സംസ്ഥാനത്ത് പുതിയ അധ്യയന വർഷം ആരംഭിക്കുന്നതിനെത്തുടർന്ന് വിപണികളിൽ സ്കൂൾ ഉൽപ്പന്നങ്ങൾക്കായുള്ള തിരക്ക് വർധിച്ചു. വിദ്യാർത്ഥികളെ ആകർഷിക്കുന്ന നൂതനമായ പഠനോപകരണങ്ങളും ഡിജിറ്റൽ സാങ്കേതികവിദ്യയിൽ അധിഷ്ഠിതമായ ഉൽപ്പന്നങ്ങളുമാണ് ഇത്തവണ വിപണിയിലെ പ്രധാന ആകർഷണം.
സ്കൂൾ ബാഗുകൾ, കുടകൾ, ലഞ്ച് ബോക്സുകൾ, വാട്ടർ ബോട്ടിലുകൾ, നോട്ട്ബുക്കുകൾ തുടങ്ങി സ്കൂൾ ആവശ്യങ്ങൾക്കുള്ള എല്ലാ സാധനങ്ങളും വിപണിയിൽ ലഭ്യമാണ്. ഇത്തവണത്തെ വിപണിയിലെ പ്രധാന സവിശേഷത ഡിജിറ്റൽ പെൻസിൽ ബോക്സുകളാണ്.
ഇതിന്റെ ഡിസ്പ്ലേയിൽ എഴുതാനും വരയ്ക്കാനും സാധിക്കും. കൂടാതെ, എഴുതിയത് മായ്ക്കാനുള്ള പ്രത്യേക ബട്ടണും ഇതിലുണ്ട്.
150 രൂപ മുതലാണ് ഇത്തരം പെൻസിൽ ബോക്സുകളുടെ വില. സ്കൂൾ ബാഗുകൾക്ക് 300 രൂപ മുതലാണ് വില ആരംഭിക്കുന്നത്.
മാർവൽ സൂപ്പർ ഹീറോസ്, ഡിസ്നി കഥാപാത്രങ്ങൾ എന്നിവ പതിച്ച ബാഗുകൾക്കാണ് കുട്ടികൾക്കിടയിൽ കൂടുതൽ പ്രിയം. ഉയർന്ന ക്ലാസുകളിലെ വിദ്യാർത്ഥികൾക്കായി ബ്രാൻഡഡ് ബാഗുകൾ 1500 രൂപ മുതലും ലഭ്യമാണ്.
ഗുണമേന്മയും വാറന്റിയും ഉള്ളതിനാൽ ബ്രാൻഡഡ് ഉൽപന്നങ്ങൾക്ക് മികച്ച സ്വീകാര്യത ലഭിക്കുന്നുണ്ടെന്ന് വ്യാപാരികൾ വ്യക്തമാക്കുന്നു. മഴക്കാലം മുൻനിർത്തി വിവിധ നിറങ്ങളിലുള്ള കുടകൾ 250 രൂപ മുതലുള്ള വിലയിൽ വിപണിയിൽ എത്തിയിട്ടുണ്ട്.
ലഞ്ച് ബോക്സുകൾക്ക് 250 രൂപ മുതലും, വാട്ടർ ബോട്ടിലുകൾക്ക് 100 രൂപ മുതലും, സാധാരണ പെൻസിൽ ബോക്സുകൾക്ക് 30 രൂപ മുതലുമാണ് വില. വിവിധ സൂപ്പർമാർക്കറ്റുകൾ ഇതിനകം തന്നെ പഠനോപകരണങ്ങൾക്കായി പ്രത്യേക കൗണ്ടറുകൾ സജ്ജീകരിക്കുകയും ആകർഷകമായ ഓഫറുകൾ പ്രഖ്യാപിക്കുകയും ചെയ്തിട്ടുണ്ട്.
ഓൺലൈൻ വിപണിയും സജീവമാണ്. അതേസമയം, ഓൺലൈൻ ഷോപ്പിംഗും സ്കൂളുകളിൽ നിന്നുള്ള സൗജന്യ പഠനോപകരണ വിതരണവും ചെറുകിട
കച്ചവടത്തെ ബാധിക്കുന്നുണ്ടെന്ന ആശങ്ക വ്യാപാരികൾ പങ്കുവെക്കുന്നു. എങ്കിലും, വരും ആഴ്ചകളിൽ വിപണി കൂടുതൽ സജീവമാകുമെന്ന പ്രതീക്ഷയിലാണ് വ്യാപാരികൾ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
