ഹോർമുസ് സമാധാന നീക്കങ്ങൾ: ഇസ്രയേലിന് യുഎസ് വൈസ് പ്രസിഡന്റിന്റെ മുന്നറിയിപ്പ്; ക്രൂഡ് ഓയിൽ വിപണിയിൽ നേരിയ ആശ്വാസം

ഹോർമുസ് കടലിടുക്കിലെ സമാധാന ശ്രമങ്ങളെ അട്ടിമറിക്കുന്ന നിലപാട് സ്വീകരിക്കരുതെന്ന് ഇസ്രയേലിന് കർശന താക്കീതുമായി യുഎസ് വൈസ് പ്രസിഡന്റ് ജെ.ഡി.വാൻസ് രംഗത്തെത്തി. അമേരിക്ക ഇസ്രയേലിന്റെ വിശ്വസ്ത പങ്കാളിയാണെന്നും എന്നാൽ മേഖലയിലെ സംഘർഷങ്ങൾ അവസാനിപ്പിക്കാനുള്ള നയപരമായ നീക്കങ്ങളെ തടസ്സപ്പെടുത്താൻ അനുവദിക്കില്ലെന്നും അദ്ദേഹം വ്യക്തമാക്കി.

വാൻസിന്റെ ഈ ഇടപെടൽ ആഗോള സമ്പദ്‌വ്യവസ്ഥയ്ക്കും ക്രൂഡ് ഓയിൽ വിപണിക്കും വലിയ ആശ്വാസമാണ് പകർന്നിരിക്കുന്നത്. സ്വിറ്റ്‌സർലൻഡിലെ ലുസേനിന് സമീപമുള്ള സ്റ്റാൻസ്റ്റാഡിൽ വെച്ച് നടത്താനിരുന്ന യുഎസ്-ഇറാൻ സമാധാനക്കരാർ ഒപ്പുവെക്കൽ ചടങ്ങ് ലെബനനിലെ ഇസ്രയേൽ ആക്രമണത്തെത്തുടർന്ന് അനിശ്ചിതത്വത്തിലായിരുന്നു.

ആക്രമണത്തിൽ 40ലേറെ പേർ കൊല്ലപ്പെട്ട പശ്ചാത്തലത്തിൽ, കരാർ പ്രാവർത്തികമാകുമോ എന്ന ആശങ്കയിലാണ് ഇറാൻ പിന്മാറിയത്.

ഇതോടെ ജെ.ഡി.വാൻസും ഇറാൻ പാർലമെന്റ് സ്പീക്കർ മുഹമ്മദ് ബഖേർ ഖാലിബാഫും സ്വിറ്റ്‌സർലൻഡിലേക്കുള്ള തങ്ങളുടെ യാത്ര റദ്ദാക്കിയിരുന്നു. ഈ പ്രതിസന്ധിക്ക് ശേഷമാണ് ക്രൂഡ് ഓയിൽ വിലയിൽ നേരിയ വ്യതിയാനം ഉണ്ടായത്.

നിലവിൽ യുഎസ് ക്രൂഡ് (ഡബ്ല്യുടിഐ) വില 0.91% വർധിച്ച് 76.54 ഡോളറിലും, ബ്രെന്റ് ക്രൂഡ് 0.90% ഉയർന്ന് 80.57 ഡോളറിലുമാണ് വ്യാപാരം നടക്കുന്നത്. ഹോർമുസിലൂടെയുള്ള കപ്പൽ ഗതാഗതം
ഇറാൻ-യുഎസ് വെടിനിർത്തൽ ധാരണയുടെ ഭാഗമായി ഹോർമുസ് കടലിടുക്ക് വഴി കടന്നുപോകുന്ന കപ്പലുകളുടെ എണ്ണത്തിൽ ശ്രദ്ധേയമായ വർധനയുണ്ട്.

