തുടർച്ചയായ രണ്ടാം തവണയും ഐപിഎൽ കിരീടത്തിൽ മുത്തമിട്ട് റോയൽ ചലഞ്ചേഴ്സ് ബെംഗളൂരു ചരിത്രം കുറിച്ചു. ഫൈനൽ മത്സരത്തിൽ ഗുജറാത്തിനെ അഞ്ച് വിക്കറ്റിന് പരാജയപ്പെടുത്തിയാണ് ടീം തങ്ങളുടെ ആധിപത്യം തുടർന്നത്.
156 റൺസ് വിജയലക്ഷ്യം പിന്തുടർന്ന ബെംഗളൂരു രണ്ട് ഓവറുകൾ ബാക്കിനിൽക്കെയാണ് ലക്ഷ്യത്തിലെത്തിയത്. ഈ വിജയത്തിൽ നിർണ്ണായകമായത് മുൻ നായകൻ വിരാട് കോലിയുടെ ബാറ്റിങ് പ്രകടനമാണ്.
42 പന്തിൽ നിന്ന് 75 റൺസ് അടിച്ചുകൂട്ടിയ കോലി, ഐപിഎൽ ചരിത്രത്തിലെ തന്നെ ഏറ്റവും വേഗമേറിയ അർധ സെഞ്ച്വറികളിലൊന്ന് സ്വന്തം പേരിലാക്കി. വെറും 25 പന്തുകളിലായിരുന്നു കോലിയുടെ അർധ സെഞ്ച്വറി നേട്ടം.
ഐപിഎൽ ഫൈനലിൽ കോലി അർധ സെഞ്ച്വറി നേടുന്നത് ഇത് രണ്ടാം തവണയാണ്. ഗുജറാത്ത് നിശ്ചിത ഓവറിൽ എട്ട് വിക്കറ്റ് നഷ്ടത്തിൽ 155 റൺസാണ് നേടിയത്.
മറുപടി ബാറ്റിങ്ങിനിറങ്ങിയ ബെംഗളൂരുവിന് വെങ്കിടേഷ് അയ്യരും വിരാട് കോലിയും ചേർന്ന് മികച്ച തുടക്കമാണ് സമ്മാനിച്ചത്. ഒന്നാം വിക്കറ്റ് കൂട്ടുകെട്ടിൽ ഇവർ 62 റൺസ് സ്കോർ ബോർഡിൽ എത്തിച്ചു.
തുടർന്ന് ഇടവേളകളിൽ വിക്കറ്റുകൾ വീണെങ്കിലും, ക്രീസിൽ ഉറച്ചുനിന്ന കോലി ടീമിനെ വിജയതീരത്തെത്തിക്കുകയായിരുന്നു. പതിനേഴ് സീസണുകൾ കിരീടമില്ലാതെ മടങ്ങിയ ബെംഗളൂരു, പതിനെട്ടും പത്തൊൻപതും സീസണുകളിൽ തുടർച്ചയായ വിജയങ്ങൾ സ്വന്തമാക്കി ഐപിഎൽ ചരിത്രത്തിൽ തങ്ങളുടെ പേര് എഴുതിച്ചേർത്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
