ബത്തേരിയിൽ ഷിഗെല്ല വ്യാപനം: ആശങ്കപ്പെടേണ്ട സാഹചര്യമില്ലെന്ന് മന്ത്രി കെ. മുരളീധരൻ; പ്രതിരോധ പ്രവർത്തനങ്ങൾ ശക്തമാക്കി

ബത്തേരിയിൽ കുട്ടികളിൽ ഷിഗെല്ല ബാധ സ്ഥിരീകരിച്ച സാഹചര്യത്തിൽ ജനങ്ങൾ ആശങ്കപ്പെടേണ്ടതില്ലെന്ന് മന്ത്രി കെ. മുരളീധരൻ വ്യക്തമാക്കി.

ബത്തേരി താലൂക്ക് ആശുപത്രിയിൽ ചികിത്സയിൽ കഴിയുന്ന കുട്ടികളെ സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നിലവിൽ 38 പേരാണ് ആശുപത്രിയിൽ ചികിത്സയിലുള്ളത്.

ഇതിൽ രണ്ടോ മൂന്നോ പേർക്ക് മാത്രമാണ് പനിയും ചുമയും ഉൾപ്പെടെയുള്ള ആരോഗ്യപ്രശ്നങ്ങൾ ഗുരുതരമായുള്ളത്. പുതിയതായി ഒരു പരിശോധനാ ഫലം കൂടി പോസിറ്റീവായിട്ടുണ്ട്.

കുഴൽക്കിണറിലെ വെള്ളം പരിശോധിച്ചതിൽ രോഗാണുബാധ കണ്ടെത്തിയിട്ടില്ല. തുറന്ന കിണറുകളിൽ നിന്നുള്ള വെള്ളത്തിന്റെ പരിശോധനാ ഫലം ഇന്ന് വൈകിട്ടോടെ ലഭ്യമാകും.

ഇതിന്റെ അടിസ്ഥാനത്തിൽ തുടർനടപടികൾ സ്വീകരിക്കും. മഴ തുടരുന്ന സാഹചര്യത്തിൽ സ്കൂളുകൾക്ക് അവധി നൽകുന്ന വിഷയം വിദ്യാഭ്യാസ മന്ത്രിയും കലക്ടറും ചർച്ച ചെയ്ത് തീരുമാനിക്കും.

ഭക്ഷ്യസുരക്ഷാ വിഭാഗത്തിന്റെ നേതൃത്വത്തിൽ കടകളിൽ കർശന പരിശോധന നടത്താൻ നിർദ്ദേശം നൽകിയിട്ടുണ്ട്. വൃത്തിഹീനമായ അന്തരീക്ഷത്തിൽ പ്രവർത്തിക്കുന്ന തട്ടുകടകൾ പൂട്ടാൻ നിർദ്ദേശം നൽകി.

ഹോട്ടലുകളിൽ തിളപ്പിച്ചാറ്റിയ വെള്ളം മാത്രമേ വിതരണം ചെയ്യാവൂ എന്ന് കർശന നിർദ്ദേശം നൽകിയിട്ടുണ്ട്. മഴക്കാലപൂർവ ശുചീകരണ പ്രവർത്തനങ്ങൾക്കായി എല്ലാ ജില്ലകൾക്കും ഒരു കോടി രൂപ വീതം അനുവദിച്ചിട്ടുണ്ടെന്നും മന്ത്രി അറിയിച്ചു.

പ്രതിരോധ പ്രവർത്തനങ്ങൾ ഊർജിതമാക്കി ഷിഗെല്ല സ്ഥിരീകരിച്ച പ്രദേശങ്ങളിലും പരിസരങ്ങളിലും കിണറുകൾ ക്ലോറിനേറ്റ് ചെയ്യുന്നതിനായി പ്രത്യേക ഡ്രൈവ് സംഘടിപ്പിക്കുമെന്ന് മന്ത്രി ടി. സിദ്ദീഖ് അറിയിച്ചു.

ബത്തേരി ഗെസ്റ്റ് ഹൗസിൽ ചേർന്ന അവലോകന യോഗത്തിൽ സംസാരിക്കുകയായിരുന്നു അദ്ദേഹം. ജില്ലയിലെ മുഴുവൻ സ്കൂളുകളിലും പരിശോധന കർശനമാക്കും.

നെൻമേനി പഞ്ചായത്തിലെ എല്ലാ വാർഡുകളിലും അവലോകന യോഗങ്ങൾ ചേരാൻ തീരുമാനിച്ചിട്ടുണ്ട്. ശുചിത്വം പാലിക്കുന്നതിനായുള്ള മാർഗനിർദേശങ്ങൾ അച്ചടിച്ച് സ്കൂളുകളിലും വീടുകളിലും വ്യാപാര സ്ഥാപനങ്ങളിലും എത്തിക്കും.

നെൻമേനി കൂടാതെ നൂൽപുഴ, അമ്പലവയൽ പഞ്ചായത്തുകളിലും ബത്തേരി നഗരസഭയിലും പ്രത്യേക യോഗങ്ങൾ ചേർന്ന് സ്ഥിതിഗതികൾ വിലയിരുത്തും. നിലവിൽ 11 സ്കൂളുകളും ഒരു എൻജിനീയറിങ് കോളജും ഉൾപ്പെടെ 12 വിദ്യാഭ്യാസ സ്ഥാപനങ്ങളിൽ പ്രത്യേക നിരീക്ഷണം ഏർപ്പെടുത്തിയിട്ടുണ്ട്.

രോഗലക്ഷണങ്ങൾ പ്രകടിപ്പിച്ച 35 ഗോത്രവിദ്യാർഥികളുടെ ആരോഗ്യനിലയിൽ ആരോഗ്യവകുപ്പ് പ്രത്യേക നിരീക്ഷണം തുടരുന്നുണ്ട്. യോഗത്തിൽ ഐ.സി.

ബാലകൃഷ്ണൻ എംഎൽഎ, ജില്ലാ പഞ്ചായത്ത് പ്രസിഡന്റ് ചന്ദ്രികാ കൃഷ്ണൻ, കലക്ടർ ഡി.ആർ. മേഘശ്രീ, സബ് കലക്ടർ അതുൽ സാഗർ, ഡിഎംഒ ഡോ.

കെ.ടി. രേഖ തുടങ്ങിയവർ പങ്കെടുത്തു.