കൊച്ചി നെടുമ്പാശേരിയിൽ മൂന്ന് പേരുടെ ജീവഹാനിക്കിടയാക്കിയ ദാരുണമായ കാറപകടവുമായി ബന്ധപ്പെട്ട് കൂടുതൽ വിവരങ്ങൾ പുറത്തുവന്നു. മുഖ്യപ്രതിയായ സുഹൈൽ സജീവ് അപകടസമയത്ത് വാഹനം ഓടിച്ചിരുന്നത് മണിക്കൂറിൽ 160 കിലോമീറ്റർ വരെ വേഗതയിലായിരുന്നു എന്നാണ് അന്വേഷണത്തിൽ വ്യക്തമായിരിക്കുന്നത്.
സംഭവദിവസം വാഹനത്തിനകത്തുണ്ടായിരുന്ന സുഹൃത്തുക്കളുടെ മൊബൈൽ ഫോണിൽ പകർത്തപ്പെട്ട ദൃശ്യങ്ങളിലാണ് വാഹനം അതിഭയങ്കര വേഗതയിൽ പായുന്നതിന്റെ വിവരങ്ങളുള്ളത്.
എന്നാൽ, ഈ ദൃശ്യങ്ങൾ ഔദ്യോഗികമായി ഫോണിൽ ലഭ്യമാണോ എന്നത് സംബന്ധിച്ച് പൊലീസിന്റെ ഭാഗത്തുനിന്ന് ഔദ്യോഗിക സ്ഥിഡീകരണങ്ങൾ വന്നിട്ടില്ല. ഇതിനുപുറമെ, പ്രസ്തുത പ്രദേശത്തെ അമ്പതോളം സിസിടിവി ക്യാമറകളിൽ നിന്നുള്ള ദൃശ്യങ്ങൾ പരിശോധിച്ച് കാറിന്റെ വേഗത കൃത്യമായി തിട്ടപ്പെടുത്താനുള്ള തീവ്രശ്രമത്തിലാണ് അന്വേഷണ സംഘം.
വാഹനാപകടത്തിന്റെ ആഘാതവും വേഗതയും ശാസ്ത്രീയമായി കണ്ടെത്താനായി വാഹനത്തിന്റെ ഇവന്റ് ഡേറ്റ റെക്കോർഡർ അഥവാ ഇഡിആർ പരിശോധിക്കാൻ മുൻപ് തീരുമാനിച്ചിരുന്നു. എന്നാൽ അത്യാധുനിക സാങ്കേതികവിദ്യയ}, ഉപയോഗിക്കുന്ന വിദേശ നിർമ്മിത കാർ ആയതിനാൽ, ഇതിലെ ഡേറ്റ ശേഖരിക്കാൻ നിർമ്മാതാക്കളുടെ വിദഗ്ദ്ധർക്ക് മാത്രമേ സാധിക്കൂ എന്ന് കമ്പനി വ്യക്തമാക്കുകയായിരുന്നു.
തുടർന്ന് ഈ ഡേറ്റാ പരിശോധനയ്ക്കായി കാർ കമ്പനിയുടെ ജർമ്മൻ ആസ്ഥാനത്തേക്ക് അയച്ചിരിക്കുകയാണ്. പ്രതികളുടെ ജാമ്യാപേക്ഷ സെഷൻസ് കോടതി പരിഗണിക്കുന്ന വേളയിൽ കാറിന്റെ വേഗത സംബന്ധിച്ച നിർണ്ണായക വിവരങ്ങൾ അന്വേഷണ ഉദ്യോഗസ്ഥർ കോടതിയെ അറിയിക്കും.
ഈ മാസം 11-ാം തീയതി പുലർച്ചെ 1.41-നാണ് പ്രതികൾ സഞ്ചരിച്ച ആഡംബര കാർ സ്കൂട്ടറിൽ ഇടിക്കുന്നത്. പുലർച്ചെ 1.40 നും 1.41 നും ഇടയിലുള്ള വെറും 60 സെക്കൻഡ് സമയത്തിനുള്ളിൽ വാഹനത്തിന്റെ വേഗത മണിക്കൂറിൽ 140 കിലോമീറ്ററിൽ നിന്ന് 160 കിലോമീറ്റർ വരെ ഉയർന്നുവെന്നാണ് ദൃശ്യങ്ങൾ വിശകലനം ചെയ്തുകൊണ്ട് പൊലീസ് അനുമാനിക്കുന്നത്.
സംഭവത്തിൽ കൂട്ടുപ്രതികളായ നിനവ്, ജോയൽ, അമീർ എന്നിവരുടെ മൊബൈൽ ഫോണുകളും പൊലീസ് കസ്റ്റഡിയിലെടുത്ത് പരിശോധനയ്ക്ക് വിധേയമാക്കിയിരുന്നു. ഇതിലൊരു ഫോണിൽ നിന്നാണ് അപകട
ദിവസത്തെ മരണപ്പാച്ചിലിന്റെ ദൃശ്യങ്ങൾ കണ്ടെടുത്തത്. അപകടം വരുത്തുന്നതിന് തൊട്ടുമുമ്പും ഇതേ പാതയിലൂടെ ഇവർ വാഹനം അമിതവേഗതയിൽ ഓടിച്ചിരുന്നതായി തെളിഞ്ഞിട്ടുണ്ട്.
പ്രതിയായ സുഹൈൽ സജീവ് ഓടിച്ചിരുന്ന ആഡംബര കാറിടിച്ച് സ്കൂട്ടറിൽ സഞ്ചരിച്ചിരുന്ന വയനാട് സ്വദേശി ദേവിക, പാലക്കാട് സ്വദേശി ഗോപിക, സുള്ള്യ സ്വദേശി ഇയാസ് എന്നിവർ സംഭവസ്ഥലത്തുതന്നെ മരണപ്പെട്ടിരുന്നു. അപകടത്തെ തുടർന്ന് നാട്ടുകാർ ചേർന്ന് പ്രതിയെ പിടികൂടി പൊലീസിൽ ഏൽപ്പിക്കുകയായിരുന്നു.
വാഹനം ഓടിക്കുന്ന സമയത്ത് സുഹൈൽ കടുത്ത മദ്യലഹരിയിലായിരുന്നു എന്നത് മെഡിക്കൽ പരിശോധനയിലൂടെ വ്യക്തമായിട്ടുണ്ട്. നിയമപരമായി അനുവദനീയമായ അളവിനേക്കാൾ 5.3 ഇരട്ടി അധികം മദ്യം സുഹൈലിന്റെ ശരീരത്തിൽ ഉണ്ടായിരുന്നതായാണ് കണ്ടെത്തൽ.
നിലവിൽ കാക്കനാട് ജില്ലാ ജയിലിനോട് അനുബന്ധിച്ചുള്ള ബോസ്റ്റൽ സ്കൂളിൽ കഴിയുന്ന മുഖ്യപ്രതിയുടെയും മറ്റ് കൂട്ടുപ്രതികളുടെയും ജാമ്യാപേക്ഷ അങ്കമാലി മജിസ്ട്രേട്ട് കോടതി നേരത്തെ തള്ളിക്കളഞ്ഞിരുന്നു. തുടർന്ന് സമർപ്പിച്ച ജാമ്യാപേക്ഷ നിലവിൽ സെഷൻസ് കോടതിയുടെ പരിഗണനയിലാണ്.
