റഷ്യ-ചൈന സൈനിക സഹകരണം ശക്തമാകുന്നു; രഹസ്യ പരിശീലനം വെളിപ്പെടുത്തി റിപ്പോർട്ടുകൾ

ഉക്രൈൻ യുദ്ധത്തിന്റെ പശ്ചാത്തലത്തിൽ റഷ്യയും ചൈനയും തമ്മിലുള്ള സൈനിക സഹകരണം പുതിയ തലത്തിലേക്ക് കടക്കുന്നു. കഴിഞ്ഞ വർഷം ചൈനയിലെ വിവിധ സൈനിക കേന്ദ്രങ്ങളിൽ വെച്ച് റഷ്യൻ സേനയ്ക്ക് അതീവ രഹസ്യമായി തന്ത്രപ്രധാനമായ പരിശീലനം നൽകിയതായി റിപ്പോർട്ടുകൾ പുറത്തുവരുന്നു.

റഷ്യൻ പ്രസിഡന്റ് വ്ലാഡിമിർ പുടിന്റെ പ്രതിരോധ മന്ത്രി ആൻഡ്രേ ബെലൂസോവ് നേരിട്ട് അനുമതി നൽകിയ ഈ ദൗത്യത്തിൽ ഇരുരാജ്യങ്ങളിലെയും നാല് മുതിർന്ന ജനറൽമാർ പങ്കാളികളായതായാണ് വിവരം. രണ്ട് യൂറോപ്യൻ ഉദ്യോഗസ്ഥരെയും ഔദ്യോഗിക സൈനിക രേഖകളെയും ഉദ്ധരിച്ചാണ് ഈ വിവരങ്ങൾ പുറത്തുവന്നിരിക്കുന്നത്.

2025 ഓഗസ്റ്റിൽ പ്രതിരോധ മന്ത്രി ആൻഡ്രേ ബെലൂസോവ് പുറപ്പെടുവിച്ച ആഭ്യന്തര ഉത്തരവ് പ്രകാരം, റഷ്യൻ സായുധ സേനയുടെ ഒരു പ്രത്യേക സംഘം പീപ്പിൾസ് ലിബറേഷൻ ആർമിയുടെ (PLA) താവളങ്ങളിൽ പരിശീലനത്തിനായി ചൈനയിലേക്ക് യാത്ര തിരിച്ചു. കഴിഞ്ഞ നവംബറിൽ ബെയ്ജിങ്ങിലെയും നാൻജിങ്ങിലെയും സൈനിക കേന്ദ്രങ്ങളിൽ വെച്ച് മൂന്നാഴ്ച നീണ്ടുനിന്ന പരിശീലനമാണ് പൂർത്തിയായത്.

പ്രധാനമായും റേഡിയോളജിക്കൽ, കെമിക്കൽ, ബയോളജിക്കൽ (RCB) പ്രതിരോധത്തിലായിരുന്നു ശ്രദ്ധ കേന്ദ്രീകരിച്ചത്. ഇതിൽ ഉൾപ്പെട്ട

പ്രധാന മേഖലകൾ ഇവയാണ്: * മാതൃകാ ആണവ റിയാക്ടറുകൾ പരിശോധിക്കൽ
* കെമിക്കൽ റീകണസൻസ് (രാസ നിരീക്ഷണം)
* റേഡിയേഷൻ റീകണസൻസ്
* വായുസഞ്ചാര സംവിധാനങ്ങളെ മലിനീകരണത്തിൽ നിന്ന് സംരക്ഷിക്കൽ റഷ്യൻ ലാൻഡ് ഫോഴ്സസിന്റെ ഡെപ്യൂട്ടി കമാൻഡർ-ഇൻ-ചീഫ് കേണൽ ജനറൽ റുസ്തം മുറാദോവ് ആണ് സംഘത്തെ നയിച്ചത്. ചൈനീസ് മേജർ ജനറൽ ലി ജിൻസൂൻ, റഷ്യൻ മേജർ ജനറൽ വിറ്റാലി ഗെരാസിമോവ്, മേജർ ജനറൽ റുസ്തം ഖുസൈനോവ് തുടങ്ങിയ ഉന്നത ഉദ്യോഗസ്ഥർ ഈ ദൗത്യത്തിൽ പങ്കാളികളായി.

നവംബറിൽ പരിശീലനം ലഭിച്ച 200-ഓളം സൈനികരിൽ ചിലർ പിന്നീട് ഉക്രൈനിലെ യുദ്ധമുഖത്ത് എത്തിയതായും ഇന്റലിജൻസ് റിപ്പോർട്ടുകൾ സൂചിപ്പിക്കുന്നു. ഈ നീക്കം യൂറോപ്യൻ യൂണിയനിൽ വലിയ ആശങ്കയാണ് സൃഷ്ടിച്ചിരിക്കുന്നത്.

ചൈനയെ വെറുമൊരു സാമ്പത്തിക പങ്കാളിയായി കാണുന്നതിൽ നിന്ന് മാറി, റഷ്യയുടെ യുദ്ധസഹായി എന്ന നിലയിൽ ചൈനയ്ക്കെതിരെ കടുത്ത നടപടികൾ സ്വീകരിക്കണമെന്ന ആവശ്യം യൂറോപ്യൻ രാജ്യങ്ങൾക്കിടയിൽ ഉയരുന്നുണ്ട്. ജൂൺ 15-ന് യൂറോപ്യൻ യൂണിയൻ വിദേശനയ മേധാവി കാജ കല്ലാസ് ഈ പരിശീലനം സ്ഥിരീകരിച്ചിരുന്നു.

എന്നാൽ, തങ്ങൾ നിഷ്പക്ഷരാണെന്നും പ്രചരിക്കുന്ന വാർത്തകൾ അടിസ്ഥാനരഹിതമാണെന്നുമാണ് ചൈനീസ് വിദേശകാര്യ മന്ത്രാലയത്തിന്റെ നിലപാട്. റഷ്യൻ പാർലമെന്റിന്റെ പ്രതിരോധ സമിതി അധ്യക്ഷൻ ആന്ദ്രേ കാർട്ടാപോലോവ് ഈ റിപ്പോർട്ടുകളെ അസംബന്ധമെന്ന് വിശേഷിപ്പിച്ചു.