നിലവിൽ 25ഓളം കപ്പലുകളാണ് ഈ പാതയിലൂടെ സുഗമമായി സഞ്ചരിച്ചത്. ഇതിൽ ഖത്തറിൽ നിന്നുള്ള എൽഎൻജി കപ്പലുകളും ഉൾപ്പെടുന്നു.

അടുത്ത 60 ദിവസത്തേക്ക് കപ്പലുകളെ തടയില്ലെന്ന് ഇറാൻ ഉറപ്പുനൽകിയതോടെ ഇന്ധന വിപണിയിൽ പ്രതീക്ഷ വർധിച്ചിട്ടുണ്ട്. ഓഹരി വിപണിയിലെ തളർച്ച
ഐടി ഓഹരികളിലുണ്ടായ വിൽപന സമ്മർദവും സമാധാന കരാറിലെ അനിശ്ചിതത്വവും ഇന്ത്യൻ ഓഹരി വിപണിയെ ബാധിച്ചു.

ആക്സഞ്ചറിന്റെ വരുമാന വളർച്ചാ പ്രവചനത്തിലെ കുറവ് ഐടി മേഖലയിലെ ഓഹരികളെ പ്രതികൂലമായി ബാധിച്ചതോടെ സെൻസെക്സും നിഫ്റ്റിയും 0.78% നഷ്ടത്തിലാണ് വ്യാപാരം അവസാനിപ്പിച്ചത്. സ്വർണ വിലയിലും ഇടിവ് ദൃശ്യമാണ്; രാജ്യാന്തര വിപണിയിൽ ഔൺസിന് 70 ഡോളർ കുറഞ്ഞ് 4155 ഡോളറിലാണ് സ്വർണം നിൽക്കുന്നത്.

നയതന്ത്ര നീക്കങ്ങൾ തുടരുന്നു
യുഎസും ഇറാനും തമ്മിലുള്ള കരാറിൽ ഇസ്രയേലോ ഹിസ്ബുല്ലയോ കക്ഷികളല്ലെങ്കിലും, എല്ലാ യുദ്ധമുഖങ്ങളിലും വെടിനിർത്തൽ വേണമെന്ന നിബന്ധന ലംഘിക്കപ്പെട്ടതാണ് കരാറിനെ ബാധിച്ചത്. കരാർ പാലിക്കാൻ യുഎസിന് കഴിയില്ലെന്നാരോപിച്ച് ഇറാൻ രംഗത്തെത്തിയെങ്കിലും, ചർച്ചകൾക്ക് ഇപ്പോഴും സന്നദ്ധമാണെന്ന് ഇറാൻ ഡെപ്യൂട്ടി വിദേശകാര്യ മന്ത്രി സയീദ് ഖാതിഫ്സാദേ അറിയിച്ചിട്ടുണ്ട്.

അതേസമയം, കരാർ വ്യവസ്ഥകൾ പാലിക്കപ്പെട്ടില്ലെങ്കിൽ കടുത്ത പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകി. ചർച്ചകൾക്കായി ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫ് സ്വിറ്റ്‌സർലൻഡിലേക്ക് ഉടൻ തിരിച്ചെത്തുമെന്നാണ് വിവരം.

മനുഷ്യാവകാശ വിഷയത്തിൽ ഫ്രാൻസിന്റെ നിലപാടിനെ ഇറാൻ വിദേശകാര്യ വക്താവ് ഇസ്മയിൽ ബാഗേയ് രൂക്ഷമായി വിമർശിച്ചു. ഇറാനിലെ സാധാരണക്കാരെക്കുറിച്ച് ആശങ്ക പ്രകടിപ്പിക്കുന്ന ഫ്രാൻസ്, തങ്ങളുടെ രാഷ്ട്രീയ ലക്ഷ്യങ്ങൾക്ക് വേണ്ടി മാത്രമാണ് പ്രതികരിക്കുന്നതെന്നും ഇറാന് നേരെയുള്ള ആക്രമണങ്ങളിൽ അവർ മൗനം പാലിച്ചുവെന്നും അദ്ദേഹം ആരോപിച്ചു.