ജാതിയും മതവുമില്ലാതെ മകൻ വളരണം; കുഞ്ഞിന്റെ പേര് വെളിപ്പെടുത്തി മിനിസ്ക്രീൻ താരങ്ങളായ അഭിലാഷും ശ്രീക്കുട്ടിയും

സോഷ്യൽ മീഡിയയിലൂടെയും മിനിസ്ക്രീനിലൂടെയും മലയാളി പ്രേക്ഷകർക്ക് സുപരിചിതരായ താരദമ്പതികളാണ് അഭിലാഷും ശ്രീക്കുട്ടിയും. തങ്ങളുടെ ഇൻസ്റ്റഗ്രാം, യൂട്യൂബ് അക്കൗണ്ടുകൾക്കായി ഇവർ ഉപയോഗിക്കുന്ന ‘അഭിശ്രീ’ എന്ന പേര് ആരാധകർക്കിടയിൽ ഏറെ ശ്രദ്ധേയമാണ്.

അടുത്തിടെ സമാപിച്ച ബിഗ് ബോസ് സീസണിലും അഭിലാഷ് മത്സരത്തിൽ പങ്കെടുത്തിരുന്നു. ഏഴു വർഷത്തെ കാത്തിരിപ്പിനൊടുവിലാണ് തങ്ങളുടെ ആദ്യത്തെ കൺമണി പിറന്ന സന്തോഷം ഇവർ സമൂഹമാധ്യമങ്ങളിലൂടെ പങ്കുവെച്ചത്.

ആൺകുഞ്ഞാണ് ദമ്പതികൾക്ക് പിറന്നത്. കുഞ്ഞിന്റെ വരവുമായി ബന്ധപ്പെട്ട

വിശേഷങ്ങളെല്ലാം ഇവർ തങ്ങളുടെ യൂട്യൂബ് ചാനലിലൂടെ നിരന്തരം പങ്കുവെക്കാറുണ്ട്. ഇപ്പോഴിതാ, തങ്ങളുടെ നവജാത ശിശുവിന്റെ പേര് ഔദ്യോഗികമായി വെളിപ്പെടുത്തിയിരിക്കുകയാണ് ഈ താരദമ്പതികൾ.

‘കിയാൻഷ്’ എന്നാണ് മകന് പേരിട്ടിരിക്കുന്നത്. ഈ വേളയിൽ ഓൺലൈൻ മാധ്യമങ്ങളുടെ ചോദ്യങ്ങൾക്ക് മറുപടിയായി ഇവർ പങ്കുവെച്ച കാര്യങ്ങൾ വലിയ രീതിയിൽ ശ്രദ്ധനേടുന്നുണ്ട്.

“മകന് ജാതിയോ മതമോ ഇല്ലാതെ, തികച്ചും ഒരു മനുഷ്യനായി വളരണം എന്നാണ് ഞങ്ങളുടെ ആഗ്രഹം. ജനന സര്‍ട്ടിഫിക്കറ്റിലും ‘നോ കാസ്റ്റ്, നോ റിലീജിയന്‍’ എന്നാണ് നല്‍കിയിട്ടുള്ളത്,” എന്നാണ് അഭിലാഷും ശ്രീക്കുട്ടിയും വ്യക്തമാക്കിയത്.

ടിക് ടോക്കിലൂടെയാണ് അഭിലാഷ് സോഷ്യൽ മീഡിയയിൽ സജീവമാകുന്നത്. തുടർന്ന് ഡാൻസ് രംഗത്ത് ശ്രദ്ധ കേന്ദ്രീകരിച്ച അദ്ദേഹം ‘ഡി ഫോർ ഡാൻസ്’ എന്ന പ്രശസ്തമായ റിയാലിറ്റി ഷോയിലൂടെയാണ് പ്രേക്ഷക ശ്രദ്ധ നേടിയത്.

കാലിന് സ്വാധീനമില്ലായ്മയെ ഒരിക്കലും ഒരു പരിമിതിയായി കാണാതെ, അസാധാരണമായ നൃത്തച്ചുവടുകളിലൂടെ നിരവധി ആരാധകരെയും കയ്യടികളെയുമാണ് അഭിലാഷ് സ്വന്തമാക്കിയത്. ഏറെ നാളത്തെ പ്രണയത്തിനൊടുവിൽ കുടുംബങ്ങളുടെ എതിർപ്പുകൾ വകവെക്കാതെയാണ് ഇരുവരും വിവാഹിതരായത്.

ആ കാലയളവിൽ വലിയ രീതിയിലുള്ള വിമർശനങ്ങളും ട്രോളുകളും നേരിടേണ്ടി വന്നിട്ടുണ്ടെങ്കിലും, ഇന്ന് സോഷ്യൽ മീഡിയയിലെ ഏറ്റവും ജനപ്രീതിയുള്ള ദമ്പതികളിൽ ഒന്നാണ് ഇവർ.