ടാൽക്കം പൗഡർ വിവാദം; കേസുകൾ ഒത്തുതീർപ്പാക്കാൻ 5.5 ബില്യൺ ഡോളർ നൽകാൻ ജോൺസൺ ആൻഡ് ജോൺസൺ

അമേരിക്കൻ ബഹുരാഷ്ട്ര കമ്പനിയായ ജോൺസൺ ആൻഡ് ജോൺസൺ തങ്ങളുടെ ടാൽക്കം പൗഡർ ഉപയോഗിച്ചതു വഴി അണ്ഡാശയ അർബുദം വന്നുവെന്നാരോപിച്ചുള്ള പതിനായിരക്കണക്കിന് കേസുകൾ ഒത്തുതീർപ്പാക്കുന്നതിന്റെ ഭാഗമായി വലിയ തുക നഷ്ടപരിഹാരം പ്രഖ്യാപിച്ചു. 5.5 ബില്യൺ ഡോളർ (ഏകദേശം 52,800 കോടി രൂപ) നൽകാനാണ് കമ്പനിയുടെ തീരുമാനം.

അമേരിക്കൻ കോർപ്പറേറ്റ് ചരിത്രത്തിലെ തന്നെ ഏറ്റവും വലിയ നിയമപോരാട്ടങ്ങളിലൊന്നിനാണ് ഇതോടെ വിരാമമാകുന്നത്. അമേരിക്കയിലെ വിവിധ ഫെഡറൽ, സ്റ്റേറ്റ് കോടതികളിലായി നിലവിലുള്ള 76,000-ത്തോളം അണ്ഡാശയ കാൻസർ കേസുകളാണ് ഈ ഒത്തുതീർപ്പിൽ ഉൾപ്പെടുന്നത്.

എന്നാൽ പരാതിക്കാരിൽ 95 ശതമാനം പേരും ഈ ഒത്തുതീർപ്പ് വ്യവസ്ഥകൾ അംഗീകരിച്ചാൽ മാത്രമേ ഇത് നടപ്പിലാകൂ. കഴിഞ്ഞ പത്ത് വർഷത്തിലേറെയായി നീണ്ടുനിൽക്കുന്ന നിയമപോരാട്ടമാണിത്.

മൂന്ന് തവണ പാപ്പരത്ത ഹർജി നൽകിയിട്ടും കമ്പനിക്ക് ഈ കേസുകളിൽ നിന്ന് ഒഴിയാൻ കഴിഞ്ഞിരുന്നില്ല. എന്തുകൊണ്ടാണ് കമ്പനി ഇപ്പോൾ ഒത്തുതീർപ്പിന് തയ്യാറാകുന്നത്? തങ്ങളുടെ പൗഡർ പൂർണ്ണമായും സുരക്ഷിതമാണെന്നും, അതിൽ കാൻസറിന് കാരണമാകുന്ന ആസ്ബറ്റോസ് അടങ്ങിയിട്ടില്ലെന്നുമാണ് കമ്പനി ഇപ്പോഴും ആവർത്തിക്കുന്നത്.

തെറ്റ് ചെയ്തത് കൊണ്ടല്ല, മറിച്ച് വർഷങ്ങളായി തുടരുന്ന ഈ വൻകിട നിയമപോരാട്ടങ്ങൾ അവസാനിപ്പിക്കാൻ വേണ്ടിയാണ് പണം നൽകുന്നത് എന്നാണ് കമ്പനിയുടെ വിശദീകരണം.

2027 ൽ 3 ബില്യൺ ഡോളർ (ഏകദേശം 28,800 കോടി രൂപ) കമ്പനി നൽകും. ബാക്കി തുക 2028 ലായിരിക്കും കൈമാറുക.

എന്നാൽ ഈ തുക അന്തിമമല്ല. എത്രപേർ ഈ ഒത്തുതീർപ്പിന് തയ്യാറാകുന്നു എന്നതിനെ ആശ്രയിച്ച് അന്തിമ തുക 7 ബില്യൺ ഡോളറിന് (ഏകദേശം 67,200 കോടി രൂപ) മുകളിലേക്ക് പോകാൻ സാധ്യതയുണ്ടെന്ന് പരാതിക്കാരുടെ അഭിഭാഷകൻ പറഞ്ഞു.

