ന്യൂഡൽഹി: കേരളം ഉൾപ്പെടെയുള്ള പ്രത്യേക തീവ്ര വോട്ടർ പട്ടിക പുതുക്കൽ (SIR) നടപടികൾ പൂർത്തിയായ സംസ്ഥാനങ്ങളിൽ പുതിയ വോട്ടർമാരായി അപേക്ഷ സമർപ്പിക്കുന്നവർക്ക് ഇനി മുതൽ അധിക സത്യവാങ്മൂലം അഥവാ ഡിക്ലറേഷൻ ഫോം നൽകേണ്ടതില്ല. ഇന്നലെ രാത്രിയോടെ ഔദ്യോഗിക വോട്ടേഴ്സ് പോർട്ടലിൽ നിന്ന് ഡിക്ലറേഷൻ ഫോം പൂർണ്ണമായി ഒഴിവാക്കുകയുണ്ടായി.
ഫോം 6 ചട്ടപ്രകാരം ഔദ്യോഗികമായി ഭേദഗതി വരുത്താതെ തിരഞ്ഞെടുപ്പ് കമ്മിഷൻ സ്വന്തം നിലയിൽ ഡിക്ലറേഷൻ ഫോം ഉൾപ്പെടുത്തിയ നടപടിയിൽ നേരത്തെ തന്നെ തിരഞ്ഞെടുപ്പ് കമ്മിഷണർമാർ ശക്തമായ വിയോജനക്കുറിപ്പുകൾ രേഖപ്പെടുത്തിയിരുന്നു. എസ്ഐആർ നടപടികൾ പൂർത്തിയായ ശേഷവും പുതിയ വോട്ടറായി അപേക്ഷ സമർപ്പിക്കുന്ന വ്യക്തികൾ വീണ്ടും സമാനമായ പരിശോധനകൾക്ക് വിധേയരാകേണ്ടി വരുന്ന സ്ഥിതിയാണ് ഇതോടെ ഒഴിവാക്കപ്പെട്ടിരിക്കുന്നത്.
വിവാദങ്ങൾ ഉയർന്ന പശ്ചാത്തലത്തിൽ, എസ്ഐആർ ഇല്ലാത്ത സമയങ്ങളിൽ ഫോം 6 മാത്രം മതിയാകുമെന്ന് കമ്മിഷൻ കഴിഞ്ഞ ദിവസങ്ങളിൽ വ്യക്തമാക്കിയിരുന്നു. ഫലത്തിൽ കേരളത്തിൽ പുതിയ വോട്ടർ അപേക്ഷ നൽകുന്നവർ ഇനി ഫോം 6 മാത്രം സമർപ്പിച്ചാൽ മതിയാകും.
അതേസമയം, എസ്ഐആർ നടപടികൾ പുരോഗമിക്കുന്ന ഡൽഹി ഉൾപ്പെടെയുള്ള 13 സംസ്ഥാനങ്ങളിൽ നിലവിൽ ഡിക്ലറേഷൻ ഫോം നിർബന്ധമാണ്. ഇവിടെയും എസ്ഐആർ പൂർത്തിയാകുന്ന മുറയ്ക്ക് ഈ ഫോം ഒഴിവാക്കപ്പെടുന്നതാണ്.
എന്താണ് ഡിക്ലറേഷൻ ഫോം? എസ്ഐആർ എന്യൂമറേഷൻ ഫോമിന്റെ ഏകദേശം തനിപ്പകർപ്പാണ് ഡിക്ലറേഷൻ ഫോമും. അപേക്ഷകൻ ഒന്നുകിൽ താൻ മുൻപത്തെ എസ്ഐആർ പട്ടികയിൽ ഉൾപ്പെട്ടിരുന്നുവെന്ന് തെളിയിക്കണം, അല്ലെങ്കിൽ മാതാപിതാക്കളിൽ ആരെങ്കിലും പഴയ പട്ടികയിൽ ഉണ്ടായിരുന്നുവെന്ന് വ്യക്തമാക്കേണ്ടതുണ്ട്.
