ടൊറന്റോയിൽ നടക്കുന്ന 2026 ഫിഫ ലോകകപ്പ് ഗ്രൂപ്പ് ഇ പോരാട്ടത്തിൽ നാല് തവണ ലോകചാമ്പ്യന്മാരായ ജർമ്മനിക്കെതിരെ ഐവറി കോസ്റ്റിന് അപ്രതീക്ഷിത ലീഡ്. ടൊറന്റോ സ്റ്റേഡിയത്തിൽ പുരോഗമിക്കുന്ന മത്സരത്തിന്റെ ആദ്യ പകുതി അവസാനിക്കുമ്പോൾ ഒരു ഗോളിന്റെ മുൻതൂക്കവുമായാണ് ഐവറി കോസ്റ്റ് കളം നിറയുന്നത്.
മത്സരത്തിന്റെ 30-ാം മിനിറ്റിൽ ടീം ക്യാപ്റ്റൻ ഫ്രാങ്ക് കെസ്സി തൊടുത്തുവിട്ട തകർപ്പൻ ഗോളാണ് ഐവറി കോസ്റ്റിന് മുൻതൂക്കം നൽകിയത്.
മത്സരത്തിന്റെ തുടക്കത്തിൽ തന്നെ ജർമ്മൻ നിരയിൽ പരിക്കിന്റെ ആശങ്ക ഉയർന്നിരുന്നു. 15-ാം മിനിറ്റിൽ ഡിഫെൻഡർ നിക്കോ ഷ്ലോട്ടർബെക്ക് പരിക്കേറ്റതിനെത്തുടർന്ന് അല്പനേരം കളം വിട്ടെങ്കിലും, പ്രാഥമിക ചികിത്സയ്ക്ക് ശേഷം അദ്ദേഹം തിരികെ മടങ്ങിയെത്തി.
ആക്രമണ ഫുട്ബോൾ പുറത്തെടുക്കാൻ ശ്രമിച്ച ജർമ്മനിക്ക് തുടക്കം മുതൽ തന്നെ തിരിച്ചടികൾ നേരിട്ടു. 21-ാം മിനിറ്റിൽ അലക്സാണ്ടർ പാവ്ലോവിച്ച് പന്ത് വലയിലാക്കിയെങ്കിലും, ഗോൾകീപ്പറെ ഫൗൾ ചെയ്തുവെന്ന് വിഎആർ (VAR) പരിശോധനയിൽ തെളിഞ്ഞതിനെത്തുടർന്ന് റഫറി ഗോൾ നിഷേധിച്ചു.
തുടർന്ന് 39-ാം മിനിറ്റിൽ ബോക്സിന് സമീപത്തുവെച്ച് ജർമ്മനിയുടെ ഫ്ലോറിയൻ വിർട്സ്, ഐവറി കോസ്റ്റ് താരം ഒഡിലോൺ കോസൗനുവിനെ ഫൗൾ ചെയ്തതും ജർമ്മനിക്ക് തിരിച്ചടിയായി. ഇതേത്തുടർന്ന് ഹാവെർട്സ് നേടിയ ഗോളും റഫറി അനുവദിച്ചില്ല.
ഗ്രൂപ്പ് ഇ-യിലെ നിർണ്ണായക പോരാട്ടമാണിത്. ആദ്യ മത്സരത്തിൽ കുറസാവോയെ 7-1 എന്ന സ്കോറിന് തകർത്ത ജർമ്മനിയും, ഇക്വഡോറിനെ 1-0 ന് തോൽപ്പിച്ച ഐവറി കോസ്റ്റും തമ്മിലുള്ള ഈ പോരാട്ടത്തിൽ വിജയിക്കുന്ന ടീമിന് റൗണ്ട് ഓഫ് 32-ലേക്ക് നേരിട്ട് യോഗ്യത ഉറപ്പാക്കാം.
ലീഡ് നിലനിർത്താൻ ഐവറി കോസ്റ്റും സമനിലയ്ക്കും വിജയത്തിനുമായി ജർമ്മനിയും ശ്രമിക്കുന്നതോടെ മത്സരം കൂടുതൽ വാശിയേറിയ ഘട്ടത്തിലേക്ക് കടക്കുകയാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
