മൂന്നാറിൽ സഞ്ചാരികൾക്കായി മീശപ്പുലിമല നീലക്കുറിഞ്ഞി സന്ദർശനവും മാട്ടുപ്പെട്ടി പുൽമേടുകളും തുറന്നു നൽകി

മൂന്നാർ മേഖലയിലെ വിനോദസഞ്ചാര മേഖലയ്ക്ക് ഉണർവേകിക്കൊണ്ട് പ്രധാനപ്പെട്ട രണ്ട് ആകർഷണങ്ങൾ കൂടി സഞ്ചാരികൾക്കായി തുറന്നു.

വിഖ്യാതമായ മീശപ്പുലിമലയിലെ നീലക്കുറിഞ്ഞി സന്ദർശനം ഔദ്യോഗികമായി ആരംഭിച്ചു. ഇന്നലെ രാവിലെയാണ് കേരള ഫോറസ്റ്റ് ഡവലപ്മെന്റ് കോർപറേഷന്റെ നേതൃത്വത്തിൽ (കെഎഫ്ഡിസി) നീലക്കുറിഞ്ഞിപ്പൂക്കൾ കാണാനുള്ള പ്രത്യേക സംവിധാനങ്ങൾ ഏർപ്പെടുത്തിയത്.

സഞ്ചാരികൾക്കായി മൂന്നാറിലെ സൈലന്റ് വാലി റോഡിലുള്ള കെഎഫ്ഡിസി ഓഫിസിനു സമീപത്തുനിന്നുമാണ് യാത്ര ക്രമീകരിച്ചിരിക്കുന്നത്. ഇവിടെ നിന്നും ജീപ്പ് മാർഗ്ഗം 30 കിലോമീറ്റർ സഞ്ചരിച്ച് റോഡോ മാൻഷനു സമീപം വരെ സഞ്ചാരികളെ എത്തിക്കും.

തുടർന്ന് അവിടെനിന്നു കിലോമീറ്ററുകൾ കാൽനടയായി സഞ്ചരിച്ചാണ് കുറിഞ്ഞിപ്പൂക്കൾ കാണാനുള്ള സൗകര്യം ഒരുക്കിയിട്ടുള്ളത്. പൂക്കൾക്ക് യാതൊരുവിധ നശീകരണവും സംഭവിക്കാതിരിക്കാൻ സന്ദർശന സ്ഥലങ്ങൾ വനം വകുപ്പിന്റെ നേതൃത്വത്തിൽ വേലി കെട്ടി സുരക്ഷിതമാക്കിയിട്ടുണ്ട്.

നീലക്കുറിഞ്ഞിയുടെ സൗന്ദര്യം ആസ്വദിക്കുന്നതിനൊപ്പം പ്രദേശത്ത് അപൂർവ്വമായ വരയാടുകളെയും കാണാനുള്ള അവസരവും സഞ്ചാരികൾക്ക് ലഭിക്കും. യാത്രാക്കൂലി ഉൾപ്പെടെയുള്ള പ്രവേശന ഫീസ് 1,416 രൂപയാണ്.

പ്രകൃതി സ്നേഹികൾക്കായി ‘കുറിഞ്ഞി’ എന്ന ആപ്പ് വഴിയാണ് ടിക്കറ്റുകൾ മുൻകൂട്ടി ബുക്ക് ചെയ്യേണ്ടത്. പരിസ്ഥിതി സംരക്ഷണത്തിന്റെ ഭാഗമായി ഒരു ദിവസം പരമാവധി 750 പേർക്ക് മാത്രമാണ് പ്രവേശനം അനുവദിക്കുന്നത്.

