ബെംഗളൂരു – മംഗളൂരു വന്ദേ ഭാരത് എക്സ്പ്രസ് ട്രയൽ റൺ ജൂൺ മൂന്നിന്

ബെംഗളൂരുവിനെയും മംഗളൂരുവിനെയും ബന്ധിപ്പിച്ചുകൊണ്ട് വന്ദേ ഭാരത് എക്സ്പ്രസ് ഓടിക്കാനുള്ള റെയിൽവേയുടെ നീക്കം അന്തിമഘട്ടത്തിലേക്ക്. ഇതിന്റെ ഭാഗമായുള്ള പരീക്ഷണയോട്ടം ജൂൺ മൂന്നിന് ആരംഭിക്കുമെന്ന് ഔദ്യോഗിക വൃത്തങ്ങൾ സൂചിപ്പിക്കുന്നു.

യശ്വന്ത്പൂർ മുതൽ മംഗളൂരു സെൻട്രൽ വരെയാണ് ട്രെയിൻ സർവീസ് നടത്തുക. ട്രെയിനിന്റെ പ്രത്യേകതകൾ
ഓട്ടോ എമർജൻസി ബ്രേക്കിംഗ് സംവിധാനത്തോടെ സജ്ജീകരിച്ചിട്ടുള്ള എട്ടു കോച്ചുകളുള്ള ട്രെയിനാണ് പരീക്ഷണയോട്ടത്തിനായി ഉപയോഗിക്കുന്നത്.

നിലവിൽ ഈ റൂട്ടിൽ എട്ടു മണിക്കൂറിലധികം യാത്രാ സമയം എടുക്കുന്നുണ്ട്. യാത്രക്കാരുടെ സൗകര്യാർത്ഥം ഹാസൻ, ശകലേഷ്പുർ, സുബ്രഹ്മണ്യ റോഡ് തുടങ്ങിയ പ്രധാന സ്റ്റേഷനുകളിൽ ട്രെയിൻ നിർത്തിയിടും.

സമയക്രമം
പരീക്ഷണയോട്ടത്തിന്റെ ഭാഗമായി നിശ്ചയിച്ചിരിക്കുന്ന സമയക്രമം താഴെ പറയുന്നതാണ്:
യശ്വന്ത്പൂരിൽനിന്ന് പുലർച്ചെ ആറു മണിക്ക് പുറപ്പെടുന്ന ട്രെയിൻ ഒൻപതു മണിക്ക് ഹാസനിൽ എത്തും. തുടർന്ന് 9:10-ന് ഹാസനിൽ നിന്ന് യാത്ര തിരിച്ച് 9:55-ന് ശകലേഷ്പുരിലും, ഉച്ചയ്ക്ക് 12:30-ന് സുബ്രഹ്മണ്യ റോഡിലും എത്തിച്ചേരും.

ഉച്ചയ്ക്ക് 2:05-ന് പാഡിലിൽ എത്തുന്ന ട്രെയിൻ 2:40-ന് മംഗളൂരു സെൻട്രൽ റെയിൽവേ സ്റ്റേഷനിൽ എത്തിച്ചേരും. വൈകുന്നേരം 2:45-ന് മംഗളൂരുവിൽ നിന്ന് തിരിക്കുന്ന ട്രെയിൻ രാത്രി 11 മണിയോടെ യശ്വന്ത്പൂരിലെത്തും.

പാതയിലെ വെല്ലുവിളികൾ
ഹാസൻ – മംഗളൂരു റെയിൽവേ ലൈനിലെ 55 കിലോമീറ്റർ ദൈർഘ്യമുള്ള ശകലേഷ്പുർ – സുബ്രഹ്മണ്യ റോഡ് ഭാഗം ഇന്ത്യയിലെ ഏറ്റവും സാങ്കേതിക വെല്ലുവിളികൾ നിറഞ്ഞ പാതകളിലൊന്നാണ്. 57 തുരങ്കങ്ങളും 226 പാലങ്ങളും 108 കൊടുംവളവുകളും അടങ്ങിയ ഈ പാതയുടെ വൈദ്യുതീകരണം രണ്ട് വർഷത്തെ കഠിനാധ്വാനത്തിലൂടെയാണ് റെയിൽവേ പൂർത്തിയാക്കിയത്.

ഈ റൂട്ടിൽ വന്ദേ ഭാരത് ട്രെയിൻ അനുവദിക്കണമെന്നത് ദീർഘകാലമായുള്ള ആവശ്യമായിരുന്നു. പരീക്ഷണയോട്ടം വിജയകരമായി പൂർത്തിയാകുന്നതോടെ ഔദ്യോഗിക സമയക്രമവും സ്റ്റോപ്പുകളും സംബന്ധിച്ച വിവരങ്ങൾ റെയിൽവേ ഉടൻ തന്നെ പുറത്തിറക്കും.

ഈ സർവീസ് യാഥാർത്ഥ്യമാകുന്നതോടെ വിദ്യാർത്ഥികൾക്കും വ്യവസായികൾക്കും സാധാരണക്കാരായ യാത്രക്കാർക്കും വലിയൊരു ആശ്വാസമായിരിക്കും.