ഭാഗ്യദേവത ആരെ കടാക്ഷിക്കും; റെക്കോർഡ് വിൽപ്പനയുമായി തിരുവോണം ബംപർ നറുക്കെടുപ്പ് ഇന്ന്

സംസ്ഥാന സർക്കാരിന്റെ അഭിമാനകരമായ തിരുവോണം ബംപർ ലോട്ടറി നറുക്കെടുപ്പ് ഇന്ന് ഉച്ചയ്ക്ക് 1.30-ന് തിരുവനന്തപുരം ഗോര്‍ക്കി ഭവനില്‍ നടക്കും. 30 കോടി രൂപ ഒന്നാം സമ്മാനമുള്ള ടിക്കറ്റിന്റെ നറുക്കെടുപ്പ് ഉദ്ഘാടനം മന്ത്രി കെ.മുരളീധരൻ നിർവഹിക്കും.

ഇത്തവണ അച്ചടിച്ച 90 ലക്ഷം ടിക്കറ്റുകളും പൂർണ്ണമായി വിറ്റുതീർന്നിട്ടുണ്ട്. ടിക്കറ്റ് വിൽപ്പനയിലൂടെ സർക്കാരിന് 450 കോടി രൂപയാണ് ലഭിച്ചത്.

ഇതിൽനിന്ന് സമ്മാനത്തുക, ജിഎസ്ടി, അച്ചടി ചെലവുകൾ എന്നിവ മാറ്റിവെച്ചുള്ള തുകയാകും ബാക്കി വരുക. ഒന്നാം സമ്മാനാർഹമായ ടിക്കറ്റിന് അർഹനാകുന്ന വ്യക്തിക്ക് ഏജന്റ് കമ്മീഷനും നികുതിയും കഴിഞ്ഞ് കൃത്യം 16.47 കോടി രൂപയാകും അക്കൗണ്ടിൽ ലഭ്യമാകുക.

ആകെ തുകയുടെ 10 ശതമാനമായ (3 കോടി രൂപ) കമ്മീഷൻ ഏജന്റിന് ലഭിക്കും. ബാക്കി വരുന്ന 27 കോടി രൂപയിൽ ആദായനികുതി (30 ശതമാനം), സർചാർജ് (25 ശതമാനം), ആരോഗ്യ-വിദ്യാഭ്യാസ സെസ് (4 ശതമാനം) എന്നിവ ഉൾപ്പെടെ ഏകദേശം 10.53 കോടി രൂപയാണ് നികുതിയിനത്തിൽ പിടിക്കുക.

ഏറ്റവും കൂടുതൽ ടിക്കറ്റുകൾ വിറ്റഴിക്കപ്പെട്ടത് പതിവുപോലെ പാലക്കാട് ജില്ലയിലാണ് (20.95 ലക്ഷം ടിക്കറ്റുകൾ). തൃശൂർ ജില്ല (10.62 ലക്ഷം) രണ്ടാം സ്ഥാനത്തും തിരുവനന്തപുരം (8.64 ലക്ഷം) മൂന്നാം സ്ഥാനത്തും എത്തി.

ഏറ്റവും കുറവ് ടിക്കറ്റുകൾ വിറ്റത് കാസര്‍കോട് ജില്ലയിലാണ് (2.71 ലക്ഷം). വിൽപന പൂർണ്ണമായതിനാൽ ഇത്തവണ നറുക്കെടുപ്പ് നടപടികൾ വേഗത്തിൽ തീർക്കാൻ സാധിക്കും.

500 രൂപ മുഖവിലയുള്ള ഒരു ടിക്കറ്റിൽ 357.14 രൂപയാണ് യഥാർത്ഥ വിലയെങ്കിൽ, 142.86 രൂപ ജിഎസ്ടി ഇനത്തിലാണ് ഈടാക്കുന്നത്. ആകെ സമ്മാനത്തുക 125.54 കോടി രൂപയാണ്.

ഒന്നാം സമ്മാനത്തിന് പുറമെ ഒരു കോടി രൂപ വീതം 20 പേർക്ക് രണ്ടാം സമ്മാനമായി ലഭിക്കും. ഓരോ സീരീസിലെയും രണ്ടുപേർ വീതം കോടിപതികളായി മാറും.

ഇതുവഴി ആകെ 21 പേരാണ് കോടിപതികളാകുക. കൂടാതെ 25 ലക്ഷം രൂപ വീതം 20 പേർക്ക് മൂന്നാം സമ്മാനവും, 5 ലക്ഷം രൂപ വീതം 10 പേർക്ക് നാലാം സമ്മാനവും, 2 ലക്ഷം രൂപ വീതം 10 പേർക്ക് അഞ്ചാം സമ്മാനവും നൽകും.

500, 1000, 2000, 5000 രൂപയുടെ മറ്റ് സമ്മാനങ്ങളും ഒമ്പത് പേർക്ക് 5 ലക്ഷം രൂപ വീതം സമാശ്വാസ സമ്മാനവും ഇതിൽ ഉൾപ്പെടുന്നു. സമ്മാനാർഹമായ ടിക്കറ്റ് ലഭിക്കുന്നവർ എത്രയും വേഗം അതിന്റെ പുറത്തുവശത്ത് പേരും ഒപ്പും രേഖപ്പെടുത്തി ആവശ്യമായ രേഖകൾ സഹിതം ഏൽപ്പിക്കേണ്ടതാണ്.

പാൻ കാർഡും ആർബിഐ അംഗീകാരമുള്ള ബാങ്കിൽ അക്കൗണ്ടും നിർബന്ധമാണ്. ലോട്ടറി ഏജൻസിയിലോ ബാങ്കിലോ ജില്ലാ ലോട്ടറി ഓഫീസിലോ ആണ് ടിക്കറ്റ് സമർപ്പിക്കേണ്ടത്.

രേഖകൾ സമർപ്പിച്ച് 15 മുതൽ 20 ദിവസത്തിനകം തുക അക്കൗണ്ടിലെത്തും. 30 ദിവസത്തിനകം ടിക്കറ്റ് ഹാജരാക്കാൻ സാധിച്ചില്ലെങ്കിൽ ജില്ലാ ലോട്ടറി ഓഫീസറെയും പിന്നീട് ഡയറക്ടറേറ്റിലെത്തി ഡയറക്ടറെയും കാരണം ബോധ്യപ്പെടുത്തി പരമാവധി 90 ദിവസത്തിനകം ടിക്കറ്റ് സമർപ്പിക്കാവുന്നതാണ്.