തെരുവുനായ ശല്യം: കൊച്ചി കോർപറേഷനിൽ നടപടികൾ കർശനമാക്കുന്നു; ബ്രഹ്മപുരത്ത് അത്യാധുനിക ഷെൽറ്റർ ഒരുങ്ങുന്നു

നഗരത്തിൽ വർധിച്ചുവരുന്ന തെരുവുനായ ശല്യം നിയന്ത്രിക്കുന്നതിന്റെ ഭാഗമായി സുപ്രീം കോടതിയുടെ പുതിയ ഉത്തരവുകൾ കർശനമായി നടപ്പിലാക്കാൻ കൊച്ചി കോർപറേഷൻ തീരുമാനിച്ചു. അനിമൽ ബർത്ത് കൺട്രോൾ (എബിസി) ചട്ടങ്ങൾ പൂർണമായും പാലിച്ചുകൊണ്ട് നായ നിയന്ത്രണ നടപടികൾ വേഗത്തിലാക്കാനാണ് ഭരണസമിതിയുടെ തീരുമാനം.

ഇതിനായി നിലവിലുള്ള ജീവനക്കാരുടെ അപര്യാപ്തത പരിഹരിക്കാൻ കരാറടിസ്ഥാനത്തിൽ കൂടുതൽ ലൈസൻസുള്ളവരെ നിയമിക്കുമെന്ന് അധികൃതർ അറിയിച്ചു. വിഷയം വരാനിരിക്കുന്ന കൗൺസിൽ യോഗത്തിൽ അജണ്ടയായി ഉൾപ്പെടുത്തിയിട്ടുണ്ട്.

പദ്ധതിയുടെ ഭാഗമായി ബ്രഹ്മപുരത്ത് കണ്ടെത്തിയ നാല് ഏക്കർ ഭൂമിയിൽ, ആദ്യഘട്ടമെന്ന നിലയിൽ ഒരേക്കർ സ്ഥലത്ത് അത്യാധുനിക സൗകര്യങ്ങളോട് കൂടിയ ഷെൽറ്റർ നിർമ്മിക്കാൻ ഭരണകൂടം മുൻഗണന നൽകും. ദേശീയ മൃഗക്ഷേമ ബോർഡിന്റെ മാനദണ്ഡങ്ങൾ അനുസരിച്ചായിരിക്കും ഈ കേന്ദ്രം പ്രവർത്തിക്കുക.

ഷെൽറ്ററിന്റെ നിർമ്മാണത്തിനായി പരിസ്ഥിതി സൗഹൃദ ഡിസൈനുകൾ ക്ഷണിക്കുമെന്നും, മികച്ച ഡിസൈൻ സമർപ്പിക്കുന്നവർക്ക് 50,000 രൂപ പാരിതോഷികം നൽകുമെന്നും കോർപറേഷൻ വ്യക്തമാക്കി. നായ്ക്കളെ ദത്തെടുക്കാനുള്ള സൗകര്യങ്ങൾ ഒരുക്കുന്നതിനൊപ്പം, അവയുടെ ഭക്ഷണം, പരിചരണം എന്നിവ ഉറപ്പുവരുത്തുന്നതിനായി വൻ തുക വകയിരുത്തേണ്ടി വരുമെന്നാണ് കോർപറേഷന്റെ കണക്കുകൂട്ടൽ.

ഇതിനായി വാർഷിക പദ്ധതി വിഹിതത്തിൽ കൂടുതൽ തുക നീക്കിവെക്കും. കൂടാതെ, കോർപറേഷൻ പരിധിക്ക് പുറത്ത് ബ്ലോക്ക് തലത്തിൽ ഷെൽറ്ററുകൾ സ്ഥാപിക്കുന്നതിനായി ഭൂമി കണ്ടെത്താനും നിർദേശം നൽകിയിട്ടുണ്ട്.

ഈ വിഷയത്തിൽ ആരോഗ്യ സ്ഥിരം സമിതി അധ്യക്ഷ സീന ഗോകുൽ പ്രതികരിച്ചത് ഇങ്ങനെയാണ്: “ജനങ്ങളെ ഏറ്റവുമധികം ബാധിക്കുന്ന വിഷയമാണ് തെരുവുനായ പ്രശ്നം. ബ്രഹ്മപുരത്ത് ഒരേക്കറിലെ ഷെൽറ്റർ പദ്ധതി വേഗത്തിലാക്കും.

ഇതിനായി ഫണ്ട് ലഭ്യമാക്കും. നായ്ക്കളെ ദത്തെടുക്കാനുള്ള ക്രമീകരണങ്ങൾ നടപ്പാക്കും.

ഭക്ഷണം പരിചരണം തുടങ്ങിയ കാര്യങ്ങൾക്കായി വലിയ തുകയാണു ചെലവു പ്രതീക്ഷിക്കുന്നത്.”