രാജ്യത്ത് ആർഎസ്എസ്-ബിജെപി അജണ്ട നടപ്പാക്കുന്നുവെന്ന് ഐഷി ഘോഷ്; കേന്ദ്രത്തിനെതിരെ രൂക്ഷ വിമർശനവുമായി പിണറായി വിജയനും

രാജ്യത്തെ പൊതുസ്വത്തുക്കൾ പൂർണ്ണമായി കോർപ്പറേറ്റുകൾക്ക് അടിയറവ് വെക്കാനുള്ള ഗൂഢപദ്ധതിയാണ് ആർഎസും ബിജെപിയും നടപ്പിലാക്കുന്നതെന്ന് ജെഎൻയു മുൻ വിദ്യാർത്ഥി യൂണിയൻ പ്രസിഡന്റും എസ്എഫ്ഐ നേതാവുമായ ഐഷി ഘോഷ് ആരോപിച്ചു. കർഷക സംഘം ഇടുക്കി ജില്ലാ സമ്മേളനത്തിന്റെ ഭാഗമായി സംഘടിപ്പിച്ച പൊതുസമ്മേളനത്തിൽ സംസാരിക്കവേയാണ് അവർ കേന്ദ്ര സർക്കാരിനെതിരെ കടന്നാക്രമണം നടത്തിയത്.

സമൂഹത്തെ ഭിന്നിപ്പിക്കുന്ന നിലപാടുകളാണ് കേന്ദ്ര ഭരണകൂടം സ്വീകരിക്കുന്നത്. രാജ്യത്ത് ഏവരുടെയും മൗലികാവകാശമായ വിദ്യാഭ്യാസം കഴിഞ്ഞ 12 വർഷമായി പെൺകുട്ടികൾക്ക് നിഷേധിക്കപ്പെടുന്ന ഭീതിജനകമായ അവസ്ഥയാണ് നിലവിലുള്ളതെന്നും ഐഷി കുറ്റപ്പെടുത്തി.

ഉന്നത വിദ്യാഭ്യാസ രംഗത്ത് വിദ്യാർത്ഥികൾക്ക് ലഭിച്ചുകൊണ്ടിരുന്ന സ്കോളർഷിപ്പുകൾ കേന്ദ്ര സർക്കാർ ഒന്നടങ്കം വെട്ടിച്ചുറയ്ക്കുകയോ പൂർണ്ണമായി നിർത്തലാക്കുകയോ ചെയ്തിരിക്കുകയാണ്. സർവ്വകലാശാലകളെയും ഉന്നത വിദ്യാഭ്യാസ സ്ഥാപനങ്ങളെയും കാവിവൽക്കരിക്കാനും സ്വന്തം രാഷ്ട്രീയ താല്പര്യങ്ങൾ നടപ്പിലാക്കാനും ബിജെപി ശ്രമിക്കുകയാണെന്നും അവർ കൂട്ടിച്ചേർത്തു.

ബിജെപി ഭരിക്കുന്ന വിവിധ സംസ്ഥാനങ്ങളിൽ വിദ്യാലയങ്ങളിലെ കുട്ടികൾക്ക് ഉച്ചഭക്ഷണം പോലും കൃത്യമായി ലഭിക്കാത്ത സാഹചര്യമാണുള്ളത്. ഈ കോർപ്പറേറ്റ് വൽക്കരണത്തിനും കാവിവൽക്കരണത്തിനുമെതിരെ വിദ്യാർത്ഥി സമൂഹവും ജനങ്ങളും ഒരുപോലെ മുന്നോട്ടുവന്ന് ശക്തമായ പ്രതിരോധം തീർക്കണമെന്നും അവർ ആവശ്യപ്പെട്ടു.

ചടങ്ങിന്റെ ഭാഗമായി കർഷക സംഘം ഇടുക്കി ജില്ലാ സമ്മേളനം ഉദ്ഘാടനം ചെയ്ത് സംസാരിച്ച നേതാവ് പിണറായി വിജയൻ കേന്ദ്ര സർക്കാരിനെതിരെയും കോൺഗ്രസിനെതിരെയും കടുത്ത വിമർശനങ്ങളാണ് ഉന്നയിച്ചത്. കോൺഗ്രസ് സർക്കാരുകൾ നടപ്പിലാക്കിയ ജനവിരുദ്ധ സാമ്പത്തിക നയങ്ങളുടെ തുടർച്ചയാണ് ബിജെപിയും പിന്തുടരുന്നത്.