ഇതോടൊപ്പം തന്നെ വിനോദസഞ്ചാരികളെ ആകർഷിക്കുന്നതിനായി മാട്ടുപ്പെട്ടിയിലെ മനോഹരമായ പുൽമേടുകളും പശുവളർത്തൽ കേന്ദ്രം അധികൃതർ തുറന്നു നൽകിയിട്ടുണ്ട്. മൂന്നാർ – വട്ടവട

റൂട്ടിൽ സ്ഥിതി ചെയ്യുന്ന മാട്ടുപ്പെട്ടി ഡാമിന്റെ വൃഷ്‌ടിപ്രദേശത്തുള്ള മൊട്ടക്കുന്നുകളും പ്രത്യേകം പരിപാലിക്കുന്ന പുൽമേടുകളും ഈ പാതയിലെ ഏറ്റവും പ്രധാനപ്പെട്ട കാഴ്ചകളിലൊന്നാണ്.

നിലവിൽ 14 മുതൽ 16 വരെയുളള ഫീൽഡുകളിൽ ഉൾപ്പെടുന്ന 15-ാം നമ്പർ പുൽമേടാണ് സഞ്ചാരികൾക്കായി ലഭ്യമാക്കിയിരിക്കുന്നത്. കേരള ലൈവ് സ്‌റ്റോക്ക് ഡവലപ്മെന്റ് ബോർഡിന്റെ ഉടമസ്ഥതയിലുള്ളതാണ് ഈ ഭൂപ്രദേശം.

ഈ പ്രദേശത്തെ മൊട്ടക്കുന്നുകളിലെ പുൽമേടുകളിൽ മേയാനെത്തുന്ന കാട്ടാനക്കൂട്ടങ്ങൾ സഞ്ചാരികളുടെ എക്കാലത്തെയും മുഖ്യ ആകർഷണമാണ്. എന്നാൽ കാട്ടാനകളുടെ സ്വൈരവിഹാരത്തിന് യാതൊരുവിധ തടസ്സങ്ങളും ഉണ്ടാകാത്ത രീതിയിലാണ് ക്രമീകരണങ്ങൾ നടത്തിയിട്ടുള്ളത്.

പുൽമേടുകളിൽ ആനകളുടെ സാന്നിധ്യം അനുഭവപ്പെടുന്ന പക്ഷം, ഉടൻതന്നെ സന്ദർശകരെ സുരക്ഷിതമായി മാറ്റുന്നതിനായി പ്രത്യേക കാവൽക്കാരെയും നിയോഗിച്ചിട്ടുണ്ട്. ഈ പ്രദേശം സന്ദർശിക്കുന്നതിനായി മുതിർന്നവർക്ക് 50 രൂപയും, 12 വയസ്സിൽ താഴെയുള്ള കുട്ടികൾക്ക് 25 രൂപയുമാണ് പ്രവേശന നിരക്ക് ഈടാക്കുന്നത്.

രാവിലെ 8 മുതൽ വൈകിട്ട് 5.30 വരെയാണ് സന്ദർശനത്തിനായി അനുവദിച്ചിട്ടുള്ള സമയം. പ്രദേശത്തെ പുൽമേടുകളുടെ സംരക്ഷണത്തിനായി പ്രതിവർഷം ലക്ഷക്കണക്കിന് രൂപയാണ് ബോർഡ് ചെലവഴിച്ചു വരുന്നത്.

ബോർഡിന്റെ പ്രവർത്തനങ്ങൾക്കുള്ള സാമ്പത്തിക വരുമാനം കണ്ടെത്തുന്നതിന്റെ ഭാഗമായി സർക്കാരിന്റെ നിർദ്ദേശപ്രകാരമാണ് ഇപ്പോൾ പുൽമേടുകൾ സഞ്ചാരികൾക്കായി തുറന്നു നൽകിയിട്ടുള്ളത്. ഇതിനുപുറമെ, കൂടുതൽ വരുമാനം ലക്ഷ്യമിട്ട് മാട്ടുപ്പെട്ടിയിൽ പുതിയൊരു പെട്രോൾ പമ്പ് ആരംഭിക്കുന്നതിനുള്ള അനുമതി തേടിക്കൊണ്ട് സർക്കാരിന് ഔദ്യോഗികമായി കത്ത് നൽകിയിട്ടുണ്ടെന്നും ബോർഡ് അധികൃതർ വ്യക്തമാക്കിയിട്ടുണ്ട്.