ആമസോണിൽ കൂട്ടപ്പിരിച്ചുവിടൽ തുടരുന്നു; എഐ വികസനത്തിന് വൻ നിക്ഷേപവുമായി മുന്നോട്ട്

ആഗോള സാങ്കേതിക ഭീമനായ ആമസോൺ തങ്ങളുടെ പ്രവർത്തനങ്ങളിൽ വലിയ മാറ്റങ്ങൾ വരുത്തുന്നതിന്റെ ഭാഗമായി കഴിഞ്ഞ എട്ടു മാസത്തിനിടെ ഏകദേശം 30,000 കോർപ്പറേറ്റ് ജീവനക്കാരെ പിരിച്ചുവിട്ടതായി റിപ്പോർട്ടുകൾ വ്യക്തമാക്കുന്നു. സിഇഓ ആൻഡി ജാസിയുടെ നേതൃത്വത്തിൽ കമ്പനിയെ കൂടുതൽ കാര്യക്ഷമമാക്കാനും ഭരണപരമായ നടപടിക്രമങ്ങളിലെ കാലതാമസം ഒഴിവാക്കാനും ലക്ഷ്യമിട്ടാണ് ഈ പിരിച്ചുവിടലുകൾ നടപ്പിലാക്കുന്നത്.

അതേസമയം, നിർമിത ബുദ്ധി അഥവാ ആർട്ടിഫിഷ്യൽ ഇന്റലിജൻസ് (AI) മേഖലയിൽ വൻതോതിലുള്ള നിക്ഷേപമാണ് കമ്പനി നടത്തിക്കൊണ്ടിരിക്കുന്നത്. വലിയ ഡാറ്റാ സെന്ററുകൾ, ക്ലൗഡ് കമ്പ്യൂട്ടിംഗ് ശേഷി, അത്യാധുനിക എഐ മോഡലുകൾ എന്നിവയ്ക്കായി ബില്യൺ കണക്കിന് ഡോളറുകളാണ് കമ്പനി ചെലവഴിക്കുന്നത്.

ആമസോൺ വെബ് സർവ്വീസ് (AWS) വഴിയാണ് ഈ വിപുലീകരണ പ്രവർത്തനങ്ങൾ ഏകോപിപ്പിക്കുന്നത്. ജീവനക്കാരെ പിരിച്ചുവിടുന്നതിനൊപ്പം എഐ സാങ്കേതികവിദ്യക്കായി പണം ചെലവഴിക്കുന്നതിനെതിരെ കമ്പനിക്കുള്ളിൽ തന്നെ വിമർശനങ്ങൾ ഉയരുന്നുണ്ട്.

സിയാറ്റിലിൽ നടന്ന സിറ്റി കൗൺസിൽ ഹിയറിംഗിൽ പങ്കെടുത്ത എൻജിനീയർമാർ ഡാറ്റാ സെന്ററുകളുടെ അനിയന്ത്രിതമായ വളർച്ചയിൽ ആശങ്ക പ്രകടിപ്പിച്ചു. തൊഴിൽ നഷ്ടപ്പെടുന്ന സാഹചര്യത്തിൽ എഐ ശേഷി വികസിപ്പിക്കാൻ കമ്പനി ഇത്രയധികം തുക ചെലവിടുന്നത് നീതിയല്ലെന്ന് അവർ വാദിക്കുന്നു.

ആമസോൺ വെബ് സർവ്വീസ് സോഫ്റ്റ്‌വെയർ എഞ്ചിനീയർ ആയ പാട്രിക് ഷ്ലോസർ ഇത് സംബന്ധിച്ച് പ്രതികരിക്കുമ്പോൾ, വലിയ ടെക് കമ്പനികൾ എഐ വികസനത്തിന് നൽകുന്ന അമിത പ്രാധാന്യമാണ് ഈ പിരിച്ചുവിടലുകൾ സൂചിപ്പിക്കുന്നത് എന്ന് വ്യക്തമാക്കി. ജീവനക്കാരുടെ അഭിപ്രായ സ്വാതന്ത്ര്യത്തെ മാനിക്കുന്നുവെന്നും അവരുടെ ആശങ്കകൾ പരിശോധിക്കുമെന്നും കമ്പനി വക്താക്കൾ അറിയിച്ചു.

മൈക്രോസോഫ്റ്റ്, ആൽഫബെറ്റ്, മെറ്റാ തുടങ്ങിയ പ്രമുഖ കമ്പനികളും ഈ മത്സരത്തിൽ സജീവമാണ്. ആഗോളതലത്തിൽ ഈ വർഷം മാത്രം എഐ മേഖലയിൽ 700 ബില്യൺ ഡോളർ വരെ നിക്ഷേപം എത്തുമെന്നാണ് വിലയിരുത്തൽ.

എന്നാൽ, ഈ വികസനം പരിസ്ഥിതി പ്രശ്നങ്ങൾക്കും വഴിയൊരുക്കുന്നുണ്ട്. ഡാറ്റാ സെന്ററുകൾക്ക് ആവശ്യമായ വലിയ തോതിലുള്ള വൈദ്യുതിയും വെള്ളവും ഉപയോഗപ്പെടുത്തുന്നതിനെതിരെ വിവിധയിടങ്ങളിൽ പ്രതിഷേധങ്ങൾ ശക്തമാണ്.

അമേരിക്കയിലെ 14 സംസ്ഥാനങ്ങളിൽ പുതിയ ഡാറ്റാ സെന്റർ പദ്ധതികൾക്ക് നിയന്ത്രണമോ താത്കാലിക വിലക്കോ ഏർപ്പെടുത്തുന്ന നിയമങ്ങൾ പരിഗണനയിലുണ്ട്. തൊഴിൽ സുരക്ഷയും സാങ്കേതിക വികസനവും പരിസ്ഥിതി സംരക്ഷണവും തമ്മിലുള്ള വലിയൊരു പോരാട്ടത്തിനാണ് ടെക് ലോകം സാക്ഷ്യം വഹിക്കുന്നത്.