എന്തായിരുന്നു പ്രധാന ആരോപണങ്ങൾ? വർഷങ്ങളോളം ജോൺസൺ ആൻഡ് ജോൺസൺ ബേബി പൗഡറും മറ്റ് ടാൽക് ഉൽപ്പന്നങ്ങളും ഉപയോഗിച്ചതുവഴി അണ്ഡാശയ കാൻസർ വന്നു എന്നാണ് പരാതിക്കാരായ സ്ത്രീകളുടെ പ്രധാന ആരോപണം. പൗഡറിൽ കാൻസറിന് കാരണമാകുന്ന ആസ്ബറ്റോസ് അടങ്ങിയിട്ടുണ്ടെന്നും ഇവർ വാദിച്ചു.

എന്നാൽ ശാസ്ത്രീയ തെളിവുകൾ നിരത്തി കമ്പനി ഇത് നിഷേധിക്കുകയായിരുന്നു. വിവാദങ്ങളെ തുടർന്ന് 2020-ൽ അമേരിക്കയിൽ ടാൽക് അടിസ്ഥാനമാക്കിയുള്ള പൗഡറിന്റെ വിൽപ്പന കമ്പനി നിർത്തി.

പകരം കോൺസ്റ്റാർച്ച് (ചോളം) ഉപയോഗിച്ചുള്ള പൗഡറാണ് കമ്പനി ഇപ്പോൾ അവിടെ വിൽക്കുന്നത്. നിയമപോരാട്ടത്തിലെ ‘ടെക്‌സാസ് ടൂ-സ്റ്റെപ്പ്’ ഈ നിയമപോരാട്ടത്തിൽ കമ്പനിക്ക് അനുകൂലമായ പല വിധികളും അടുത്തിടെ ഉണ്ടായിട്ടുണ്ട്.

പൗഡർ ഉപയോഗിച്ചതാണ് കാൻസർ കാരണം എന്ന് വ്യക്തിപരമായി തെളിയിക്കാൻ പരാതിക്കാർക്ക് കഴിയുമോ എന്ന് കഴിഞ്ഞ ആഴ്ച ഒരു ജഡ്ജി ചോദിച്ചത് കമ്പനിക്ക് വലിയ ആശ്വാസമായിരുന്നു. എങ്കിലും വർഷങ്ങളായുള്ള അനിശ്ചിതത്വം അവസാനിപ്പിക്കാനാണ് കമ്പനി ഒത്തുതീർപ്പ് തിരഞ്ഞെടുത്തത്.

ഇതിനിടയിൽ ‘ടെക്‌സാസ് ടൂ-സ്റ്റെപ്പ്’ എന്നൊരു വിവാദ നിയമതന്ത്രവും കമ്പനി പരീക്ഷിച്ചിരുന്നു. ഇതിനായി ഒരു പുതിയ ഉപകമ്പനി രൂപീകരിച്ച് അത് പാപ്പരായതായി പ്രഖ്യാപിക്കുകയും, അതുവഴി കേസുകളെല്ലാം ഒരൊറ്റ ഒത്തുതീർപ്പിലേക്ക് മാറ്റാനുമായിരുന്നു ശ്രമം.

എന്നാൽ സാമ്പത്തികമായി മികച്ച നിലയിലുള്ള ഒരു കമ്പനി പാപ്പരത്ത നിയമങ്ങളെ ദുരുപയോഗം ചെയ്യുന്നുവെന്ന് കാണിച്ച് കോടതികൾ ഈ നീക്കം മൂന്ന് തവണ തള്ളി. ഇപ്പോൾ തയ്യാറാക്കിയിട്ടുള്ള ഒത്തുതീർപ്പ് വ്യവസ്ഥകൾ അന്തിമ തീരുമാനത്തിനായി പരാതിക്കാർക്ക് മുന്നിൽ വെക്കും.

അർഹരായ 76,000-ത്തോളം ആളുകളിൽ 95% പേർ ഇത് അംഗീകരിച്ചാൽ ഈ വമ്പൻ കേസിന് അവസാനമാകും. ഇല്ലെങ്കിൽ, വീണ്ടും വർഷങ്ങളോളം നീളുന്ന നിയമപോരാട്ടങ്ങൾ അമേരിക്കൻ കോടതികളിൽ കമ്പനി നേരിടേണ്ടി വരും.