അഫ്ഗാനിസ്ഥാൻ ടെസ്റ്റ്: ഇന്ത്യൻ പുരുഷ ക്രിക്കറ്റ് ടീമിന്റെ സ്പിൻ ബോളിങ് പരിശീലകനായി സൈരാജ് ബഹുതുലെയെ നിയമിച്ചു

അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരത്തിന് മുന്നോടിയായി, മുൻ ഇന്ത്യൻ ലെഗ് സ്പിന്നർ സൈരാജ് ബഹുതുലെയെ ഇന്ത്യൻ പുരുഷ ക്രിക്കറ്റ് ടീമിന്റെ സ്പിൻ ബോളിങ് പരിശീലകനായി ബിസിസിഐ നിയമിച്ചു. ന്യൂ ചണ്ഡീഗഡിൽ ശനിയാഴ്ചയാണ് അഫ്ഗാനിസ്ഥാനെതിരെയുള്ള ഏക ടെസ്റ്റ് മത്സരം ആരംഭിക്കുന്നത്.

ആഭ്യന്തര ക്രിക്കറ്റിൽ കേരളം, ഗുജറാത്ത്, വിദർഭ, ബംഗാൾ എന്നീ ടീമുകളുടെ മുഖ്യ പരിശീലകനായി പ്രവർത്തിച്ച പരിചയസമ്പത്താണ് ബഹുതുലെയെ ഈ സ്ഥാനത്തേക്ക് പരിഗണിക്കാൻ ബിസിസിഐയെ പ്രേരിപ്പിച്ചത്. ഐപിഎല്ലിൽ രാജസ്ഥാൻ റോയൽസ്, പഞ്ചാബ് കിങ്‌സ് (2026) എന്നീ ടീമുകളുടെ സ്പിൻ ബോളിങ് പരിശീലകനായും അദ്ദേഹം സേവനമനുഷ്ഠിച്ചിട്ടുണ്ട്.

കൂടാതെ, 2022-ലെ അണ്ടർ 19 ലോകകപ്പ് വിജയിച്ച ഇന്ത്യൻ ടീമിന്റെയും 2024 ലോകകപ്പിലെ ടീമിന്റെയും ബോളിങ് പരിശീലകനായിരുന്ന അദ്ദേഹം, 2021 മുതൽ 2024 വരെ നാഷണൽ ക്രിക്കറ്റ് അക്കാദമിയിൽ നിർണ്ണായക ചുമതലകൾ വഹിച്ചിട്ടുണ്ട്. രാഹുൽ ദ്രാവിഡിന് കീഴിൽ ഇന്ത്യ എ ടീമിനൊപ്പവും സീനിയർ ടീമിനൊപ്പവും അദ്ദേഹം പ്രവർത്തിച്ചിട്ടുണ്ട്.

നിയമനത്തെക്കുറിച്ച് സൈരാജ് ബഹുതുലെ പ്രതികരിച്ചത് ഇങ്ങനെയാണ്: “ഇന്ത്യൻ ടീമിന്റെ സ്പിൻ ബോളിങ് പരിശീലകനാകാൻ കഴിഞ്ഞത് വലിയൊരു ബഹുമതിയായി കാണുന്നു. കളിക്കാരനെന്ന നിലയിൽ ഇന്ത്യയെ പ്രതിനിധീകരിക്കാൻ കഴിഞ്ഞത് വലിയ അഭിമാനമായിരുന്നു, ഇനി പരിശീലകന്റെ റോളിൽ ഇന്ത്യൻ ക്രിക്കറ്റിനായി സംഭാവന നൽകാൻ കഴിയുന്നത് ഏറെ സവിശേഷമായ കാര്യമാണ്.” മുഖ്യ പരിശീലകൻ ഗൗതം ഗംഭീർ, ബാറ്റിങ് പരിശീലകൻ സിതാൻഷു കോട്ടക്, ഫാസ്റ്റ് ബോളിങ് പരിശീലകൻ മോണി മോർക്കൽ, ഫീൽഡിങ് പരിശീലകൻ ടി ദിലീപ്, അസിസ്റ്റന്റ് പരിശീലകൻ റയാൻ ടെൻ ഡോഷാട്ടെ എന്നിവരടങ്ങുന്ന സപ്പോർട്ട് സ്റ്റാഫിനൊപ്പമായിരിക്കും ബഹുതുലെയുടെ പ്രവർത്തനം.

നിലവിൽ ലോക ടെസ്റ്റ് ചാമ്പ്യൻഷിപ്പ് പട്ടികയിൽ ആറാം സ്ഥാനത്താണ് ഇന്ത്യ. 2024-ൽ ന്യൂസിലാൻഡിനെതിരെയും 2025-ൽ ദക്ഷിണാഫ്രിക്കയ്‌ക്കെതിരെയും നാട്ടിൽ നടന്ന പരമ്പരകളിൽ തോൽവി വഴങ്ങിയ ഇന്ത്യക്ക് വരാനിരിക്കുന്ന ടെസ്റ്റ് ഏറെ നിർണ്ണായകമാണ്.

ജൂൺ 6-ന് ആരംഭിക്കുന്ന ടെസ്റ്റിന് ശേഷം ജൂൺ 14 മുതൽ 20 വരെ മൂന്ന് മത്സരങ്ങളടങ്ങിയ ഏകദിന പരമ്പരയും നടക്കും. ശുഭ്മൻ ഗിൽ നയിക്കുന്ന ടീമിൽ ടെസ്റ്റിൽ കെ എൽ രാഹുലും ഏകദിനത്തിൽ ശ്രേയസ് അയ്യരുമാണ് വൈസ് ക്യാപ്റ്റന്മാർ.