പഞ്ചാബിൽ വാടകവീട് പരിശോധിക്കാനെത്തിയ ദമ്പതികൾക്ക് നേരെ പിറ്റ്ബുൾ നായയുടെ ക്രൂര ആക്രമണം; യുവതിക്ക് ഗുരുതര പരിക്ക്

പഞ്ചാബിലെ പട്യാലയിൽ വാടകവീട് നോക്കാനെത്തിയ ദമ്പതിമാരെ പിറ്റ്ബുൾ ഇനത്തിൽപ്പെട്ട വളർത്തുനായ ക്രൂരമായി ആക്രമിച്ചു.

പട്യാല ​ഗുമാൻ ന​ഗറിലാണ് സംഭവം നടന്നത്. പട്യാല നിവാസികളായ അങ്കിത് സബർവാൾ, ഭാര്യ ഷിഫാലി എന്നിവർക്കാണ് പിറ്റ്ബുളിന്റെ ആക്രമണത്തിൽ പരിക്കേറ്റത്.

ഇതിൽ ഷിഫാലിയ്ക്ക് ​ഗുരുതരമായ പരിക്കേറ്റിട്ടുണ്ട്. യുവതിയുടെ കൈയിലും മറ്റുഭാ​ഗങ്ങളിലും നായ മാരകമായി കടിച്ചുപരിക്കേൽപ്പിച്ചു.

സ്വകാര്യ ആശുപത്രിയിൽ ചികിത്സയിലുള്ള യുവതിയ്ക്ക് ശസ്ത്രക്രിയ വേണമെന്നാണ് ഡോക്ടർമാർ അറിയിച്ചിട്ടുള്ളത്. പട്യാലയിൽ തന്നെ താമസിക്കുന്ന അങ്കിതും ഭാര്യ ഷിഫാലിയും വാടകയ്ക്കുള്ള വീട് നോക്കാനായാണ് ചൊവ്വാഴ്ച വൈകിട്ട് ​ഗുമാൻ ന​ഗറിലെത്തിയത്.

ഒരു ബ്രോക്കറും ഇവർക്കൊപ്പമുണ്ടായിരുന്നു. തുടർന്ന് വീട്ടിലേക്ക് പ്രവേശിക്കാനായി ബ്രോക്കർ ​ഗേറ്റ് തുറന്ന ഉടനെ വീട്ടിൽനിന്ന് പിറ്റ്ബുൾ പുറത്തേക്ക് ഓടിയെത്തുകയായിരുന്നു.

പിന്നാലെ ഇത് യുവതിയെ ആക്രമിക്കുകയായിരുന്നു. ഭാര്യയെ രക്ഷിക്കാൻ ശ്രമിക്കുന്നതിനിടെ അങ്കിതിനും കടിയേറ്റു.

ഇദ്ദേഹത്തിന്റെ കാലിലും പിൻഭാ​ഗത്തുമാണ് കടിയേറ്റത്. മിനിറ്റുകളോളം ആക്രമണം നീണ്ടുനിന്നു.

ഈ സമയം ബ്രോക്കറും വീട്ടിൽനിന്ന് എത്തിയ വീട്ടുടമയും വടി ഉപയോ​ഗിച്ച് നായയെ പിന്തിരിപ്പിക്കാൻ ശ്രമിച്ചെങ്കിലും ഫലംകണ്ടില്ല. തുടർന്ന് കൂടുതൽപേരെത്തി നായയെ അടിച്ച് ഓടിക്കുകയായിരുന്നു.

​പരിക്കേറ്റ ദമ്പതിമാരെ ഉടൻ തന്നെ ആശുപത്രിയിൽ പ്രവേശിപ്പിച്ചു. സംഭവത്തിൽ പൊലീസിൽ പരാതി നൽകിയതായി അങ്കിത് വ്യക്തമാക്കി.

സംഭവത്തിൻ്റെ സിസിടിവി ​​ദൃശ്യങ്ങളും പുറത്തുവന്നിട്ടുണ്ട്. അതിനിടെ, ഇത്തരം ആക്രമണസ്വഭാവമുള്ള നായകളെ വീട്ടിൽ വളർത്തുന്നത് നിരോധിക്കുമെന്ന് പട്യാല മേയർ കുന്ദൻ ​ഗോ​ഗിയ പ്രതികരിച്ചു.