വിതുര കെഎസ്ആർടിസി: മലബാർ സർവീസുകൾക്കായി യാത്രക്കാരുടെ മുറവിളി ശക്തമാകുന്നു

വിതുര ഡിപ്പോയിൽ നിന്ന് മലബാർ മേഖലയിലേക്ക് വൈകിട്ട് നാല് മണിക്ക് ശേഷം ദീർഘദൂര സർവീസുകൾ ആരംഭിക്കണമെന്ന യാത്രക്കാരുടെ ആവശ്യം അധികൃതർ അവഗണിക്കുന്നതായി വ്യാപക പരാതി. നിലവിൽ പകൽ സമയത്ത് മാത്രമാണ് വിതുരയിൽ നിന്നുള്ള ബസുകൾ സർവീസ് നടത്തുന്നത്.

നിലവിലെ സമയക്രമമനുസരിച്ച്, രാവിലെ 3.30-ന് തൊടുപുഴ സൂപ്പർ ഫാസ്റ്റ്, 4.05-ന് ഐസറിൽ നിന്ന് തൃശൂർ സൂപ്പർ ഫാസ്റ്റ്, 5.40-ന് ചക്കുളത്തുകാവ് ഫാസ്റ്റ്, 6.00-ന് ആലപ്പുഴ ഫാസ്റ്റ്, 6.15-ന് പത്തനംതിട്ട ഫാസ്റ്റ്, 7.00-ന് പാലാ–ഈരാറ്റുപേട്ട

ഫാസ്റ്റ്, 7.10-ന് കൊല്ലം എന്നിങ്ങനെയാണ് സർവീസുകൾ ക്രമീകരിച്ചിരിക്കുന്നത്. ഇതുകൂടാതെ, കളീയ്ക്കാവിള ഡിപ്പോയുടെ തൃശൂർ ഫാസ്റ്റ് 8.40-ന് വിതുരയിലെത്തി പാലോട് വഴി കടന്നുപോകുന്നുണ്ട്.

യാത്രാ സൗകര്യം മെച്ചപ്പെടുത്തണം
ഗുരുവായൂർ, കൊടുങ്ങല്ലൂർ, തിരുനെല്ലി തുടങ്ങിയ സ്ഥലങ്ങളെ ബന്ധിപ്പിച്ചുകൊണ്ട് പുതിയ സർവീസുകൾ ആരംഭിക്കണമെന്ന് ശ്രീരാഗ് എസ്.യാദവ് ആവശ്യപ്പെട്ടു. കണ്ണൂർ, കോഴിക്കോട്, സുൽത്താൻ ബത്തേരി തുടങ്ങിയ സ്ഥലങ്ങളിലേക്ക് മറ്റ് ഡിപ്പോകളിൽ നിന്നുള്ള ബസുകൾ മികച്ച വരുമാനത്തോടെയാണ് സർവീസ് നടത്തുന്നത്.

ഓൺലൈൻ ബുക്കിങ് സംവിധാനം ലഭ്യമായ സാഹചര്യത്തിൽ ടിക്കറ്റ് വിൽപന സുഗമമായി നടത്താൻ സാധിക്കും. വെട്ടിക്കുറച്ച ദൂരങ്ങൾ
നേരത്തെ തൊടുപുഴ ബസ് മൂന്നാർ വരെയും, പത്തനംതിട്ട

ബസ് പൊൻകുന്നം വരെയും, ആലപ്പുഴ ബസ് എറണാകുളം വരെയും, കൊല്ലം ബസ് കരുനാഗപ്പള്ളി വരെയും സർവീസ് നടത്തിയിരുന്നു. എന്നാൽ പിന്നീട് പല കാരണങ്ങൾ പറഞ്ഞ് ഈ സർവീസുകളുടെ യാത്രാദൂരം വെട്ടിക്കുറയ്ക്കുകയായിരുന്നു.

അധികൃതർ ഇതിന് വ്യക്തമായ മറുപടി നൽകുന്നില്ലെന്ന് യാത്രക്കാർ കുറ്റപ്പെടുത്തുന്നു. സമയലാഭവും യാത്രാ സുഖവും
വിതുരയിൽ നിന്ന് തമ്പാനൂരിലെത്തി യാത്ര തുടരുന്നതിനേക്കാൾ, നേരിട്ടുള്ള സർവീസുകൾ ലഭ്യമായാൽ യാത്രക്കാർക്ക് വലിയ തോതിൽ സമയം ലാഭിക്കാൻ സാധിക്കും.

ഉദാഹരണത്തിന്, കോട്ടയം ഭാഗത്തേക്ക് പോകുന്നവർക്ക് വിതുരയിൽ നിന്ന് തമ്പാനൂർ എത്തുന്ന സമയം കൊണ്ട് കൊട്ടാരക്കര വരെ എത്താൻ കഴിയും. ഇതുവഴി ഒന്നര മണിക്കൂറിലേറെ സമയം ലാഭിക്കാൻ സാധിക്കുമെന്ന് യാത്രക്കാർ ചൂണ്ടിക്കാട്ടുന്നു.

മലബാർ മേഖലയിലേക്കുള്ള സർവീസുകൾ വൈകുന്നേരങ്ങളിൽ ആരംഭിക്കുന്നത് രാത്രിയാത്ര കൂടുതൽ ആയാസരഹിതമാക്കും. മികച്ച വരുമാനം ലഭിക്കാൻ സാധ്യതയുള്ള റൂട്ടുകളിൽ ശാസ്ത്രീയമായ രീതിയിൽ സർവീസുകൾ ക്രമീകരിക്കണമെന്ന് ഷാഫി വിതുര ആവശ്യപ്പെട്ടു.

മൂന്നാറിനെയും മലബാറിലെ വിനോദ സഞ്ചാര കേന്ദ്രങ്ങളെയും ബന്ധിപ്പിച്ചുകൊണ്ടുള്ള സർവീസുകൾ കെഎസ്ആർടിസിക്ക് ലാഭകരമായിരിക്കും.