എന്തുകൊണ്ടാണ് പൈലറ്റുമാർ വ്യത്യസ്ത ഭക്ഷണങ്ങൾ കഴിക്കുന്നത്? വ്യോമയാന ചരിത്രത്തിലെ ആ നിർണായക ഏട്

ഉയർന്ന ആകാശത്ത് വിമാനം സഞ്ചരിക്കുമ്പോൾ പൈലറ്റുമാരുടെ ഓരോ ചെറിയ തീരുമാനത്തിനും വലിയ പ്രാധാന്യമുണ്ട്. ഇതിൽ ഏറ്റവും കൗതുകകരവും എന്നാൽ കർശനവുമായ ഒന്നാണ് കോക്ക്പിറ്റിലെ ഭക്ഷണക്രമം.

ഒരുമിച്ചിരിക്കുന്ന രണ്ട് പൈലറ്റുമാർക്ക് എയർലൈൻസ് വ്യത്യസ്ത സമയങ്ങളിലായി രണ്ട് തരം ഭക്ഷണമാണ് നൽകുന്നത്. ഈ സുരക്ഷാ മാനദണ്ഡത്തിന് പിന്നിൽ വലിയൊരു ചരിത്രമുണ്ട്.

1975 ഫെബ്രുവരി 3-നാണ് ഈ അലിഖിത നിയമത്തിന് ആധാരമായ വലിയ സംഭവം ഉണ്ടാകുന്നത്. ടോക്കിയോയിൽ നിന്ന് ആങ്കറേജ് വഴി കോപൻഹേഗനിലേക്ക് പറന്ന ജപ്പാൻ എയർലൈൻസിന്റെ ബോയിംഗ് 747 വിമാനത്തിൽ 344 യാത്രക്കാരും 20 ജീവനക്കാരുമാണ് ഉണ്ടായിരുന്നത്.

യാത്രക്കിടെ നൽകിയ ഹാം ഓംലെറ്റ് കഴിച്ച 143-ഓളം യാത്രക്കാർക്ക് പെട്ടെന്ന് കടുത്ത ഛർദ്ദിയും ദേഹാസ്വാസ്ഥ്യവും അനുഭവപ്പെട്ടു. തുടർന്ന് നടത്തിയ അന്വേഷണത്തിൽ, ഭക്ഷണം തയ്യാറാക്കിയ ആങ്കറേജിലെ കേറ്ററിംഗ് ജീവനക്കാരന്റെ കൈയിലെ മുറിവിൽ നിന്നുള്ള ‘സ്റ്റാഫിലോകോക്കസ് ഓറിയസ്’ (Staphylococcus aureus) എന്ന ബാക്ടീരിയ വഴിയാണ് ഭക്ഷ്യവിഷബാധയുണ്ടായതെന്ന് വ്യക്തമായി.

അന്ന് ആ വിമാനത്തിലെ പൈലറ്റുമാർ ഓംലെറ്റിന് പകരം സ്റ്റീക്ക് (Steak) കഴിക്കാൻ തീരുമാനിച്ചത് കൊണ്ട് മാത്രമാണ് വൻ ദുരന്തം ഒഴിവായതും വിമാനം സുരക്ഷിതമായി നിലത്തിറക്കാൻ സാധിച്ചതും. പിന്നീട് 1975 സെപ്റ്റംബറിൽ പ്രമുഖ മെഡിക്കൽ ജേണലായ ‘ദി ലാൻസെറ്റിൽ’ (The Lancet) പ്രസിദ്ധീകരിച്ച പഠന റിപ്പോർട്ടിലാണ്, വിമാനത്തിലെ പൈലറ്റുമാർ രണ്ടുപേരും വ്യത്യസ്ത പാചകക്കാർ തയ്യാറാക്കിയ വ്യത്യസ്ത ഭക്ഷണങ്ങൾ കഴിക്കണമെന്ന് നിർദ്ദേശിക്കുന്നത്.

ഫെഡറൽ ഏവിയേഷൻ അഡ്മിനിസ്‌ട്രേഷന്റെ ഔദ്യോഗിക നിയമമല്ലെങ്കിൽ പോലും, ലോകത്തെ ഭൂരിഭാഗം എയർലൈനുകളും തങ്ങളുടെ സ്റ്റാൻഡേർഡ് ഓപ്പറേറ്റിംഗ് പ്രൊസീജറിന്റെ ഭാഗമായി ഈ രീതി കർശനമായി പിന്തുടരുന്നുണ്ട്. വിമാനം പുറപ്പെടുന്നതിന് മുൻപ് രണ്ടു പൈലറ്റുമാരും തങ്ങൾ തെരഞ്ഞെടുത്ത ഭക്ഷണം ഒന്നല്ലെന്ന് കോക്പിറ്റിൽ വെച്ച് ഉറപ്പുവരുത്തണം.

വ്യത്യസ്ത സമയങ്ങളിലാണ് ഇവർ ഭക്ഷണം കഴിക്കുന്നത്. ഇതിൽ ഒരാൾക്ക് ഭക്ഷ്യവിഷബാധയേറ്റാലും രണ്ടാമത്തെ പൈലറ്റിന് വിമാനം സുരക്ഷിതമായി അടുത്തുള്ള വിമാനത്താവളത്തിൽ ഇറക്കാൻ സാധിക്കും.

ഒരാൾക്ക് ഫസ്റ്റ് ക്ലാസ് ഗാലറിയിൽ നിന്നും അടുത്തയാൾക്ക് ബിസിനസ് ക്ലാസ് ഗാലറിയിൽ നിന്നുമാണ് സാധാരണയായി ഭക്ഷണം നൽകുന്നത്. ചില കമ്പനികൾ പൈലറ്റുമാർക്കായി പ്രത്യേക അടുക്കളകളിൽ നിന്ന് ഭക്ഷണം തയ്യാറാക്കി സീൽ ചെയ്ത പാക്കറ്റുകളിൽ എത്തിച്ചുനൽകുന്നു.

വിമാനത്തിന്റെ എൻജിൻ, ഹൈഡ്രോളിക് സിസ്റ്റം എന്നിവയിലെല്ലാം ഒന്നിലധികം ബാക്കപ്പുകൾ നൽകുന്ന വ്യോമയാന മേഖലയിലെ മുൻകരുതലുകളുടെ ഭാഗമായാണ് ഈ രീതിയും നടപ്പിലാക്കുന്നത്. സാങ്കേതിക തകരാറുകൾ മാത്രമല്ല, മനുഷ്യസഹജമായ ആരോഗ്യ പ്രശ്നങ്ങളും ആകാശത്ത് അപകടങ്ങൾക്ക് കാരണമാകാതിരിക്കാനാണ് ഇത്തരം മുൻകരുതലുകൾ സ്വീകരിക്കുന്നത്.