വയനാട്ടിലെ പുൽപള്ളി താഴെയങ്ങാടിയിൽ തുടരുന്ന രൂക്ഷമായ ഗതാഗത തടസ്സങ്ങൾക്ക് ശാശ്വത പരിഹാരം കാണണമെന്ന ആവശ്യവുമായി ബിജെപി പഞ്ചായത്ത് കമ്മിറ്റി രംഗത്തെത്തി. ഗതാഗത നിയന്ത്രണത്തിനായി അടിയന്തരമായി ഹോംഗാർഡിനെ നിയമിക്കണമെന്നാണ് പാർട്ടിയുടെ ആവശ്യം.
വികസനപ്രവർത്തനങ്ങളിലെ മെല്ലെപ്പോക്ക്
മാസങ്ങൾക്ക് മുൻപ് ആരംഭിച്ച കലുങ്ക് നിർമാണം പാതിവഴിയിൽ നിലച്ചതാണ് പ്രദേശത്തെ ഗതാഗതക്കുരുക്കിന് പ്രധാന കാരണം. നിർമാണത്തിന്റെ ഭാഗമായി കലുങ്ക് പൊളിച്ച് കോൺക്രീറ്റ് ചെയ്തെങ്കിലും, റോഡ് ഗതാഗതത്തിനായി തുറന്നുകൊടുക്കാൻ അധികൃതർക്ക് സാധിച്ചിട്ടില്ല.
റോഡ് പണി പൂർത്തിയാകാത്തത് മൂലം മഴക്കാലത്ത് പ്രദേശം ചെളിക്കുളമായി മാറുകയാണ്. ഇരുചക്രവാഹന യാത്രക്കാർ ഇവിടെ തെന്നിവീഴുന്നതും പതിവായിരിക്കുന്നു.
കൂടാതെ, റോഡരികിലെ അലക്ഷ്യമായ പാർക്കിങ്ങും ബസുകൾ റോഡിൽ നിർത്തി യാത്രക്കാരെ ഇറക്കുന്നതും സ്ഥിതി വഷളാക്കുന്നുണ്ട്. കെ.കെ.അരുൺ അധ്യക്ഷത വഹിച്ച യോഗത്തിൽ കെ.ഡി.ഷാജിദാസ്, ഇ.കെ.സനിൽ, മനു പ്രസാദ്, പി.ആർ.സുഭാഷ്, കെ.പ്രതീഷ്, ഇ.കെ.സണ്ണി, അഭിലാഷ് വാസു എന്നിവർ സംസാരിച്ചു.
പൂഴിത്തോട് പാത: സമരം ശക്തമാക്കാൻ നീക്കം
പടിഞ്ഞാറത്തറയിൽ പൂഴിത്തോട് പാത യാഥാർഥ്യമാക്കണമെന്ന ആവശ്യം ഉന്നയിച്ച് ജനകീയ കർമസമിതി പ്രതിഷേധം കടുപ്പിക്കുന്നു. താമരശ്ശേരി ചുരത്തിലെ ഗതാഗതക്കുരുക്കിന് പരിഹാരമായി നിർദ്ദേശിക്കപ്പെട്ട
പൂഴിത്തോട് പാതയുടെ നടപടികൾ ഇഴഞ്ഞുനീങ്ങുന്നതിലാണ് പ്രതിഷേധം. പാതയുടെ പ്രാഥമിക ഡിപിആറിന് അംഗീകാരം ലഭിക്കാൻ ഇനിയും വൈകുന്നതിൽ സമിതി കടുത്ത അതൃപ്തി രേഖപ്പെടുത്തി.
നിലവിൽ 1260 ദിവസങ്ങളായി തുടരുന്ന റിലേ സമരം വരുംദിവസങ്ങളിൽ ശക്തമാക്കാനാണ് തീരുമാനം. സർക്കാർ നിയോഗിച്ച നോഡൽ ഓഫിസർമാർ ഇതുവരെ പാത സന്ദർശിക്കുകയോ സമരസമിതിയുമായി ചർച്ച നടത്തുകയോ ചെയ്തിട്ടില്ലെന്നും യോഗം ചൂണ്ടിക്കാട്ടി.
സാജൻ തുണ്ടിയിൽ അധ്യക്ഷത വഹിച്ച യോഗത്തിൽ കമൽ ജോസഫ് വിഷയാവതരണം നടത്തി. സി.കെ.
ആലിക്കുട്ടി, ബെന്നി മാണിക്കത്ത്, നാസർ കൈപ്രവൻ, ഉലഹന്നാൻ പട്ടർമഠം, യു.സി. ഹുസൈൻ, തങ്കച്ചൻ നടക്കൽ, സി.കെ.നാസർ, വി.എസ്.വിശ്വനാഥൻ, അസീസ് കളത്തിൽ, ബെന്നി കുറുമണി തുടങ്ങിയവർ പ്രസംഗിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