ഇത് കർഷകർക്ക് അർഹമായ ആനുകൂല്യങ്ങൾ നിഷേധിക്കുകയും വൻകിട കോർപ്പറേറ്റുകളെ സഹായിക്കുകയും ചെയ്യുകയാണെന്ന് അദ്ദേഹം വ്യക്തമാക്കി.

സ്വാമിനാഥൻ കമ്മീഷൻ ശുപാർശകൾ നടപ്പിലാക്കുന്നതിൽ കോൺഗ്രസും ബിജെപിയും ഒരുപോലെ പരാജയപ്പെട്ടു. ഡൽഹിയിൽ കർഷകർ നടത്തിയ ചരിത്രപരമായ സമരത്തെ അടിച്ചമർത്താൻ കേന്ദ്ര ഭരണകൂടം സകല മാർഗ്ഗങ്ങളും തേടിയെങ്കിലും കർഷകരുടെ ഉറച്ച പോരാട്ടത്തിന് മുന്നിൽ ഒടുവിൽ മുട്ടുമടക്കാൻ അവർ നിർബന്ധിതരായി എന്നും പിണറായി ഓർമ്മിപ്പിച്ചു.

കേരളത്തിലെ യുഡിഎഫ് സർക്കാരിന്റെ ജനവിരുദ്ധ നയങ്ങൾക്കെതിരെയും അദ്ദേഹം രൂക്ഷ വിമർശനം ഉന്നയിച്ചു. കാർഷിക മേഖല നേരിടുന്ന ഗുരുതര പ്രതിസന്ധി പരിഹരിക്കാനോ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് ആവശ്യമായ ഫണ്ട് വകയിരുത്താനോ കേരള സർക്കാർ തയ്യാറാകുന്നില്ല.

വർഗീയ ശക്തികൾക്കെതിരെ വിട്ടുവീഴ്ചയില്ലാത്ത നിലപാട് സ്വീകരിക്കാൻ യുഡിഎഫ് പരാജയപ്പെടുന്നുവെന്നും ആർഎസ്എസിന്റെ വർഗീയ അജണ്ടകൾക്ക് കോൺഗ്രസ് അടിമപ്പെടുകയാണെന്നും അദ്ദേഹം കുറ്റപ്പെടുത്തി. സത്യപ്രതിജ്ഞാ വേളയിൽ വന്ദേമാതരം പൂർണ്ണമായി ആലപിച്ചത് ആർഎസ്എസ് അജണ്ടയുടെ ഭാഗമായാണ്.

സ്വാതന്ത്ര്യദിനത്തിൽ വന്ദേമാതരം പൂർണ്ണമായി ചൊല്ലണമെന്ന് കേരളത്തിൽ മാത്രമാണ് പ്രത്യേക സർക്കുലർ ഇറക്കിയത്. എന്നാൽ ശക്തമായ പ്രതിഷേധം ഉയർന്നതിനെ തുടർന്ന് ഇത് പിൻവലിക്കാൻ സർക്കാർ തയ്യാറായി.

ഇത്തരം അപകടകരമായ രാഷ്ട്രീയ നിലപാടുകളിലൂടെ കോൺഗ്രസ് എത്തിച്ചേരുന്നത് വലിയ വിപത്തിലേക്കാണെന്നും അദ്ദേഹം മുന്നറിയിപ്പ് നൽകി. വിഴിഞ്ഞം പദ്ധതിയുടെ പ്രവർത്തന വേഗത കുറഞ്ഞത് എൽഡിഎഫ് സർക്കാരിന്റെ നയം കൊണ്ടാണെന്ന മുഖ്യമന്ത്രി വി ഡി സതീശന്റെ പ്രസ്താവനയെയും പിണറായി ശക്തമായി ഖണ്ഡിച്ചു.

മുൻകാലങ്ങളിൽ വിഴിഞ്ഞം പദ്ധതിയെ എതിർക്കാൻ മുന്നിൽ നിന്ന വ്യക്തിയാണ് ഇപ്പോൾ ഇത്തരം വസ്തുതാവിരുദ്ധമായ പ്രസ്താവനകൾ നടത്തുന്നതെന്നും, ഇത് വഴി മുഖ്യമന്ത്രി സ്വയം പരിഹാസ്യനാവുകയാണെന്നും അദ്ദേഹം കൂട്ടിച്ചേർത്തു.