1982-ൽ ഡൽഹി വേദിയായ ഏഷ്യൻ ഗെയിംസിന്റെ ഔദ്യോഗിക ഭാഗ്യചിഹ്നമായിരുന്നു അപ്പു എന്ന കുട്ടിയാന. ഗെയിംസിനായി രാജ്യത്തുടനീളം നടത്തിയ തെരച്ചിലിൽ ഒടുവിൽ ഗുരുവായൂർ ദേവസ്വത്തിന്റെ കുട്ടിക്കൊമ്പനായ കുട്ടിനാരായണൻ തെരഞ്ഞെടുക്കപ്പെട്ടു.
ഇതോടെ കുട്ടിനാരായണൻ എന്ന പേര് മാറി ‘ഏഷ്യാഡ് അപ്പു’ എന്നറിയപ്പെടാൻ തുടങ്ങി. 1980-ൽ പാലക്കാട് സ്വദേശിയായ കെ.കെ.
നാരായണൻ നായർ ഗുരുവായൂരപ്പന് നടയിരുത്തിയ ആനയായിരുന്നു ഇദ്ദേഹം. അന്ന് മൂന്ന് വയസ്സ് മാത്രം പ്രായമുണ്ടായിരുന്ന അപ്പുവിനെ, പാപ്പാൻ ശെൽവനൊപ്പം ട്രെയിൻ മാർഗ്ഗമാണ് ഡൽഹിയിലേക്ക് കൊണ്ടുപോയത്.
തൃശൂരിൽ നിന്ന് യാത്ര തിരിച്ച 34 ആനകളിൽ അപ്പുവും ഉൾപ്പെട്ടിരുന്നു. ഉദ്ഘാടന വേദിയിൽ ഹെലികോപ്റ്ററിൽ നിന്നുള്ള പുഷ്പവൃഷ്ടി അപ്പുവിന് ലഭിച്ചത് വലിയ ശ്രദ്ധയാകർഷിച്ചിരുന്നു.
ഡൽഹിയിൽ നിന്ന് തിരിച്ചെത്തിയതോടെ പുന്നത്തൂർ കോട്ടയിൽ സന്ദർശകരുടെ പ്രവാഹമായിരുന്നു. എന്നാൽ അപ്പു വളർന്നപ്പോൾ കൊമ്പുകൾക്ക് പകരം തേറ്റകളാണ് മുളച്ചത്.
ആന മോഴയാണെന്ന് തിരിച്ചറിഞ്ഞതോടെ ആരാധകരുടെ താൽപ്പര്യം കുറഞ്ഞു. ഇത് അപ്പുവിന്റെ സ്വഭാവത്തിലും വലിയ മാറ്റങ്ങൾ വരുത്തി.
1992-ൽ വടക്കാഞ്ചേരിക്കടുത്ത് പറയെടുപ്പിനിടെ ഇടഞ്ഞോടിയ അപ്പു ഒരു പൊട്ടക്കിണറ്റിൽ വീഴുകയുണ്ടായി. ഒന്നര ദിവസത്തെ കഠിനമായ പരിശ്രമത്തിനൊടുവിൽ പുറത്തെടുത്ത ആനയുടെ മുൻകാലുകൾക്ക് ഗുരുതരമായി പരിക്കേറ്റിരുന്നു.
ചികിത്സയ്ക്ക് ശേഷവും കാലുകൾക്ക് വൈകല്യം സംഭവിച്ചത് അപ്പുവിനെ കൂടുതൽ അക്രമാസക്തനാക്കി. പാപ്പാന്മാരെ ആക്രമിക്കുന്നത് പതിവായതോടെ അപ്പുവിനെ പുറത്തിറക്കുന്നത് ദേവസ്വം അവസാനിപ്പിച്ചു.
തുടർന്ന് വർഷങ്ങളോളം ദേവസ്വം നൽകിയ പരിചരണത്തിൽ കഴിഞ്ഞ അപ്പു, 2005 മേയ് 13-ന് ഉച്ചയോടെ പനിയും പാദരോഗവും ബാധിച്ച് കിടപ്പിലായി. ചികിത്സകൾ ഫലം കാണാതെ വന്നതോടെ 2005 മേയ് 14-ന് ഈ കൊമ്പൻ ചരിഞ്ഞു.
പ്രശസ്തിയുടെ തിളക്കത്തിൽ നിന്ന് ദുരന്തത്തിലേക്ക് വീണുപോയ ഒരു ജീവിതത്തിന്റെ അന്ത്യമായിരുന്നു അത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
