പ്രായത്തിൽ കൃത്രിമം കാണിച്ചതായി കണ്ടെത്തിയതിനെ തുടർന്ന് ഇന്ത്യൻ അണ്ടർ 19 ക്രിക്കറ്റ് താരം രോഹിത് യാദവിന് ബിസിസിഐ രണ്ടു വർഷത്തെ വിലക്ക് ഏർപ്പെടുത്തി. ഓസ്ട്രേലിയ അണ്ടർ 19 ടീമിനെതിരെയുള്ള പരമ്പര ആരംഭിക്കാൻ ദിവസങ്ങൾ മാത്രം ബാക്കിനിൽക്കെയാണ് ലെഗ് സ്പിന്നറായ താരത്തിനെതിരെ ഈ കടുത്ത നടപടി വന്നിരിക്കുന്നത്.
വിലക്കുമായി ബന്ധപ്പെട്ട വിവരങ്ങൾ ബിസിസിഐ തങ്ങളുടെ കീഴിലുള്ള എല്ലാ സംസ്ഥാന ക്രിക്കറ്റ് അസോസിയേഷനുകളെയും ഔദ്യോഗികമായി അറിയിച്ചിട്ടുണ്ട്.
ബോർഡിന്റെ കർശനമായ പ്രായപരിശോധനയിലാണ് രോഹിത് യാദവിന്റെ തിരിച്ചറിയൽ രേഖകളിൽ വ്യാപകമായ തിരിമറികൾ നടന്നിട്ടുണ്ടെന്ന് വ്യക്തമായത്. 2014-ൽ ബംഗാൾ ക്രിക്കറ്റ് അസോസിയേഷനിൽ രജിസ്റ്റർ ചെയ്ത വേളയിൽ 2007 ജൂലൈ 7 ആയിരുന്നു ജനനതീയതിയായി രേഖപ്പെടുത്തിയിരുന്നത്.
എന്നാൽ 2017-ൽ രേഖകൾ പുതുക്കിയപ്പോൾ ഇത് 2006 ആയും, തുടർന്ന് 2021-ൽ വീണ്ടും മാറ്റങ്ങൾ വരുത്തി 2009 ആയും തിരുത്തിയതായി പരിശോധനയിൽ കണ്ടെത്തി. രേഖകളിലെ ഈ ഗുരുതരമായ വൈരുധ്യങ്ങളാണ് അച്ചടക്ക നടപടിയിലേക്ക് നയിച്ചത്.
വരാനിരിക്കുന്ന ഓസ്ട്രേലിയൻ പര്യടനത്തിനുള്ള ഇന്ത്യൻ അണ്ടർ 19 ടീമിൽ ഇടംനേടിയിരുന്ന താരമാണ് രോഹിത്. കഴിഞ്ഞ ജൂലൈയിൽ ശ്രീലങ്കയ്ക്കെതിരെ നടന്ന യൂത്ത് ടെസ്റ്റ് പരമ്പരയിൽ മികച്ച പ്രകടനം പുറത്തെടുക്കാൻ താരത്തിന് കഴിഞ്ഞിരുന്നു.
ആ പരമ്പരയിൽ ഒരേയൊരു മത്സരത്തിൽ മാത്രം കളിച്ച താരം രണ്ട് ഇന്നിങ്സുകളിലായി 6 വിക്കറ്റുകൾ വീഴ്ത്തിയിരുന്നു. സെപ്റ്റംബർ 18 മുതൽ ആരംഭിക്കുന്ന ഓസ്ട്രേലിയക്കെതിരായ പരമ്പരയിൽ മൂന്ന് ഏകദിനങ്ങളും രണ്ട് യൂത്ത് ടെസ്റ്റ് മത്സരങ്ങളുമാണ് ഉൾപ്പെട്ടിട്ടുള്ളത്.
ബിസിസിഐ വിലക്ക് നിലവിൽ വന്ന സാഹചര്യത്തിൽ രോഹിതിന് പകരമുള്ള താരത്തെ സെലക്ടർമാർ ഉടൻ തന്നെ പ്രഖ്യാപിക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
