ബാക്കി വന്ന പായസം ഫ്രിഡ്ജിൽ സൂക്ഷിക്കുമ്പോൾ ഈ കാര്യങ്ങൾ ശ്രദ്ധിക്കുക

ആഘോഷവേളകളും സദ്യവട്ടങ്ങളും കഴിഞ്ഞാൽ മിക്ക വീടുകളിലും പായസം ബാക്കി വരുന്ന പതിവുണ്ട്. മറ്റ് കറികൾ പിറ്റേദിവസത്തേക്ക് ഉപയോഗിക്കാൻ എളുപ്പമാണെങ്കിലും, മിച്ചം വരുന്ന പായസം കേടുകൂടാതെ സൂക്ഷിക്കുക എന്നത് പലപ്പോഴും വീട്ടമ്മമാരെ അലട്ടുന്ന ഒരു കാര്യമാണ്.

പലരും ഇത് ഫ്രിഡ്ജിൽ വെച്ച് ദിവസങ്ങളോളം ഉപയോഗിക്കാറുണ്ടെങ്കിലും, കൃത്യമായ രീതി പാലിച്ചില്ലെങ്കിൽ പായസം പെട്ടെന്ന് ചീത്തയാകാൻ സാധ്യതയുണ്ട്. പായസത്തിൽ ഉപയോഗിക്കുന്ന ചേരുവകൾ ആശ്രയിച്ചാണ് അവ എത്രനാൾ കേടുകൂടാതെയിരിക്കും എന്ന് നിർണ്ണയിക്കപ്പെടുന്നത്.

പാൽ, മിൽക്ക്മെയ്ഡ്, സേമിയ, പാൽപ്പൊടി എന്നിവ ചേർത്ത് തയ്യാറാക്കുന്ന പായസങ്ങൾ രണ്ടോ മൂന്നോ ദിവസത്തിൽ കൂടുതൽ ഫ്രിഡ്ജിൽ സൂക്ഷിക്കുന്നത് ഒഴിവാക്കണം. പശുവിൻ പാൽ അടങ്ങിയവ പെട്ടെന്ന് പിരിഞ്ഞുപോകാനും ചീത്തയാകാനും സാധ്യത കൂടുതലാണ്.

എന്നാൽ, തേങ്ങാപ്പാലും ശർക്കരയും ചേർത്ത് നന്നായി തിളപ്പിച്ചുണ്ടാക്കുന്ന അടപ്രഥമൻ, പരിപ്പ് പ്രഥമൻ പോലുള്ളവ മൂന്നോ നാലോ ദിവസം വരെ ഫ്രിഡ്ജിൽ കേടുകൂടാതെയിരിക്കും. പശുവിൻ പാലിനെ അപേക്ഷിച്ച് തേങ്ങാപ്പാൽ പായസത്തിന് കൂടുതൽ കാലാവധി ലഭിക്കാറുണ്ട്.

ഫ്രിഡ്ജിൽ സൂക്ഷിക്കുമ്പോൾ ഒഴിവാക്കേണ്ട പ്രധാന തെറ്റുകൾ: 1.

ചൂടോടെ ഫ്രിഡ്ജിൽ വെക്കരുത്: ബാക്കി വന്ന പായസം യാതൊരു കാരണവശാലും ചൂടോടുകൂടി ഫ്രിഡ്ജിൽ വെക്കരുത്. ഇത് ഫ്രിഡ്ജിനകത്തെ തണുപ്പ് കുറയ്ക്കുകയും അണുക്കൾ വേഗത്തിൽ വളരാൻ ഇടയാക്കുകയും ചെയ്യും.

2. മുഴുവനായി വീണ്ടും ചൂടാക്കരുത്: ഫ്രിഡ്ജിൽ നിന്ന് പായസം മുഴുവനായി പുറത്തെടുത്ത് ചൂടാക്കിയ ശേഷം, ബാക്കി വരുന്നത് വീണ്ടും ഫ്രിഡ്ജിൽ വെക്കുന്ന ശീലം തെറ്റാണ്.

ഇത് പായസം പെട്ടെന്ന് ചീത്തയാകാൻ കാരണമാകും. കഴിക്കാൻ ആവശ്യമായ അളവിൽ മാത്രം ഒരു ചെറിയ പാത്രത്തിലേക്ക് മാറ്റി ചൂടാക്കുക.

3. തുറന്ന പാത്രത്തിൽ സൂക്ഷിക്കരുത്: അടപ്പില്ലാത്ത പാത്രങ്ങളിൽ പായസം ഫ്രിഡ്ജിൽ വെച്ചാൽ, മറ്റ് ഭക്ഷണസാധനങ്ങളുടെ മണവും ബാക്ടീരിയയും ഇതിലേക്ക് പടരാൻ ഇടയാകും.

അതിനാൽ എപ്പോഴും വായു കടക്കാത്ത ഗ്ലാസ് പാത്രങ്ങളിലോ ഫുഡ്-ഗ്രേഡ് കണ്ടെയ്‌നറുകളിലോ അടച്ചു സൂക്ഷിക്കുക. 4.

വീണ്ടും ചൂടാക്കുമ്പോൾ ശ്രദ്ധിക്കുക: ഫ്രിഡ്ജിൽ നിന്നെടുത്ത തേങ്ങാപ്പാൽ പായസം ഉയർന്ന തീയിലിട്ട് തിളപ്പിക്കരുത്. ഇത് തേങ്ങാപ്പാൽ പിരിഞ്ഞുപോകാൻ കാരണമാകും.

അതിനാൽ എപ്പോഴും കുറഞ്ഞ തീയിൽ ചെറുതായി മാത്രം ചൂടാക്കിയെടുക്കുക.