ഡൽഹി വിമാനത്താവളത്തിൽ ഗുരുതര സുരക്ഷാ വീഴ്ച; ഇമിഗ്രേഷൻ പരിശോധനയില്ലാതെ മൂന്ന് ഇറ്റാലിയൻ പൗരന്മാർ രാജ്യം വിട്ടു

രാജ്യത്തിന്റെ സുരക്ഷാ സംവിധാനങ്ങളെ വെട്ടിച്ചു കൊണ്ട് ഇമിഗ്രേഷൻ പരിശോധനകൾ പൂർത്തിയാക്കാതെ മൂന്ന് ഇറ്റാലിയൻ പൗരന്മാർ ഡൽഹിയിൽനിന്ന് വിമാനമാർഗ്ഗം മ്യൂണിക്കിലേക്ക് കടന്നുകളഞ്ഞു. സംഭവത്തിൽ പ്രമുഖ വിമാനക്കമ്പനിയായ എയർ ഇന്ത്യയ്ക്ക് ഗുരുതരമായ വീഴ്ചയാണ് സംഭവിച്ചിട്ടുള്ളത്.

ഈ പശ്ചാത്തലത്തിൽ കേന്ദ്ര സിവിൽ വ്യോമയാന മന്ത്രാലയം വിഷയത്തിൽ അടിയന്തരമായി ഇടപെടുകയും എയർ ഇന്ത്യയോട് ഔദ്യോഗികമായി വിശദീകരണം തേടുകയും ചെയ്തിട്ടുണ്ട്. ലഭിച്ച നിർദ്ദേശപ്രകാരം ഏഴ് ദിവസത്തിനുള്ളിൽ കമ്പനി കേന്ദ്രത്തിന് കൃത്യമായ മറുപടി നൽകേണ്ടതുണ്ട്.

കഴിഞ്ഞ സെപ്റ്റംബർ 4 നാണ് രാജ്യത്തെ ഞെട്ടിച്ച ഈ സുരക്ഷാ വീഴ്ചയുണ്ടായത്. പുലർച്ചെ 12.50 ഓടെ അമൃത്‌സറിൽ നിന്നും ഡൽഹിയിലേക്ക് സർവീസ് നടത്തിയ എയർ ഇന്ത്യയുടെ എഐ–1115 വിമാനത്തിലാണ് ഈ മൂന്ന് വിദേശ പൗരന്മാരും ഡൽഹിയിലെത്തിയത്.

തുടർന്ന് വെറും ഒരു മണിക്കൂറിനുള്ളിൽ, അതായത് പുലർച്ചെ 1.45 നടുപ്പിച്ച് മ്യൂണിക്കിലേക്ക് പുറപ്പെട്ട ലുഫ്താൻസയുടെ എൽഎഫ്0763 വിമാനത്തിൽ ഇവർ യാതൊരു തടസ്സവുമില്ലാതെ കയറിപ്പോവുകയായിരുന്നു.

ഇന്ത്യ വിടുന്നതിന് മുന്നോടിയായി നിർബന്ധമായും പാലിക്കേണ്ട നിയമപരമായ യാതൊരു ഇമിഗ്രേഷൻ പരിശോധനയ്ക്കും ഇവർ വിധേയരായിരുന്നില്ല എന്നത് ഗുരുതരമായ സുരക്ഷാ പ്രശ്നങ്ങളിലേക്കാണ് വിരൽ ചൂണ്ടുന്നത്.

ചെറിയ വിമാനത്താവളങ്ങളിൽ നിന്നുള്ള യാത്രക്കാരെ പ്രധാന ഹബ്ബുകളിലെത്തിക്കുന്ന എയർ ഇന്ത്യയുടെ ഹബ് ആൻഡ് സ്പോക് സംവിധാനം ഉപയോഗിച്ചാണ് ഇവർ യാത്ര ചെയ്തതെന്ന് വ്യോമയാന മന്ത്രാലയം പുറത്തിറക്കിയ നോട്ടീസിൽ വ്യക്തമാക്കുന്നുണ്ട്. യാത്രക്കാർക്ക് ആഭ്യന്തര യാത്രയ്ക്കുള്ള ബോർഡിങ് പാസുകളാണ് നൽകേണ്ടിയിരുന്നതെങ്കിലും, അമൃത്‌സറിൽ വെച്ചുതന്നെ ഇവർക്ക് മ്യൂണിക്കിലേക്കുള്ള രാജ്യാന്തര വിമാനത്തിന്റെ ബോർഡിങ് പാസുകൾ കൂടി കൈമാറിയിരുന്നു.

ഈ നടപടിയാണ് ഇപ്പോൾ കേന്ദ്ര സർക്കാർ മുഖവിലയ്‌ക്കെടുത്ത് ചോദ്യം ചെയ്തിരിക്കുന്നത്. രാജ്യാന്തര യാത്രക്കാർക്ക് ‘ഐ’ ബോർഡിങ് പാസും ആഭ്യന്തര യാത്രക്കാർക്ക് ‘ഡി’ ബോർഡിങ് പാസും എന്ന രണ്ട് തരത്തിലുള്ള പാസുകൾ നൽകാൻ മാത്രമാണ് എയർ ഇന്ത്യയ്ക്ക് അനുവാദമുള്ളത്.

ഡൽഹിയിൽ വിമാനമിറങ്ങിയ ഈ ഇറ്റാലിയൻ പൗരന്മാരെ രാജ്യാന്തര യാത്രക്കാരായി പരിഗണിച്ച് ആഭ്യന്തര യാത്രക്കാരുടെ റൂട്ടിൽ നിന്ന് മാറ്റി കൃത്യമായി ഇമിഗ്രേഷൻ വിഭാഗത്തിലേക്ക് അയക്കേണ്ടതായിരുന്നു. എന്നാൽ ഇതിന് വിരുദ്ധമായി യാത്രക്കാരെ യാതൊരു പരിശോധനയുമില്ലാതെ നേരിട്ട് 39ാം ഗേറ്റിലേക്ക് എത്തിക്കുകയാണുണ്ടായത്.

ഫലത്തിൽ ഇമിഗ്രേഷൻ നടപടികൾ ഒന്നും തന്നെ നേരിടാതെ ഇവർക്ക് വിദേശത്തേക്ക് പറക്കാനാ1യി.