പുന്നമടയുടെ നെട്ടായത്തിൽ ഇന്ന് 72ാമത് നെഹ്റു ട്രോഫി വള്ളംകളി; 21 ചുണ്ടൻവള്ളങ്ങൾ മാറ്റുരയ്ക്കും

ആലപ്പുഴ ജില്ലയിലെ പുന്നമടക്കായലിൽ ഇന്ന് ആവേശം അലതല്ലുന്ന 72ാമത് നെഹ്റു ട്രോഫി വള്ളംകളി നടക്കും. കായലിന്റെ 1,140 മീറ്റർ നെട്ടായത്തിൽ 21 ചുണ്ടൻവള്ളങ്ങൾ ഉൾപ്പെടെ ആകെ 70 വള്ളങ്ങളാണ് ഇത്തവണ മത്സരച്ചൂടിൽ മാറ്റുരയ്ക്കുന്നത്.

ജലത്തിന്റെ പ്രതിരോധത്തെ മുറിച്ചുകടന്ന് വേഗരാജാക്കന്മാർ നെഹ്റു ട്രോഫി വെള്ളിക്കപ്പ് ഏറ്റുവാങ്ങുന്ന കാഴ്ചയ്ക്കായി ലക്ഷക്കണക്കിന് കായികപ്രേമികളാണ് പുന്നമടക്കരയിൽ എത്തിച്ചേരുന്നത്. രാവിലെ 11 മണിക്ക് ചെറുവള്ളങ്ങളുടെ ഹീറ്റ്സ് മത്സരങ്ങളോടെയാണ് തുടക്കമാകുക.

തുടർന്ന് ഉച്ചയ്ക്കു 2 മണിക്ക് മുഖ്യമന്ത്രി വി.ഡി.സതീശൻ ജലമേള ഔദ്യോഗികമായി ഉദ്ഘാടനം ചെയ്യും. മന്ത്രി എം.ലിജു ചടങ്ങിൽ അധ്യക്ഷത വഹിക്കും.

കർണാടക മുഖ്യമന്ത്രി ഡി.കെ.ശിവകുമാർ ചടങ്ങിൽ മുഖ്യാതിഥിയായി പങ്കെടുക്കും. മന്ത്രി രമേശ് ചെന്നിത്തല മാസ് ഡ്രിൽ ഫ്ലാഗ് ഓഫ് ചെയ്യുമെന്നും മന്ത്രി പി.സി.വിഷ്ണുനാഥ് പതാക ഉയർത്തുമെന്നും സംഘാടകർ അറിയിച്ചു.

എംപിമാരായ കെ.സി.വേണുഗോപാൽ സ്മരണിക പ്രകാശനവും കൊടിക്കുന്നിൽ സുരേഷ് മാധ്യമ പുരസ്കാര വിതരണവും നിർവഹിക്കും. ഡപ്യൂട്ടി സ്പീക്കർ ഷാനിമോൾ ഉസ്മാൻ വിശിഷ്ടാതിഥികൾക്കുള്ള പുരസ്കാരങ്ങൾ വിതരണം ചെയ്യും.

ഉദ്ഘാടന ചടങ്ങുകൾക്ക് ശേഷം ചുണ്ടൻ വള്ളങ്ങളുടെ ഹീറ്റ്‌സും ചെറു വള്ളങ്ങളുടെ ഫൈനൽ മത്സരങ്ങളും നടക്കും. വൈകുന്നേരം നടക്കുന്ന സമാപന സമ്മേളനത്തിൽ കർണാടക മുഖ്യമന്ത്രി ഡി.കെ.ശിവകുമാർ വിജയികൾക്കുള്ള സമ്മാനങ്ങൾ വിതരണം ചെയ്യും.

വിവിധ വിഭാഗങ്ങളിലായി 70 യാനങ്ങളാണ് ജലത്തിലെ കളിക്കളത്തിലിറങ്ങുന്നത്. 21 ചുണ്ടൻ വള്ളങ്ങള്‍ നാലു ട്രാക്കുകളിലായി 6 ഹീറ്റ്സുകളിലാണ് പൊരുതുന്നത്.

വനിതകൾ തുഴയുന്ന തെക്കനോടി തറ വിഭാഗത്തിൽ ഒരു വള്ളവും, തെക്കനോടി കെട്ട് വിഭാഗത്തിൽ 4 വള്ളങ്ങളും മത്സരിക്കുന്നുണ്ട്. ഇതിനുപുറമേ ഇരുട്ടുകുത്തി ബി – 16, ഇരുട്ടുകുത്തി സി – 14, വെപ്പ് എ – 5, വെപ്പ് ബി – 4, ചുരുളൻ – 3, ഇരുട്ടുകുത്തി എ – 3 എന്നീ വിഭാഗങ്ങളിലെ മത്സരങ്ങളും ഇന്നത്തെ കായലോരത്തെ ആവേശമാക്കും.

കഴിഞ്ഞ വർഷങ്ങളിലെപ്പോലെ ഫിനിഷിങ് പോയിന്റിലെ കൃത്യതയ്ക്കായി ആധുനിക സംവിധാനങ്ങളാണ് ഒരുക്കിയിട്ടുള്ളത്. ഹീറ്റ്സിൽ മികച്ച സമയം കുറിക്കുന്ന 4 ചുണ്ടൻ വള്ളങ്ങൾ ഫൈനലിൽ നെഹ്റുവിന്റെ പേരിലുള്ള വെള്ളിക്കപ്പിനായി പോരാടും.

ആഴ്ചകൾ നീണ്ട പരിശീലനത്തിനൊടുവിലാണ് നൂറോളം തുഴക്കാർ ഒരേ ശ്വാസത്തിൽ 130 അടി നീളമുള്ള ചുണ്ടൻ വള്ളങ്ങൾ തുഴയെറിയാൻ എത്തുന്നത്.

വള്ളംകളിയോടനുബന്ധിച്ച് ആലപ്പുഴ നഗരത്തിലും പുന്നമടക്കരയിലേക്കും കൂടുതൽ കെഎസ്ആർടിസി ബസുകളും ബോട്ട് സർവീസുകളും ഏർപ്പെടുത്തിയിട്ടുണ്ട്. കലക്ടർ ഷാജി വി.നായരും ജില്ലാ പൊലീസ് മേധാവി ടി.കെ.വിഷ്ണു പ്രദീപും മത്സരങ്ങളുടെ സുഗമമായ നടത്തിപ്പിന് നേതൃത്വം നൽകുന്നുണ്ട്.

നെഹ്റു ട്രോഫി ബോട്ട് റേസ് സൊസൈറ്റിയും ആലപ്പുഴ നഗരസഭയും വിവിധ സർക്കാർ വകുപ്പുകളും ചേർന്നാണ് ഇത്തവണയും ജലമേള സംഘടിപ്പിച്ചിരിക്കുന്നത്.