ഊട്ടി-മേട്ടുപ്പാളയം ദേശീയപാതയിൽ പുനരുദ്ധാരണ പ്രവർത്തനങ്ങൾ ആരംഭിച്ചു

ഗൂഡല്ലൂർ മേഖലയിൽ മഴയുടെ തീവ്രത കുറഞ്ഞതിനെ തുടർന്ന് ഊട്ടി –മേട്ടുപ്പാളയം ദേശീയപാതയിൽ മണ്ണിടിച്ചിലുണ്ടായ ഭാഗങ്ങളിൽ അവശിഷ്ടങ്ങളും മരങ്ങളും നീക്കം ചെയ്യുന്ന പ്രവൃത്തികൾക്ക് തുടക്കമായി. ബർളിയാർ ചെക്ക്പോസ്റ്റിന് താഴെയുള്ള പ്രദേശങ്ങളിലെ ഗതാഗത തടസ്സങ്ങളാണ് പ്രധാനമായും നീക്കം ചെയ്തത്.

ദേശീയപാത അതോറിറ്റി ജീവനക്കാരുടെ നേതൃത്വത്തിലാണ് ഈ ജോലികൾ പുരോഗമിക്കുന്നത്. റോഡ് പൂർണ്ണമായി തകർന്ന ഭാഗങ്ങളിൽ സുരക്ഷ മുൻനിർത്തി മണൽച്ചാക്കുകൾ അടുക്കി വെച്ചിട്ടുണ്ട്.

പാതയിലേക്ക് വീണ കൂറ്റൻ മരങ്ങളും മുറിച്ചു മാറ്റിയിട്ടുണ്ട്. മണ്ണിടിച്ചിലിൽ അപകടത്തിൽപ്പെട്ട

ബസ് തമിഴ്നാട് ട്രാൻസ്പോർട്ട് കോർപറേഷന്റെ മേട്ടുപ്പാളയം ഡിപ്പോയിലേക്ക് മാറ്റിയിട്ടുണ്ട്. ബർളിയാർ ചെക്ക്പോസ്റ്റിന് മുകൾഭാഗത്തുള്ള റോഡ് വരും ദിവസങ്ങളിൽ ഗതാഗതയോഗ്യമാക്കുമെന്ന് അധികൃതർ അറിയിച്ചു.

മഴയുടെ സാഹചര്യം പൂർണ്ണമായും അനുകൂലമായാൽ ദേശീയപാതയിൽ രാത്രികാല ഗതാഗതം പുനഃസ്ഥാപിക്കുന്ന കാര്യം പരിഗണിക്കും. ഇതിനിടയിൽ, കൂനൂർ –മേട്ടുപ്പാളയം പൈതൃക ട്രെയിൻ സർവീസും താൽക്കാലികമായി നിർത്തിവെച്ചിരിക്കുകയാണ്.

റെയിൽവേ പാളങ്ങളിലെ തടസ്സങ്ങൾ നീക്കം ചെയ്യുന്നതിനുള്ള പ്രവർത്തനങ്ങളും ആരംഭിച്ചിട്ടുണ്ട്.