നേപ്പാളിൽ നിന്നൊരു ഹൃദ്യമായ കാഴ്ച; മഴയെ അവഗണിച്ച് കൈകോർത്ത് സ്കൂളിലേക്ക് നടക്കുന്ന കുട്ടികളുടെ വീഡിയോ വൈറൽ

പ്രകൃതിയുടെ നിഷ്കളങ്കതയും കുട്ടികളുടെ കൂട്ടായ്മയും ഒപ്പിയെടുത്ത ഒരു ദൃശ്യം സമൂഹ മാധ്യമങ്ങളിൽ വലിയ രീതിയിൽ ചർച്ചയാകുന്നു. നേപ്പാളിലെ ഒരു ഗ്രാമീണ മേഖലയിൽ നിന്നുള്ള ഈ ഹൃദ്യമായ വീഡിയോ ഇതിനോടകം തന്നെ നിരവധി പേരുടെ ശ്രദ്ധയാണ് പിടിച്ചുപറ്റിയത്.

യാത്രയ്ക്കിടെ ഈ ദൃശ്യം പകർത്തിയത് അനിൽ ബുഡ് ആണ്. ചാറ്റൽ മഴയെ പോലും വകവെക്കാതെ കുന്നിൻപാതയിലൂടെ കുട്ടികൾ സ്കൂളിലേക്ക് യാത്ര ചെയ്യുന്നതാണ് വീഡിയോയിലുള്ളത്.

തന്റെ നേപ്പാളീസ് യാത്രയ്ക്കിടയിലാണ് അനിൽ ബുഡ് ഈ അപൂർവ്വ നിമിഷം ക്യാമറയിൽ പകർത്തുകയും പിന്നീട് ഇൻസ്റ്റഗ്രാമിൽ പങ്കുവെക്കുകയും ചെയ്തത്. പിങ്ക്, മഞ്ഞ, പച്ച എന്നീ വിവിധ നിറങ്ങളിലുള്ള കുഞ്ഞ് മഴക്കോട്ടുകൾ അണിഞ്ഞാണ് മൂന്ന് കുട്ടികൾ സ്കൂളിലേക്ക് പോകുന്നത്.

മഴ കാരണം ചെളിനിറഞ്ഞ് തെന്നിമാറുന്ന മൺപാതയിലൂടെ പരസ്പരം കൈകോർത്ത് വളരെ കരുതലോടെയാണ് ഇവർ മുന്നോട്ട് നീങ്ങിയത്. കുട്ടികളെ ക്യാമറയിൽ പകർത്തുന്നതിനിടയിൽ അനിൽ ബുഡ് അവരെ വിളിക്കാൻ ശ്രമിച്ചെങ്കിലും, ലക്ഷ്യത്തിൽ മാത്രം ശ്രദ്ധ കേന്ദ്രീകരിച്ച അവർ അതിന് മുതിരാതെ യാത്ര തുടരുകയായിരുന്നു.

ഇതിൽ ഏറ്റവും ചെറിയ കുട്ടിയുടെ ആത്മവിശ്വാസത്തോടെയുള്ള നടപ്പ് ഏറെ ശ്രദ്ധിക്കപ്പെട്ടു. സമൂഹ മാധ്യമങ്ങളിൽ ഇതിനോടകം ലക്ഷക്കണക്കിന് ആളുകളാണ് ഈ ദൃശ്യം കണ്ടത്.

കുട്ടികളുടെ പരസ്പരമുള്ള കരുതലും നിഷ്കളങ്കതയും പലരുടെയും സ്കൂൾകാല ഓർമ്മകളെ ഉണർത്തി. ചിലർ വീഡിയോയുടെ ആധികാരികതയെ ചോദ്യം ചെയ്ത് രംഗത്തെത്തിയെങ്കിലും, ദൃശ്യത്തിലെ മനോഹാരിതയും ഗ്രാമീണ സൗന്ദര്യവും ഏറെ പ്രശംസിക്കപ്പെട്ടു.

അപരിചിതരുടെ വിളികളിൽ ശ്രദ്ധ തിരിക്കാതെ തങ്ങളുടെ യാത്രയിൽ മാത്രം ശ്രദ്ധ കേന്ദ്രീകരിച്ച കുട്ടികളുടെ ജാഗ്രതയും സമൂഹ മാധ്യമങ്ങളിൽ വലിയ ചർച്ചയായിട്ടുണ്ട്.