ഗൂഗിളിന്റെ നോട്ട്ബുക്ക് എൽഎമ്മിൽ വൻ അപ്‌ഡേറ്റ്; പുതിയ എഐ കരുത്തിൽ ഗവേഷണങ്ങൾ കൂടുതൽ കാര്യക്ഷമമാകും

ഗൂഗിളിന്റെ എഐ അധിഷ്ഠിത ഗവേഷണ പ്ലാറ്റ്‌ഫോമായ നോട്ട്ബുക്ക് എൽഎം (NotebookLM) വൻ നവീകരണത്തിലേക്ക്. ഉപയോക്താക്കൾക്ക് കൂടുതൽ സങ്കീർണ്ണമായ ഗവേഷണ പ്രോജക്റ്റുകൾ കൈകാര്യം ചെയ്യാൻ സഹായിക്കുന്ന ‘ഏജന്റിക്’ കഴിവുകളും അത്യാധുനിക റീസണിംഗ് സംവിധാനവുമാണ് പുതിയ അപ്‌ഡേറ്റിലൂടെ ഗൂഗിൾ അവതരിപ്പിക്കുന്നത്.

കഴിഞ്ഞ മാസം നടന്ന ഐ/ഓ 2026-ൽ (I/O 2026) പുറത്തിറക്കിയ ജെമിനി 3.5 (Gemini 3.5), ആന്റിഗ്രാവിറ്റി (Antigravity) എന്നീ സാങ്കേതികവിദ്യകൾ ഇനി നോട്ട്ബുക്ക് എൽഎമ്മിലും ലഭ്യമാകും. ഇതിലൂടെ കൂടുതൽ കൃത്യതയാർന്നതും വ്യക്തവുമായ മറുപടികൾ നൽകാൻ പ്ലാറ്റ്‌ഫോമിന് സാധിക്കും.

കൃത്യമായ ഉത്തരത്തിലേക്ക് എത്തിച്ചേരാൻ എഐ സ്വീകരിച്ച ഘട്ടങ്ങൾ ഉപയോക്താക്കൾക്ക് ഇനി നേരിട്ട് കാണാൻ കഴിയും എന്നതാണ് പ്രധാന പ്രത്യേകത. സുരക്ഷിത ക്ലൗഡ് കമ്പ്യൂട്ടിംഗ്
സങ്കീർണ്ണമായ പ്രോജക്റ്റുകൾക്കായി ഓരോ നോട്ട്ബുക്കിലും ഇപ്പോൾ സുരക്ഷിതമായ ക്ലൗഡ് അധിഷ്ഠിത കമ്പ്യൂട്ടർ സൗകര്യം ലഭ്യമാക്കിയിട്ടുണ്ട്.

ഇതിന്റെ സഹായത്തോടെ ഉപയോക്താവിന് വേണ്ടി കോഡിംഗ് നിർവ്വഹിക്കാനും വിശകലനം നടത്താനും എഐക്ക് കഴിയും. നൂറിലധികം സോഫ്റ്റ്‌വെയർ ടൂളുകൾ ഉപയോഗപ്പെടുത്തി ഡാറ്റാ വിശകലനം ചെയ്യാനും ഗ്രാഫിക്കൽ വിവരങ്ങൾ തയ്യാറാക്കാനും ഇതിലൂടെ സാധിക്കും.

വിപുലമായ എക്‌സ്‌പോർട്ട് സൗകര്യം
ലഭ്യമാകുന്ന വിവരങ്ങൾ വിവിധ ഫോർമാറ്റുകളിൽ ഡൗൺലോഡ് ചെയ്യാനുള്ള സൗകര്യം കമ്പനി വർദ്ധിപ്പിച്ചിട്ടുണ്ട്.
* ഡാറ്റാ വിഷ്വലൈസേഷൻ ചാർട്ടുകൾ (png, svg)
* ഡോക്യുമെന്റുകൾ (PDF, docx, markdown, text files)
* നാനോ ബനാന ഉപയോഗിച്ചുള്ള ചിത്രങ്ങൾ (png, jpg, gif)
* സ്ട്രക്ചർഡ് ഡാറ്റ (csv, json)
* മൈക്രോസോഫ്റ്റ് എക്സൽ (xlsx), പവർപോയിന്റ് (pptx)
എന്നിവയിൽ വിവരങ്ങൾ ലഭ്യമാകും. ഫയലുകൾ ജനറേറ്റ് ചെയ്ത ശേഷം അതിൽ ആവശ്യമായ മാറ്റങ്ങൾ വരുത്താനും ഉപയോക്താക്കൾക്ക് അനുവാദമുണ്ട്.

പുതിയ പ്രോജക്റ്റുകൾ എളുപ്പമാക്കുന്നു
നേരത്തെ വിവരങ്ങൾ അപ്‌ലോഡ് ചെയ്താൽ മാത്രമേ നോട്ട്ബുക്ക് എൽഎം ഉപയോഗിക്കാൻ സാധിച്ചിരുന്നുള്ളൂ. എന്നാൽ പുതിയ അപ്‌ഡേറ്റിലൂടെ ഒരു ആശയത്തിൽ നിന്നോ ചോദ്യത്തിൽ നിന്നോ ഗവേഷണം തുടങ്ങാൻ കഴിയും.

അനുബന്ധ വിവരങ്ങൾ വെബിൽ നിന്ന് കണ്ടെത്തി അവ നോട്ട്ബുക്കിലേക്ക് നേരിട്ട് ചേർക്കാനും പുതിയ സംവിധാനം സഹായിക്കും. നിലവിൽ ഗൂഗിൾ എഐ അൾട്രാ (Google AI Ultra) വരിക്കാർക്കും വർക്ക്സ്‌പേസ് ബിസിനസ് ഉപയോക്താക്കൾക്കുമാണ് ഈ സേവനം ലഭ്യമാക്കിയിരിക്കുന്നത്.

വരും ആഴ്ചകളിൽ മറ്റ് ഉപയോക്താക്കൾക്കും ഈ സേവനം ലഭ്യമാകുമെന്ന് ഗൂഗിൾ അറിയിച്ചു.