ഇത് രണ്ടും സാധ്യമാകാത്തവർ നിരവധി അധിക രേഖകൾ ഹാജരാക്കാൻ നിർബന്ധിതരായിരുന്നു. പുതിയ വോട്ടർ പട്ടികയിൽ പേര് ചേർക്കുന്നതിനൊപ്പം, ഒരു സംസ്ഥാനത്ത് നിന്ന് മറ്റൊരു സംസ്ഥാനത്തേക്ക് വോട്ട് മാറ്റുന്നതിനായി ഫോം 8 സമർപ്പിക്കുമ്പോഴും ഈ ഡിക്ലറേഷൻ ഫോം ആവശ്യമായിരുന്നു.
എന്താണ് പ്രധാന പ്രശ്നം? ഫോം 6 ചട്ടപ്രകാരം ഭേദഗതി വരുത്താതെയാണ് കമ്മിഷൻ സ്വന്തം അധികാരത്തിൽ ഡിക്ലറേഷൻ ഫോം കൂടി ഇതിനോടൊപ്പം കൂട്ടിച്ചേർത്തത്. 1960ലെ റജിസ്ട്രേഷൻ ഓഫ് ഇലക്ടറൽ ചട്ടങ്ങളിൽ ഭേദഗതി വരുത്താതെ ഇത്തരമൊരു കൂട്ടിച്ചേർക്കൽ നിയമപരമായി സാധ്യമല്ലെന്ന് കാണിച്ച് മെയ് 16ന് കേന്ദ്ര തിരഞ്ഞെടുപ്പ് കമ്മിഷണർമാരിൽ ഒരാളായ വിവേക് ജോഷി വിയോജനക്കുറിപ്പ് എഴുതിയിരുന്നു.
തുടർന്ന് ഓഗസ്റ്റ് 13ന് മറ്റൊരു തിരഞ്ഞെടുപ്പ് കമ്മിഷണറായ എസ്.എസ്.സന്ധു കൂടി ഇതിനെതിരെ വിമർശനവുമായി കത്ത് അയക്കുകയുണ്ടായി. ഈ മാറ്റം തികച്ചും അനധികൃതവും നിയമവിരുദ്ധവുമാണ് എന്നാണ് അദ്ദേഹം വിശേഷിപ്പിച്ചത്.
ജനങ്ങൾക്ക് ലഭിക്കുന്ന പ്രയോജനം എന്താണ്? പുതിയ തീരുമാനം നിലവിൽ വന്നതോടെ, ഒരു സംസ്ഥാനത്ത് എസ്ഐആർ നടപടികൾ പൂർത്തിയായ ശേഷം ഒരാൾ പുതിയ വോട്ടറായി റജിസ്റ്റർ ചെയ്യുമ്പോഴും അതുപോലെ വോട്ട് മറ്റൊരു സംസ്ഥാനത്തേക്ക് മാറ്റുമ്പോഴും മുൻകാലങ്ങളിലെപ്പോലെ ഫോം 6 മാത്രം പൂരിപ്പിച്ച് നൽകിയാൽ മാത്രം മതിയാകും. ചുരുക്കത്തിൽ ഇതിനായി 2002ലെയും 2003ലെയും എസ്ഐആർ പട്ടികകൾ തേടി അലയേണ്ട
സ്ഥിതി ഒഴിവാകുന്നു. എന്നാൽ, എസ്ഐആറിന്റെ ഭാഗമായി നടപ്പിലാക്കുന്ന ക്ലെയിംസ് ആൻഡ് ഒബ്ജക്ഷൻസ് സമയപരിധിയിൽ ഡിക്ലറേഷൻ ഫോം ഇനിയും ആവശ്യമായി വരും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
