കാഴ്ചകളുടെ വിരുന്ന്; മങ്കയത്തിന്റെയും ബ്രൈമൂറിന്റെയും മലമടക്കുകൾ മാടിവിളിക്കുന്നു…

പാലോട് ∙ സുന്ദരക്കാഴ്ചകളിലേക്ക് മങ്കയത്തിന്റെയും ബ്രൈമൂറിന്റെയും മലമടക്കുകൾ മാടിവിളിക്കുകയാണ് ഈ അവധിക്കാലത്ത്. ശാന്തത നിറഞ്ഞതും മനസ്സിന് കുളിർമ തരുന്നതുമായ ബ്രൈമൂർ മലമുകളിലെ ഏകാന്തതയിൽ നിന്നുള്ള കോടമഞ്ഞിന്റെ വെള്ളപ്പുതപ്പണിഞ്ഞ മലനിരകളുടെയും പച്ചപ്പിന്റെ മനോഹാരിതയ്ക്കിടയിൽ പൂത്തിറങ്ങിയ മരങ്ങളാൽ സമൃദ്ധമായ കാടിന്റെയും ദൂരക്കാഴ്ച സമ്മാനിക്കുന്ന ആനന്ദം വിവരാണാതീതമാണ്.
ഈ ചുട്ടുപൊള്ളുന്ന ചൂടിലും ഈ പശ്ചിമഘട്ട

മലനിരകൾ സമ്മാനിക്കുന്നത് ശുദ്ധമായ വായുവിന്റെയും കാറ്റിന്റെയും കുളിരോരം കൂടിയാണ്. വലിയ പഞ്ചായത്തും ജൈവവൈവിധ്യത്തിന് യുഎൻ പൈതൃക പട്ടികയിൽ വരെ ഇടം നേടിയ പെരിങ്ങമ്മല പഞ്ചായത്തിലെ മങ്കയം, ബ്രൈമൂർ മലനിരകളിലേക്ക് വരുന്നവർക്ക് ആദ്യം വനം വകുപ്പിന്റെ മങ്കയം ഇക്കോ ടൂറിസത്തിൽ ഒന്നിലധികം വെള്ളച്ചാട്ടം കാണാം.
മലമടക്കുകളിൽ നിന്ന് പതഞ്ഞു പൊന്തി ഒഴുകുന്ന കാട്ടരുവികൾ വേനൽക്കാലത്ത് നൂൽപ്പുഴയായും മഴക്കാലത്ത് പാൽപ്പുഴയായും കാഴ്ച സമ്മാനിക്കുന്നു.

ഈ ചൂടുകാലത്ത് കുളിക്കാനും ഇവിടെ ഇടങ്ങളുണ്ട്. മങ്കയം കടന്നു ബ്രൈമൂറിന്റെ നെറുകയിലെത്തിയാൽ മലമുകളിലെ കാഴ്ചകൾ വിരുന്നാകും.

മരങ്ങളുടെ പൂക്കാലംകൂടിയാണ് ഇപ്പോൾ. വാകമരങ്ങൾ അടക്കം ചുവപ്പിന്റെ അഴക് പടർത്തി വ്യാപകമായി കാണാം. 
ഇവിടുത്തെ സ്വകാര്യ ടൂറിസത്തിനകത്ത് പ്രവേശിച്ചാൽ തേയിലത്തോട്ടങ്ങൾ, തേയില ഫാക്ടറിയും മറ്റു കൃഷിവിളകളും പരിചയപ്പെടാം.

ബ്രിട്ടിഷ് നിർമിത ബംഗ്ലാവിലും കാഴ്ചകളുണ്ട്. ബ്രിട്ടിഷ്കാരുടെ സംഭാവനയായ കുതിരപ്പാത, ഹെലിപ്പാഡ് എന്നിവയുടെ കാഴ്ചയും ഈ പ്രകൃതി നടത്തത്തിലൂടെ ആസ്വദിക്കാം.

വെള്ളച്ചാട്ടങ്ങളും ഈ മേഖലയിലുണ്ട്. ഒരു ദിവസത്തെ യാത്ര ആഗ്രഹിക്കുന്നവർക്ക് ഈ മലമടക്കുകൾ കാഴ്ചകളുടെ വിരുന്നാണ്.

പാലോട്– പെരിങ്ങമ്മല – ഇടിഞ്ഞാർ വഴി മങ്കയത്തും അതു കടന്നു ബ്രൈമൂർ മലമുകളിലും എത്താം. …