സ്റ്റാർ സിങ്ങർ; മുൻകാല വിജയികൾ ഇന്ന് എവിടെയൊക്കെ? ചരിത്രവും വിശേഷങ്ങളും

ജനപ്രിയ സംഗീത റിയാലിറ്റി ഷോയായ സ്റ്റാർ സിങ്ങർ പത്താം സീസണിന്റെ ഗ്രാൻഡ് ഫിനാലെയുടെ ആവേശത്തിലാണ് പ്രേക്ഷകർ. പതിറ്റാണ്ടുകൾ നീണ്ട

ഈ സംഗീതയാത്രയിലൂടെ മലയാളത്തിന് ലഭിച്ച പ്രതിഭകളിൽ പലരും ഇന്ന് സംഗീതലോകത്ത് തങ്ങളുടേതായ ഇടം കണ്ടെത്തിക്കഴിഞ്ഞു. ഷോയുടെ ചരിത്രത്തിലെ ശ്രദ്ധേയരായ വിജയികളുടെ നിലവിലെ വിശേഷങ്ങൾ പരിശോധിക്കാം.

അരുൺ രാജ് ആണ് ഷോയുടെ ആദ്യ സീസൺ വിജയി. പിന്നണി ഗാനരംഗത്തും സംഗീത സംവിധാനത്തിലും ശ്രദ്ധേയനായ അദ്ദേഹം ‘ഒരു പഴയ ബോംബ് കഥ’, ‘ചിൽഡ്രൻസ് പാർക്ക്’ എന്നീ ചിത്രങ്ങളിലൂടെ മികച്ച ഗാനങ്ങൾ സമ്മാനിച്ചു.

ഒന്നാം സീസണിലെ മറ്റൊരു വിജയിയായ കവിത ജയറാം സജീവമായി രംഗത്തില്ലെങ്കിലും സോഷ്യൽ മീഡിയയിൽ പങ്കാളിത്തം തുടരുന്നുണ്ട്. രണ്ടാം സീസൺ ജേതാവായ നജീം അർഷാദ് പിന്നീട് മലയാള സിനിമയിൽ തിരക്കുള്ള ഗായകനായി മാറി.

മികച്ച ഗായകനുള്ള സംസ്ഥാന ചലച്ചിത്ര പുരസ്കാരവും അദ്ദേഹത്തെ തേടിയെത്തിയിട്ടുണ്ട്. 2009-ലെ വിജയിയായ ജോബി ജോൺ നിലവിൽ ക്രിസ്ത്യൻ ഭക്തിഗാന ശാഖയിൽ സജീവമാണ്.

മൂന്നാം സീസൺ ജേതാവ് വിവേകാനന്ദൻ കവർ ഗാനങ്ങളിലൂടെയാണ് സംഗീതാസ്വാദകർക്കിടയിൽ ശ്രദ്ധ നേടിയത്. മറ്റൊരു വിജയിയായ സോണിയ സ്റ്റേജ് ഷോകളിലും റിയാലിറ്റി ഷോകളിലും സജീവ സാന്നിധ്യമാണ്.

അഞ്ചാം സീസൺ വിജയി കൽപന രാഘവേന്ദർ തെലുങ്ക് ബിഗ് ബോസ് ഉൾപ്പെടെയുള്ള വേദികളിലും സിനിമകളിലും തന്റെ സാന്നിധ്യം അറിയിച്ചു. മാളവിക അനിൽ കുമാർ ആകട്ടെ, കമലഹാസൻ ചിത്രം ‘പാപനാശം’ ഉൾപ്പെടെയുള്ള സിനിമകളിൽ ഗാനങ്ങൾ ആലപിക്കുകയും സ്റ്റേജ് ഷോകളിൽ നിറസാന്നിധ്യമാവുകയും ചെയ്യുന്നു.

വിജയി ആയിരുന്ന മെറിൻ ജോർജി ഇന്ന് ഈ ഷോയുടെ മെന്റർ കൂടിയാണ്. ജയചന്ദ്രൻ, ഗോവിന്ദ് മേനോൻ, വിദ്യാസാഗർ, ദീപക് ദേവ് തുടങ്ങിയ പ്രമുഖ സംഗീത സംവിധായകരുടെ കീഴിൽ പാടാൻ മെറിന് അവസരം ലഭിച്ചു.

റിഥു കൃഷ്‍ണ സീസൺ 10 വിജയിയായിരുന്നെങ്കിലും ഇപ്പോൾ കവർ സോങ്ങുകളും സ്റ്റേജ് ഷോകളുമായി തിരക്കിലാണ്. കഴിഞ്ഞ വർഷത്തെ വിജയിയായ അരവിന്ദ് നായർ ‘തുടരും’, ‘പ്രകമ്പനം’ തുടങ്ങിയ സിനിമകളിലെ ഗാനങ്ങളിലൂടെയും സ്റ്റേജ് ഷോകളിലൂടെയും സംഗീതരംഗത്ത് സജീവമായി തുടരുന്നു.