തലസ്ഥാന നഗരിയിൽ വരും ദിവസങ്ങളിൽ കർശന ഗതാഗത നിയന്ത്രണങ്ങൾ ഏർപ്പെടുത്തിക്കൊണ്ട് പൊലീസ് ഉത്തരവ് പുറത്തിറങ്ങി. 26, 27 തീയതികളിലാണ് നഗരത്തിൽ പ്രത്യേക നിയന്ത്രണങ്ങൾ ബാധകമാക്കിയിരിക്കുന്നത്.
കേന്ദ്ര ആഭ്യന്തരമന്ത്രി അമിത് ഷായുടെ സന്ദർശനം, ഉപരാഷ്ട്രപതി സി.പി.രാധാകൃഷ്ണൻ നഗരത്തിലെത്തുന്നതുമായി ബന്ധപ്പെട്ട സുരക്ഷാ ക്രമീകരണങ്ങൾ, കൂടാതെ കാര്യവട്ടത്ത് നടക്കുന്ന അന്താരാഷ്ട്ര ക്രിക്കറ്റ് മത്സരം എന്നിവ മുൻനിർത്തിയാണ് ഗതാഗത സംവിധാനങ്ങളിൽ മാറ്റങ്ങൾ വരുത്തിയിട്ടുള്ളത്.
ഈ ദിവസങ്ങളിൽ നഗരത്തിലെ വിവിധ ഭാഗങ്ങളിൽ വാഹനങ്ങൾ വഴിതിരിച്ചുവിടുന്നതും റോഡുകളിൽ കർശന പാർക്കിങ് നിരോധനവും ഉണ്ടായിരിക്കുന്നതാണ്. വിമാനത്താവളത്തിലേക്ക് യാത്രാസൗകര്യം തേടുന്നവർ യാത്രകൾ ഇതിനനുസരിച്ച് മുൻകൂട്ടി ക്രമീകരിക്കണമെന്ന് പൊലീസ് ഔദ്യോഗികമായി അറിയിച്ചു.
കേന്ദ്ര ആഭ്യന്തരമന്ത്രിയുടെ സന്ദർശനത്തോടനുബന്ധിച്ച് 26-ാം തീയതി രാവിലെ 11 മുതൽ രാത്രി 9 വരെയാണ് നഗരത്തിൽ ഗതാഗത തടസ്സമോ നിയന്ത്രണമോ ഏർപ്പെടുത്തിയിട്ടുള്ളത്. അദ്ദേഹം സഞ്ചരിക്കുന്ന പ്രധാന പാതകളിലേക്കുള്ള ഇടറോഡുകളിലും സുരക്ഷയുടെ ഭാഗമായി പ്രത്യേക ക്രമീകരണങ്ങൾ നിലവിൽ വരും.
തുടർന്ന്, ഉപരാഷ്ട്രപതി സി.പി.രാധാകൃഷ്ണൻ എത്തുന്നതിന്റെ ഭാഗമായി 27-ാം തീയതി രാവിലെ 7 മുതൽ രാത്രി 8 വരെയാണ് നിയന്ത്രണം പ്രഖ്യാപിച്ചിരിക്കുന്നത്. ഇതിന്റെ ഭാഗമായി വിമാനത്താവളം മുതൽ കോവളം മുക്കോല വരെയുള്ള റൂട്ടുകളിൽ ഗതാഗത നിയന്ത്രണങ്ങളും സുരക്ഷാ ക്രമീകരണങ്ങളും കർശനമാക്കിയിട്ടുണ്ട്.
ഇതിനുപുറമെ, കാര്യവട്ടം ഗ്രീൻഫീൽഡ് സ്റ്റേഡിയത്തിൽ അരങ്ങേറുന്ന ഇന്ത്യ–വെസ്റ്റിൻഡീസ് ഏകദിന ക്രിക്കറ്റ് മത്സരത്തോടനുബന്ധിച്ചും ഗതാഗത സംവിധാനങ്ങൾ മാറ്റിയിട്ടുണ്ട്. 27-ാം തീയതി രാവിലെ 10 മുതൽ രാത്രി 12 വരെയാണ് ഈ മേഖലയിൽ നിയന്ത്രണം ഏർപ്പെടുത്തിയിരിക്കുന്നത്.
മത്സരം വീക്ഷിക്കാൻ എത്തുന്ന കാണികളുടെ വാഹനങ്ങൾ ഒഴികെ മറ്റൊരു വാഹനത്തിനും കാര്യവട്ടം റോഡിലേക്ക് പ്രവേശനം അനുവദിക്കുന്നതല്ല.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
