ആൻഡ്രോയിഡ് ഫോണുകളിൽ ഗൂഗിൾ പ്ലേ സ്റ്റോർ ആപ്പ് അപ്ഡേറ്റുകൾ എങ്ങനെ നിയന്ത്രിക്കാം

സ്മാർട്ട്ഫോണുകളിലെ ആപ്ലിക്കേഷനുകൾ തനിയെ അപ്ഡേറ്റ് ആകുന്നത് പലപ്പോഴും ഉപയോക്താക്കൾക്ക് അസൗകര്യങ്ങൾ സൃഷ്ടിക്കാറുണ്ട്. മൊബൈൽ ഡാറ്റ അനാവശ്യമായി തീരുന്നതിനും, പെട്ടെന്നുള്ള മാറ്റങ്ങൾ ഉപയോക്താക്കളുടെ ജോലിയെ ബാധിക്കുന്നതിനും ഇത് കാരണമാകാറുണ്ട്.

ഈ പ്രശ്നങ്ങൾക്ക് പരിഹാരമായി ഗൂഗിൾ പ്ലേ സ്റ്റോർ (Google Play Store) സെറ്റിങ്സ് മാറ്റിക്കൊണ്ട് ആപ്പ് അപ്ഡേറ്റുകൾ പൂർണ്ണമായി നമ്മുടെ നിയന്ത്രണത്തിലാക്കാൻ സാധിക്കും. ആപ്പുകൾ അപ്ഡേറ്റ് ചെയ്യുന്നത് സുരക്ഷാ പ്രശ്നങ്ങൾ പരിഹരിക്കുന്നതിനും ബഗുകൾ മാറ്റുന്നതിനും പുതിയ ഫീച്ചറുകൾ ലഭിക്കുന്നതിനും അത്യാവശ്യമാണ്.

എന്നാൽ എല്ലാ ആപ്പുകളും ഒരേപോലെ അപ്ഡേറ്റ് ചെയ്യപ്പെടണമെന്ന് നിർബന്ധമില്ല. മൊബൈൽ ഡാറ്റയുടെ ഉപയോഗം നിയന്ത്രിക്കാനും, ഇഷ്ടമുള്ള ആപ്പുകൾ മാത്രം ഓട്ടോമാറ്റിക് അപ്ഡേറ്റ് മോഡിൽ ഇടാനും പ്ലേ സ്റ്റോറിൽ സംവിധാനമുണ്ട്.

നെറ്റ്‌വർക്ക് മുൻഗണനകൾ (Network Preferences) മാറ്റുന്ന വിധം
ഓരോ ആപ്പിലും കയറി സെറ്റിങ്സ് മാറ്റുന്നതിന് പകരം പ്ലേ സ്റ്റോറിലെ നെറ്റ്‌വർക്ക് മുൻഗണനകൾ മാറ്റുന്നത് എളുപ്പമുള്ള വഴിയാണ്. പ്ലേ സ്റ്റോർ തുറന്ന് മുകളിൽ വലതുവശത്തുള്ള പ്രൊഫൈൽ ഐക്കണിൽ ടാപ്പ് ചെയ്ത് Settings > Network preferences > Auto-update apps എന്ന ഭാഗത്തേക്ക് പോകുക.

ഇവിടെ താഴെ പറയുന്ന ഓപ്ഷനുകൾ ലഭ്യമാണ്: • Update all apps over Wi-Fi or mobile data: വൈഫൈയോ മൊബൈൽ ഡാറ്റയോ ഉപയോഗിച്ച് ഏത് സമയത്തും ആപ്പുകൾ ഓട്ടോമാറ്റിക്കായി അപ്ഡേറ്റ് ചെയ്യാം.
• Update over Wi-Fi only: മൊബൈൽ ഡാറ്റ നഷ്ടപ്പെടാതെ വൈഫൈ വഴി മാത്രം ഓട്ടോമാറ്റിക് അപ്ഡേറ്റുകൾ നടപ്പിലാക്കാം.
• Update with limited amount of mobile data: പരിമിതമായ അളവിൽ മാത്രം മൊബൈൽ ഡാറ്റ അപ്ഡേറ്റുകൾക്കായി ഉപയോഗിക്കാൻ അനുവദിക്കുന്നു.
• Don’t auto-update apps: ഓട്ടോമാറ്റിക് അപ്ഡേറ്റുകൾ പൂർണ്ണമായി ഓഫ് ചെയ്യാം. ആവശ്യമുള്ളപ്പോൾ മാത്രം മാനുവലായി അപ്ഡേറ്റുകൾ പരിശോധിക്കാം.

വ്യക്തിഗത ആപ്പുകളുടെ അപ്ഡേറ്റ് നിയന്ത്രിക്കാം
എല്ലാ ആപ്പുകളേയും ഒരുപോലെ കാണേണ്ടതില്ല. ചില പ്രധാന ആപ്പുകൾ തനിയെ അപ്ഡേറ്റ് ആകാനും, മറ്റുള്ളവ നമ്മൾ ആവശ്യപ്പെടുമ്പോൾ മാത്രം അപ്ഡേറ്റ് ആകാനും ക്രമീകരിക്കാം.

ഇതിനായി പ്ലേ സ്റ്റോർ തുറന്ന് പ്രൊഫൈൽ ഐക്കൺ ക്ലിക്ക് ചെയ്ത് Manage apps & device > Manage എന്നതിൽ പോകുക. നിയന്ത്രിക്കേണ്ട

ആപ്പ് തിരഞ്ഞെടുത്ത് അതിൻ്റെ ഡീറ്റെയിൽസ് പേജിൽ ചെന്ന് മൂന്ന് ഡോട്ടുകളുള്ള മെനുവിൽ ടാപ്പ് ചെയ്ത് Enable auto-update ഓഫ് ചെയ്യാം. സുരക്ഷാ കാരണങ്ങളാൽ ചില നിർണായക അപ്ഡേറ്റുകൾ ഉപയോക്താക്കളുടെ സെറ്റിങ്സ് കണക്കിലെടുക്കാതെ ഗൂഗിൾ നേരിട്ട് അയച്ചുനൽകിയേക്കാം.

അതിനാൽ പ്ലേ സ്റ്റോറിൽ പ്രൊഫൈൽ ഐക്കൺ വഴി ഇടയ്ക്കിടെ അപ്ഡേറ്റുകൾ പരിശോധിക്കുന്നത് ഫോണിന്റെ സുരക്ഷയ്ക്ക് എപ്പോഴും മികച്ചതാണ്.