നിങ്ങൾ ഉറങ്ങുമ്പോൾ ഫോൺ വെറുതെയിരിക്കുകയല്ല; രാത്രിയിൽ ആൻഡ്രോയിഡ് ഫോണുകൾ ചെയ്യുന്ന രഹസ്യ പ്രവർത്തനങ്ങൾ

നമ്മൾ രാത്രിയിൽ ഉറങ്ങുമ്പോൾ സ്മാർട്ട്ഫോണുകൾ കേവലം ചാർജിംഗിൽ മാത്രം ഒതുങ്ങുന്നില്ലെന്ന് പുതിയ സാങ്കേതിക റിപ്പോർട്ടുകൾ വ്യക്തമാക്കുന്നു. പണ്ട് ഫോൺ ചാർജിംഗിൽ ഇടുമ്പോൾ ബാറ്ററി 100 ശതമാനം നിറയുകയും പിന്നീട് ചൂടായി ബാറ്ററിക്ക് കേടുപാടുകൾ സംഭവിക്കുകയും ചെയ്തിരുന്നു.

എന്നാൽ ഇന്നത്തെ ആൻഡ്രോയിഡ് ഫോണുകളിൽ സ്മാർട്ട് ചാർജിംഗ് സംവിധാനം ലഭ്യമാണ്. ഉപയോക്താവ് എപ്പോൾ ഉണരുമെന്ന് മുൻകൂട്ടി കണ്ട്, 80 ശതമാനത്തിന് ശേഷം പതുക്കെ ചാർജ് ചെയ്ത് കൃത്യസമയത്ത് 100 ശതമാനത്തിൽ എത്തിക്കാൻ ഈ സംവിധാനം സഹായിക്കുന്നു.

രാത്രികാലങ്ങളിൽ ഫോൺ പ്രവർത്തനരഹിതമായിരിക്കുമ്പോൾ ഫോണിനുള്ളിലെ JobScheduler എന്ന രഹസ്യ സംവിധാനമാണ് പ്രധാന ജോലികൾ നിർവഹിക്കുന്നത്. ജിബോർഡ് (Gboard) എഐ പരിശീലനം
ഉപയോക്താവ് ടൈപ്പ് ചെയ്യുന്ന വാക്കുകൾ, ഓട്ടോകറക്റ്റ് നിർദ്ദേശങ്ങൾ തുടങ്ങിയ വിവരങ്ങൾ ഫോണിൽ ശേഖരിക്കപ്പെടുന്നു.

രാത്രിയിൽ വൈഫൈയുമായി ബന്ധിപ്പിക്കുമ്പോൾ, ഗൂഗിളിന്റെ എഐ മോഡൽ ഫോണിലേക്ക് ഡൗൺലോഡ് ചെയ്യുകയും ഈ വിവരങ്ങൾ വിശകലനം ചെയ്യുകയും ചെയ്യുന്നു. ഉപയോക്താവിന്റെ സ്വകാര്യത മാനിച്ച്, യഥാർത്ഥ വാക്കുകൾക്ക് പകരം ഗണിതശാസ്ത്രപരമായ വിവരങ്ങൾ (Weight Gradients) മാത്രമാണ് ഗൂഗിളിന്റെ സെർവറുകളിലേക്ക് അയക്കുന്നത്.

ഡാറ്റ സുരക്ഷിതമാക്കാൻ ഇതിൽ റാൻഡം നോയ്‌സും എൻക്രിപ്ഷനും ഉൾപ്പെടുത്തുന്നുണ്ട്. സിസ്റ്റം പരിപാലനവും സ്റ്റോറേജ് വൃത്തിയാക്കലും
ഫോൺ ദീർഘകാലം ഉപയോഗിക്കുമ്പോൾ ഫ്ലാഷ് സ്റ്റോറേജിൽ അനാവശ്യ ഫയലുകളും ലോഗുകളും അടിഞ്ഞുകൂടാറുണ്ട്.

ഇത് ഫോണിന്റെ വേഗത കുറയ്ക്കും. രാത്രിയിൽ ചാർജിംഗിൽ ഇരിക്കുമ്പോൾ, സിസ്റ്റം തന്നെ ഈ ജങ്ക് ഫയലുകൾ നീക്കം ചെയ്യുകയും ആപ്പ് ഡാറ്റാബേസുകൾ ഒപ്റ്റിമൈസ് ചെയ്യുകയും ചെയ്യുന്നു.

ഇത് ആപ്പുകൾ ഹാങ് ആകുന്നത് തടയുന്നു. ഗാലറിയിലെ എഐ പ്രവർത്തനങ്ങൾ
ഫോട്ടോകളിൽ കാണുന്ന മുഖങ്ങൾ തിരിച്ചറിയാനും വളർത്തുമൃഗങ്ങളെ തരംതിരിക്കാനും ഗാലറി ആപ്പിനെ സഹായിക്കുന്നത് ഈ രാത്രികാല ജോലികളാണ്.

ഇമേജ് പ്രോസസ്സിംഗ്, ഒപ്റ്റിക്കൽ ക്യാരക്ടർ റെക്കഗ്നിഷൻ (OCR) എന്നിവ വഴി ഫോട്ടോകൾ എളുപ്പത്തിൽ സെർച്ച് ചെയ്യാൻ ഈ സംവിധാനം വഴിയൊരുക്കുന്നു. ഈ പ്രവർത്തനങ്ങളെല്ലാം ഫോൺ ചാർജിംഗിൽ ഇരിക്കുമ്പോൾ മാത്രമാണ് നടക്കുന്നത്.

ആപ്പ് പ്രവർത്തനക്ഷമത വർദ്ധിപ്പിക്കൽ
ആപ്പുകൾ തുറക്കുമ്പോൾ ഉണ്ടാകുന്ന കാലതാമസം ഒഴിവാക്കാൻ ആൻഡ്രോയിഡ് ഒഎസ് പ്രത്യേകം ശ്രദ്ധിക്കുന്നു. പകൽ സമയത്ത് ഉപയോക്താവ് ഏറ്റവും കൂടുതൽ ഉപയോഗിക്കുന്ന ആപ്പുകൾ ഏതാണെന്ന് ഫോൺ തിരിച്ചറിയുന്നു.

രാത്രിയിൽ, ആപ്പുകളെ മുൻകൂട്ടി ഒപ്റ്റിമൈസ് (Pre-compilation) ചെയ്യുന്നതിലൂടെ, അടുത്ത ദിവസം അവ അതിവേഗം തുറക്കാൻ സാധിക്കുന്നു. ഇത്തരത്തിൽ, നമ്മൾ ഉറങ്ങുമ്പോഴും നമ്മുടെ സ്മാർട്ട്ഫോണുകൾ ബാറ്ററി സംരക്ഷിക്കുന്നതിനും വേഗത വർദ്ധിപ്പിക്കുന്നതിനുമുള്ള വിപുലമായ പ്രവർത്തനങ്ങളിൽ ഏർപ്പെട്ടുകൊണ്ടിരിക്കുകയാണ്.