അമേരിക്കയിൽ നിന്ന് മുംബൈയിലേക്ക് മടങ്ങിയ അമ്മയ്ക്ക് പ്രവാസി യുവാവിന്റെ അപ്രതീക്ഷിത ഫസ്റ്റ് ക്ലാസ് സമ്മാനം; വീഡിയോ വൈറൽ

മക്കൾക്കായി മാതാപിതാക്കൾ ജീവിതകാലം മുഴുവൻ അനുഭവിക്കുന്ന കഷ്ടപ്പാടുകൾക്കും നൽകുന്ന കരുതലിനും പകരമായി ചെറിയ സമ്മാനങ്ങൾ നൽകി സ്നേഹം പ്രകടിപ്പിക്കാറുണ്ട്. അത്തരത്തിൽ അമേരിക്കയിൽ പ്രവാസിയായ ഒരു യുവാവ് തന്റെ അമ്മയ്ക്ക് നൽകിയ വ്യത്യസ്തമായ ഒരു സർപ്രൈസ് സമ്മാനമാണ് ഇപ്പോൾ സമൂഹമാധ്യമങ്ങളിൽ വ്യാപകമായി ശ്രദ്ധിക്കപ്പെടുന്നത്.

സാൻ ഫ്രാൻസിസ്കോ വിമാനത്താവളത്തിൽ നിന്നും മുംബൈയിലേക്കുള്ള മടക്കയാത്രയ്ക്കായി എത്തിയ അമ്മയ്ക്കാണ് അതുൽ എന്ന യുവാവ് എമിറേറ്റ്‌സ് വിമാനത്തിന്റെ ഫസ്റ്റ് ക്ലാസ് ടിക്കറ്റ് അപ്‌ഗ്രേഡ് ചെയ്ത് നൽകി അവിസ്മരണീയമായ അനുഭവം സമ്മാനിച്ചത്. പരമ്പരാഗത ശൈലിയിലുള്ള സാരി ധരിച്ച് എമിറേറ്റ്‌സിന്റെ ചെക്ക്-ഇൻ കൗണ്ടറിന് മുന്നിൽ ബോർഡിംഗ് പാസും പാസ്‌പോർട്ടും കൈയിലേന്തി നിൽക്കുന്ന അമ്മയുടെ വീഡിയോ ദൃശ്യങ്ങൾ അതുൽ തന്റെ ഇൻസ്റ്റഗ്രാം അക്കൗണ്ടിലൂടെയാണ് പങ്കുവെച്ചിരിക്കുന്നത്.

താൻ സാധാരണ ബിസിനസ് ക്ലാസിലാണ് മുംബൈയിലേക്ക് യാത്ര തിരിക്കുന്നതെന്നാണ് പ്രാരംഭത്തിൽ അമ്മ ധരിച്ചിരുന്നത്. എന്നാൽ, കയ്യിലിരുന്ന ബോർഡിംഗ് പാസിലേക്ക് ഒന്നു കൂടി സൂക്ഷിച്ചു നോക്കാൻ മറാത്തി ഭാഷയിൽ മകൻ ആവശ്യപ്പെടുകയായിരുന്നു.

ടിക്കറ്റിൽ ‘FIRST’ എന്ന് പ്രിന്റ് ചെയ്തിരിക്കുന്നത് ശ്രദ്ധയിൽപ്പെട്ടതോടെയാണ് തനിക്ക് ലഭിച്ചത് ഫസ്റ്റ് ക്ലാസ് യാത്രാ ടിക്കറ്റാണെന്ന സത്യം ആ അമ്മ തിരിച്ചറിയുന്നത്. ആദ്യം അല്പം ആശയക്കുഴപ്പത്തിലായെങ്കിലും, സന്തോഷവാർത്ത ഉൾക്കൊള്ളാനാവാതെ നെറ്റിയിൽ കൈവെച്ച് അത്ഭുതപ്പെടുന്ന അമ്മയുടെ മുഖഭാവം നിമിഷങ്ങൾക്കകം നിറഞ്ഞ ചിരിയിലേക്കും സന്തോഷത്തിലേക്കും വഴിമാറി.

ഈ മനോഹരമായ സർപ്രൈസിന് പിന്നിലെ വൈകാരികമായ കാരണവും സമൂഹമാധ്യമങ്ങളിലെ കുറിപ്പിലൂടെ അതുൽ പങ്കുവെച്ചിട്ടുണ്ട്. ‘മുംബൈയിലേക്കുള്ള യാത്ര ബിസിനസ് ക്ലാസിലാണെന്നാണ് ഞാൻ അമ്മയോട് പറഞ്ഞിരുന്നത്.

അതിന് പകരമായി എനിക്ക് ചെയ്യാൻ കഴിയുന്ന ഏറ്റവും ചെറിയ കാര്യമാണിത്’ എന്നാണ് അതുൽ ഇൻസ്റ്റഗ്രാമിൽ കുറിച്ചത്. അമ്മയും മകനും തമ്മിലുള്ള ഈ ആത്മബന്ധവും സ്നേഹവും വ്യക്തമാക്കുന്ന ദൃശ്യങ്ങൾ വളരെ പെട്ടെന്നാണ് ഓൺലൈനിൽ വൈറലായി മാറിയത്.