തങ്കശ്ശേരിയുടെ കടൽത്തീരത്തുനിന്നൊരു ഫുട്ബോൾ നായകൻ; അണ്ടർ 15 കേരള ടീമിനെ നയിക്കാൻ അനോക് ഷോൺ ആന്റണി

കൊല്ലം തങ്കശ്ശേരി കടപ്പുറത്തെ മണലാരണ്യത്തിൽ കാൽപന്തിനെ നെഞ്ചിലേറ്റിയ ആ ബാലൻ ഇന്ന് സംസ്ഥാനത്തിന്റെ കായിക അഭിമാനമായി മാറുകയാണ്. തിരമാലകളുടെ ഇരമ്പലുകൾക്കിടയിൽ പന്തുമായി മുന്നേറിയിരുന്ന അനോക് ഷോൺ ആന്റണി (15) നിലവിൽ അണ്ടർ 15 കേരള ഫുട്ബോൾ ടീമിന്റെ നായക പദവി അലങ്കരിക്കുന്നു.

ബെംഗളൂരുവിൽ നടക്കുന്ന ദേശീയ ഫുട്ബോൾ ചാംപ്യൻഷിപ്പിന്റെ ആവേശത്തിലാണ് നിലവിൽ ഷോണും കൂട്ടുകാരും. തങ്കശ്ശേരി ബിഷപ് പാലസ് നഗർ ഏലിയാസ് കോട്ടേജിൽ ആന്റണി–സുജ ദമ്പതികളുടെ മകനാണ് ഈ പ്രതിഭ.

തങ്കശ്ശേരി ഇൻഫന്റ് ജീസസ് സ്കൂളിൽ അത്‌ലറ്റിക്സ് താരമായാണ് ഷോൺ കായികരംഗത്തേക്ക് കടന്നുവരുന്നത്. ഫുട്ബോളിലെ അദ്ദേഹത്തിന്റെ ആദ്യ ഗുരു പിതാവ് ആന്റണി തന്നെയാണ്.

പ്രാദേശിക തലത്തിൽ ഡിഫൻഡറായി തിളങ്ങിയിട്ടുള്ളയാളാണ് ആന്റണി. ക്വയ്‌ലോൺ ഫുട്ബോൾ അക്കാദമിയിൽ പരിശീലനം നേടിയ ഷോൺ, കേരള ഫുട്ബോൾ അസോസിയേഷന്റെ മത്സരങ്ങളിൽ തന്റെ മികവ് തെളിയിച്ചതോടെ മലപ്പുറത്തെ മുത്തൂറ്റ് ഫുട്ബോൾ അക്കാദമി താരത്തെ സ്വന്തമാക്കുകയായിരുന്നു.

അനീഷ്, രാജേഷ് തുടങ്ങിയ പ്രഗത്ഭരാണ് അക്കാദമിയിലെ പ്രധാന പരിശീലകർ. നിലവിൽ പത്താം ക്ലാസ് വിദ്യാർത്ഥിയായ ഷോണിന്റെ അവസാന അണ്ടർ 15 ടൂർണമെന്റാണിത്.

അടുത്തതായി താരം അണ്ടർ 17 ടീമിന്റെ ഭാഗമാകും. ഫുട്ബോൾ കരിയർ സ്ട്രൈക്കറായി തുടങ്ങിയെങ്കിലും, പരിശീലകരുടെ നിർദ്ദേശപ്രകാരം താരം പ്രതിരോധ നിരയിലെ വിശ്വസ്തനായ താരമായി മാറുകയായിരുന്നു.

സ്റ്റുഡന്റ് ഗെയിംസ് ഫെഡറേഷൻ ഓഫ് ഇന്ത്യയുടെ ദേശീയ മത്സരങ്ങളിലും ഐസിഎസ്ഇ സ്കൂൾ ദേശീയ വേദികളിലും ഷോൺ തന്റെ മികവ് തെളിയിച്ചിട്ടുണ്ട്. അർജന്റീനയാണ് രാജ്യാന്തര തലത്തിൽ താരത്തിന്റെ പ്രിയപ്പെട്ട

ടീം; ലയണൽ മെസ്സി ഇഷ്ട താരവും.

‘‘മെസ്സിയുടെ വിരമിക്കൽ വേദനിപ്പിക്കുന്നുണ്ടെങ്കിലും ക്ലബ് ഫുട്ബോളിൽ അദ്ദേഹം വീണ്ടും സജീവമാകുന്നതിൽ സന്തോഷമുണ്ട്. പഠനത്തിനൊപ്പം ഫുട്ബോളിൽ തന്നെ തുടരണമെന്നാണ് ആഗ്രഹം’’–ഷോൺ വ്യക്തമാക്കി.

മാതാപിതാക്കൾക്ക് പുറമെ സഹോദരിമാരായ ആൻസിയും ആൻമേരിയും ഷോണിന്റെ കായിക സ്വപ്നങ്ങൾക്ക് പൂർണ്ണ പിന്തുണയുമായി ഒപ്പമുണ്ട്. ‘‘ക്യാപ്റ്റനായപ്പോൾ ഉത്തരവാദിത്തം കൂടി.

ഏറെ സന്തോഷമുണ്ട്. ആദ്യ കളിയിൽ തെലങ്കാനയെ പരാജയപ്പെടുത്താൻ കഴിഞ്ഞു.

ഇന്ന് അസമിനെതിരെ കളത്തിൽ ഇറങ്ങണം. കപ്പ് സ്വന്തമാക്കുക എന്ന ലക്ഷ്യത്തിൽ കുറഞ്ഞൊന്നും മനസ്സിലില്ല.’’ എന്ന് അണ്ടർ 15 കേരള ഫുട്ബോൾ ടീം ക്യാപ്റ്റൻ അനോക് ഷോൺ ആന്റണി പ്രതികരിച്ചു.