നീറ്റ് പുനഃപരീക്ഷാ കേന്ദ്രം മാറ്റിയ സംഭവം: നാഗ്പുർ സ്വദേശിയായ വിദ്യാർഥി തന്നെ മാറ്റം വരുത്തിയതെന്ന് എൻടിഎ

നീറ്റ് പുനഃപരീക്ഷയുമായി ബന്ധപ്പെട്ട് ഉയർന്നു വന്ന വിവാദങ്ങളിൽ നിർണായക വെളിപ്പെടുത്തലുമായി നാഷണൽ ടെസ്റ്റിംഗ് ഏജൻസി (എൻടിഎ). നാഗ്പുർ സ്വദേശിയായ വിദ്യാർഥിക്ക് പരീക്ഷാ കേന്ദ്രമായി അബുദാബി അനുവദിച്ചു എന്ന പരാതിയിൽ എൻടിഎ അന്വേഷണം പൂർത്തിയാക്കി.

പരീക്ഷാ കേന്ദ്രം മാറ്റാൻ അപേക്ഷിച്ചത് വിദ്യാർഥി തന്നെയാണെന്ന് എൻടിഎ ശനിയാഴ്ച ഔദ്യോഗികമായി അറിയിച്ചു. തനിക്ക് അനുവദിച്ച പരീക്ഷാ കേന്ദ്രം അബുദാബി ആയതിൽ അപാകതയുണ്ടെന്ന് കാണിച്ച് വിദ്യാർഥിയുടെ പിതാവ് **അബ്ദുല്ല താലിബ്** രംഗത്തെത്തിയിരുന്നു.

നാഗ്പുരിലെ വർധ, ഭൻദാര എന്നീ കേന്ദ്രങ്ങളാണ് തങ്ങൾ തിരഞ്ഞെടുത്തിരുന്നതെന്നായിരുന്നു പിതാവിന്റെ വാദം. എന്നാൽ, ഈ വാദങ്ങളെ പൂർണമായും തള്ളിക്കൊണ്ടാണ് എൻടിഎ കണക്കുകൾ നിരത്തുന്നത്.

മേയ് മൂന്നിന് നടന്ന പരീക്ഷയ്ക്കായി അഡ്മിറ്റ് കാർഡ് ഡൗൺലോഡ് ചെയ്ത അതേ ഐപി അഡ്രസിൽ നിന്നാണ് പുനഃപരീക്ഷയ്ക്കുള്ള പരീക്ഷാ കേന്ദ്രവും മാറ്റം വരുത്തിയിട്ടുള്ളതെന്ന് എൻടിഎ വ്യക്തമാക്കി. ഇത് സംബന്ധിച്ച് അധികൃതരുടെ വിശദീകരണം ഇങ്ങനെ: “മേയ് 21ന് വിദ്യാർഥി എൻടിഎ പോർട്ടലിൽ ലോഗിൻ ചെയ്യുകയും പരീക്ഷാകേന്ദ്രത്തിന്റെ ആദ്യ ചോയ്സ് അബുദാബി എന്നും രണ്ടാമത്തേത് ദുബായ് എന്നും മാറ്റിയിട്ടുണ്ട്.

മേയ് 3നുള്ള പരീക്ഷയ്ക്ക് അഡ്മിറ്റ് കാർഡ് ഡൗൺലോഡ് ചെയ്ത അതേ ഐപി അഡ്രസിൽ നിന്നാണ് ഈ മാറ്റവും ചെയ്തിട്ടുള്ളത്. ഇത് നാഗ്പുരിൽ ഉള്ളതാണ്.” ജൂൺ 16ന് പുതിയ അഡ്മിറ്റ് കാർഡ് ഡൗൺലോഡ് ചെയ്ത ശേഷവും ഇതുമായി ബന്ധപ്പെട്ട

പരാതികളൊന്നും വിദ്യാർഥിയോ രക്ഷിതാക്കളോ ഉന്നയിച്ചിരുന്നില്ല. പരീക്ഷയ്ക്ക് തലേദിവസം മാത്രമാണ് പിതാവ് പരാതിയുമായി മാധ്യമങ്ങളെ സമീപിച്ചത്.

നിലവിൽ വിദ്യാർഥിക്ക് നാഗ്പുരിൽ തന്നെ പരീക്ഷാ കേന്ദ്രം അനുവദിച്ചിട്ടുണ്ട്. എങ്കിലും, എൻടിഎ പോർട്ടലിൽ നടന്ന ഈ മാറ്റം വിദ്യാർഥി തന്നെയാണോ ചെയ്തത്, അതോ ആരെങ്കിലും വിവരങ്ങൾ ചോർത്തി കൃത്രിമം കാണിച്ചതാണോ എന്ന കാര്യത്തിൽ സൈബർ വിഭാഗം അന്വേഷണം നടത്തിവരികയാണെന്ന് എൻടിഎ അറിയിച്ചു.