വിവോ ടി5 5ജി ഇന്ത്യയിലേക്ക്; പ്രധാന സവിശേഷതകൾ പുറത്തുവിട്ട് കമ്പനി

പ്രമുഖ സ്മാർട്ട്ഫോൺ നിർമ്മാതാക്കളായ വിവോയുടെ ജനപ്രിയ ടി സീരീസിലേക്ക് പുതിയൊരു 5ജി സ്മാർട്ട്ഫോൺ കൂടി ഉടൻ എത്തും. ഏറെ പ്രതീക്ഷയോടെ കാത്തിരിക്കുന്ന വിവോ ടി5 5ജി ഇന്ത്യൻ വിപണിയിൽ അവതരിപ്പിക്കുമെന്ന് കമ്പനി ഔദ്യോഗികമായി സ്ഥിരീകരിച്ചു.

കൃത്യമായ ലോഞ്ച് തീയതി ഇതുവരെ പ്രഖ്യാപിച്ചിട്ടില്ലെങ്കിലും, വരാനിരിക്കുന്ന ഫോണിന്റെ പ്രധാന ഫീച്ചറുകൾ സംബന്ധിച്ച സൂചനകൾ വിവോ നൽകിതുടങ്ങിയിട്ടുണ്ട്. ഫോണിന്റെ വിൽപ്പന സംബന്ധിച്ച വിവരങ്ങളും ഇതിനോടകം പുറത്തുവന്നിട്ടുണ്ട്.

ഇതിന്റെ ഭാഗമായി പ്രമുഖ ഇ-കോമേഴ്സ് പ്ലാറ്റ്‌ഫോമായ ഫ്ലിപ്കാർട്ടിൽ പ്രത്യേക ലാൻഡിംഗ് പേജ് ഇതിനകം തയാറാക്കിയിട്ടുണ്ട്. ഇന്ത്യയിൽ അവതരിപ്പിക്കുന്ന ഈ പുതിയ ഡിവൈസിന്റെ പ്രധാന വിൽപ്പന പങ്കാളി ഫ്ലിപ്കാർട്ട് ആയിരിക്കുമെന്ന് ഇതിലൂടെ വ്യക്തമായിട്ടുണ്ട്.

നൂതന സാങ്കേതികവിദ്യകളോടെയെത്തുന്ന ഈ ഡിവൈസിൽ ഒറിജിൻഒഎസ് സോഫ്റ്റ്‌വെയർ ആയിരിക്കും ഉൾപ്പെടുത്തുകയെന്നാണ് സൂചന. നിലവിലെ വിവരങ്ങൾ വിലയിരുത്തുമ്പോൾ, ഒറിജിൻഒഎസ് 6 ആയിരിക്കും ഫോണിലെ ഓപ്പറേറ്റിങ് സിസ്റ്റമെന്നാണ് പ്രതീക്ഷിക്കുന്നത്.

ഉപയോക്താക്കൾക്കായി ആർട്ടിഫിഷ്യൽ ഇന്റലിജൻസ് അധിഷ്ഠിത ഫീച്ചറുകൾക്കും വിവോ ഇത്തവണ വലിയ പ്രാധാന്യമാണ് നൽകുന്നത്. ഇതിന്റെ ഭാഗമായി ജെൻഎഐ-റെഡി എൻപിയു ഇതിൽ ഉൾപ്പെടുത്തുമെന്ന് കമ്പനി വ്യക്തമാക്കിയിട്ടുണ്ട്.

എഐയുമായി ബന്ധപ്പെട്ട പ്രവർത്തനങ്ങൾ കൂടുതൽ വേഗത്തിലും മികച്ച കാര്യക്ഷമതയോടെയും കൈകാര്യം ചെയ്യാൻ ഇത് സഹായിക്കുമെന്നാണ് വിലയിരുത്തപ്പെടുന്നത്.

ഫോണിന്റെ പ്രധാന ആകർഷണങ്ങളിലൊന്ന് അതിന്റെ ഡിസ്പ്ലേ ആയിരിക്കും. 34,999 മുതൽ 49,999 രൂപ വരെയുള്ള വിലവിഭാഗത്തിൽ ഈ സെഗ്മെന്റിലെ ഏറ്റവും സ്ലിം ആയ 3ഡി കർവ്ഡ് ഡിസ്പ്ലേ ആയിരിക്കും ഫോണിലുണ്ടാകുകയെന്നാണ് കമ്പനിയുടെ അവകാശവാദം.

ഡിസൈൻ മികവിലും വിവോ ടി5 5ജി ശ്രദ്ധയാകർഷിക്കുമെന്നുറപ്പാണ്. വെറും 7.99 മില്ലിമീറ്റർ കനം മാത്രമുള്ള അൾട്രാ-സ്ലിം ബോഡിയാണ് ഇതിന് നൽകിയിരിക്കുന്നത്.

ഫോണിന്റെ വില 50,000 രൂപയിൽ താഴെയായിരിക്കുമെന്ന സൂചനയാണ് ടീസറുകൾ നൽകുന്നത്. വിവോ ടി5 ലൈറ്റ് 5ജി, വിവോ ടി5എക്സ് 5ജി, വിവോ ടി5 പ്രോ 5ജി എന്നിവയ്ക്ക് പിന്നാലെയാണ് സ്റ്റാൻഡേർഡ് ടി5 മോഡൽ വിപണിയിലെത്തുന്നത്.

ഇതോടെ ഇന്ത്യയിലെ വിവോ ടി5 സീരീസ് കൂടുതൽ വിപുലമാവുകയാണ്. അതേസമയം, വിവോ ടി5 പ്രോ 5ജി-യുടെ വിലയിൽ അടുത്തിടെ വർധനവുണ്ടായിട്ടുണ്ട്.

8 ജിബി റാം + 128 ജിബി സ്റ്റോറേജ് മോഡലിന്റെ വില 41,999 രൂപയായും, 8 ജിബി + 256 ജിബി പതിപ്പിന് 46,999 രൂപയായും മാറിയിട്ടുണ്ട്. കൂടാതെ ടോപ്പ് വേരിയന്റായ 12 ജിബി + 256 ജിബി പതിപ്പിന് 69,999 രൂപയുമാണ് നിലവിലെ വില.

ഫോണിന്റെ പ്രോസസർ, ക്യാമറ, ബാറ്ററി, ചാർജിങ് വേഗത, കൃത്യമായ വില, ലോഞ്ച് തീയതി തുടങ്ങിയ മറ്റു നിർണായക വിവരങ്ങൾ വരും ദിവസങ്ങളിൽ കമ്പനി ഔദ്യോഗികമായി പുറത്തുവിടുമെന്നാണ് പ്രതീക്ഷിക്കുന്നത്.