സംസ്ഥാനത്തെ ഒട്ടുമിക്ക ജില്ലകളിലും രാത്രിയും തോരാമഴ തുടരുകയാണ്. ജനങ്ങളെ വലച്ചുകൊണ്ട് മഴക്കെടുതികൾ രൂക്ഷമായിരിക്കുകയാണ്.
നിലവിൽ എല്ലാ ജില്ലകളിലും യെലോ അലർട്ട് പ്രഖ്യാപിച്ചിട്ടുണ്ട്. ഇന്നലെ 6 മരണം കൂടി റിപ്പോർട്ട് ചെയ്തതോടെ മഴക്കെടുതികളിൽ ജീവൻ നഷ്ടപ്പെട്ടവരുടെ ആകെ എണ്ണം 15 ആയി ഉയർന്നു.
ഔദ്യോഗിക കണക്കുകൾ പ്രകാരം ഇതിൽ 11 മരണങ്ങളാണ് ഇതുവരെ സ്ഥിരീകരിച്ചിട്ടുള്ളത്. തിരുവനന്തപുരത്തും കൊല്ലത്തുമായി കടലിൽ വള്ളം മറിഞ്ഞ് കാണാതായ 4 മത്സ്യത്തൊഴിലാളികൾക്കായുള്ള തിരച്ചിൽ തുടരുകയാണ്.
സംസ്ഥാനത്തുടനീളമുള്ള 273 ദുരിതാശ്വാസ ക്യാംപുകളിലായി 7674 പേരെ ഇതിനോടകം പുനരധിവസിപ്പിച്ചതായി മന്ത്രി എ.പി.അനിൽകുമാർ അറിയിച്ചു. മഴക്കെടുതിയിൽ ഇതുവരെ 30 വീടുകൾ പൂർണ്ണമായും 293 വീടുകൾ ഭാഗികമായും തകർന്നിട്ടുണ്ട്.
കഴിഞ്ഞ ദിവസങ്ങളിൽ വെള്ളപ്പൊക്കത്തിൽ പൂർണ്ണമായി മുങ്ങിയിരുന്ന പത്തനംതിട്ടയിലെ റാന്നി, കോട്ടയത്തെ പാലാ, ഈരാറ്റുപേട്ട എന്നീ പ്രദേശങ്ങളിൽ വെള്ളം ഇറങ്ങിത്തുടങ്ങിയിട്ടുണ്ട്.
എന്നാൽ അതേസമയം, അപ്പർകുട്ടനാട്ടിൽ ജലനിരപ്പ് ഉയരുന്നതായി റിപ്പോർട്ടുകൾ വരുന്നുണ്ട്. എറണാകുളം പെരുമ്പാവൂർ കുറുപ്പംപടി മേതല മരോട്ടിക്കടവ് കൊറ്റംകുളത്തു ശനിയാഴ്ച രാത്രി വൻ മണ്ണിടിച്ചിൽ ഉണ്ടാവുകയുണ്ടായി.
കൂടാതെ കാസർകോട് ചെമ്പോത്തുമലയിൽ ഉരുൾപൊട്ടലിൽ ഏക്കറുകണക്കിനു കൃഷിഭൂമിയാണ് നശിച്ചത്. സ്ഥിതിഗതികൾ വിലയിരുത്തി പത്തനംതിട്ട, കോട്ടയം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്, എറണാകുളം ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ചിട്ടുണ്ട്.
ആലപ്പുഴ ജില്ലയിൽ കുട്ടനാട്, ചെങ്ങന്നൂർ താലൂക്കുകളിലെ വിദ്യാഭ്യാസ സ്ഥാപനങ്ങൾക്കും ഇന്ന് അവധിയാണ്.
