ഡിസൈനർ: അരുൺ മനോഹർ, അസോസിയേറ്റ് ഡയറക്ടർ: ദീപക് എ നാരായൺ, പ്രൊഡക്ഷൻ കൺട്രോളർ: ദീപക് പരമേശ്വരൻ, ഡിസൈൻസ്: യെല്ലോ ടൂത്ത്സ്, സ്റ്റിൽസ്: നന്ദു, ഡിജിറ്റൽ പ്രമോഷൻസ്: അനൂപ് സുന്ദരൻ.

വേഫെറർ ഫിലിംസ് ആണ് ഈ ചിത്രം പ്രദർശനത്തിനെത്തിക്കുന്നത്. പി.ആര്‍.ഒ: വാഴൂർ ജോസ്.