കെഎസ്ആർടിസി ബസുകളിൽ സ്ത്രീകൾക്കായി സൗജന്യ യാത്ര അനുവദിക്കുന്ന പദ്ധതിയുടെ നടത്തിപ്പ് സംബന്ധിച്ച അന്തിമ തീരുമാനത്തിലേക്ക് സർക്കാർ കടക്കുന്നു. ഇതുസംബന്ധിച്ച കരട് രേഖ ഇന്നത്തെ മന്ത്രിസഭാ യോഗത്തിൽ ചർച്ചയാകും.
ഓർഡിനറി, ഫാസ്റ്റ് പാസഞ്ചർ ബസുകളിൽ പദ്ധതി നടപ്പിലാക്കാനാണ് നിലവിൽ ആലോചനയുള്ളത്. ഇതിനായി ഏകദേശം 90 കോടി രൂപയുടെ അധിക ചെലവാണ് പ്രതീക്ഷിക്കുന്നത്.
ഈ തുക എങ്ങനെ കണ്ടെത്തുമെന്നതിൽ മന്ത്രിസഭ വിശദമായ ചർച്ച നടത്തും. കൂടാതെ, റവന്യൂ ഉദ്യോഗസ്ഥൻ നവീൻ ബാബുവിന്റെ മരണവുമായി ബന്ധപ്പെട്ട
അന്വേഷണം സിബിഐക്ക് കൈമാറുന്ന കാര്യത്തിലും ഇന്നത്തെ യോഗം തീരുമാനമെടുക്കും. അതേസമയം, നിയമസഭയിൽ ഗവർണറുടെ നയപ്രഖ്യാപന പ്രസംഗത്തിന്മേലുള്ള നന്ദിപ്രമേയ ചർച്ച ഇന്ന് സമാപിക്കും.
രാവിലെ 9 മണിക്ക് അടിയന്തര പ്രമേയ നോട്ടീസോടെയാകും സഭാനടപടികൾ ആരംഭിക്കുക. പ്രതിപക്ഷ നേതാവിന്റെ മറുപടി പ്രസംഗവും അതിനുശേഷം മുഖ്യമന്ത്രിയുടെ മറുപടിയുമാണ് ഇന്നത്തെ പ്രധാന ആകർഷണം.
നയപ്രഖ്യാപന പ്രസംഗം ഒരു പുതുയുഗത്തിന്റെ തുടക്കമാണെന്ന് മുഖ്യമന്ത്രി നേരത്തെ അഭിപ്രായപ്പെട്ടിരുന്നു. എന്നാൽ, ഇതൊരു നയരാഹിത്യ പ്രസംഗമാണെന്നായിരുന്നു പ്രതിപക്ഷത്തിന്റെ നിലപാട്.
ഇന്നത്തെ സമ്മേളനത്തിന് ശേഷം സഭ പിരിയുകയും, 19-ാം തീയതി സംസ്ഥാന ബജറ്റ് അവതരണത്തിനായി വീണ്ടും ചേരുകയും ചെയ്യും. ജീവനക്കാരുടെ സ്ഥലം മാറ്റവുമായി ബന്ധപ്പെട്ട് പ്രതിപക്ഷം ഇന്നലെ സഭയിൽ വലിയ പ്രതിഷേധം ഉയർത്തിയിരുന്നു.
രാഷ്ട്രീയ വൈരാഗ്യം തീർക്കാൻ ഉദ്യോഗസ്ഥരെ സ്ഥലം മാറ്റുന്നുവെന്നാരോപിച്ച് വി ജോയ് ആണ് വിഷയം ഉന്നയിച്ചത്. 33 വകുപ്പുകളിലായി 207 ഉത്തരവുകൾ പുറത്തിറങ്ങുകയും, 310 വനിതകൾ ഉൾപ്പെടെയുള്ളവരെ ദൂരസ്ഥലങ്ങളിലേക്ക് സ്ഥലം മാറ്റുകയും ചെയ്തെന്ന് പ്രതിപക്ഷം ആരോപിച്ചു.
എന്നാൽ നിയമപരമായ മാനദണ്ഡങ്ങൾ പാലിച്ചാണ് സ്ഥലം മാറ്റം നടന്നതെന്ന് മന്ത്രി സണ്ണി ജോസഫ് സഭയിൽ വിശദീകരിച്ചു. പരാതികൾ ഉണ്ടെങ്കിൽ പരിശോധിക്കുമെന്നും അദ്ദേഹം വ്യക്തമാക്കി.
സണ്ണി ജോസഫിന്റെ ബന്ധുവിനെ പേഴ്സണൽ സ്റ്റാഫിൽ നിയമിച്ച വിഷയം പ്രതിപക്ഷം സഭയിൽ ഉയർത്തിയെങ്കിലും അദ്ദേഹം അതിന് മറുപടി നൽകിയില്ല.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
