നവകേരള യാത്ര: സുരക്ഷാ ഉദ്യോഗസ്ഥരുടെ നടപടി ചട്ടലംഘനമെന്ന് എസ്ഐടി റിപ്പോർട്ട്; ‘രക്ഷാപ്രവർത്തനം’ ഔദ്യോഗിക കൃത്യനിർവ്വഹണമല്ല

മുൻ മുഖ്യമന്ത്രിയുടെ നവകേരള യാത്രയ്ക്കിടെ ആലപ്പുഴയിൽ കെഎസ്‌യു, യൂത്ത് കോൺഗ്രസ് നേതാക്കളെ മർദിച്ച സുരക്ഷാ സംഘത്തിന്റെ നടപടി അതീവ ഗൗരവതരമായ ചട്ടലംഘനമെന്ന് പ്രത്യേക അന്വേഷണ സംഘത്തിന്റെ (എസ്ഐടി) കണ്ടെത്തൽ. സുരക്ഷാ ഉദ്യോഗസ്ഥരുടെ ഈ പ്രവൃത്തി ‘ഔദ്യോഗിക കൃത്യനിർവ്വഹണം’ എന്ന പരിധിയിൽ വരില്ലെന്ന് റിപ്പോർട്ടിൽ വ്യക്തമാക്കുന്നു.

പിണറായി വിജയന്റെ ഗൺമാനും സംഘവും സ്വീകരിച്ച നടപടികൾ സെഡ് പ്ലസ് കാറ്റഗറി സുരക്ഷാ സംവിധാനങ്ങളുടെ അടിസ്ഥാന തത്വങ്ങൾക്ക് വിരുദ്ധമാണ്. കേന്ദ്ര സർക്കാരിന്റെ യെലോ ബുക്ക് മാനദണ്ഡങ്ങൾ ലംഘിക്കപ്പെട്ടു
വിഐപി സുരക്ഷ സംബന്ധിച്ച് കേന്ദ്ര സർക്കാർ പുറത്തിറക്കിയ ‘യെലോ ബുക്ക്’ നിർദ്ദേശങ്ങൾ പ്രകാരം, സുരക്ഷാ സംഘത്തിന്റെ പ്രധാന ഉത്തരവാദിത്തം വിഐപിയെ സുരക്ഷിതമായി ലക്ഷ്യസ്ഥാനത്ത് എത്തിക്കുക എന്നത് മാത്രമാണ്.

സംഘർഷസാധ്യതയുള്ള സ്ഥലങ്ങളിൽ നിന്ന് വിഐപിയെ മാറ്റി സുരക്ഷിതനാക്കിയ ശേഷം, ക്രമസമാധാന പാലനം ലോക്കൽ പൊലീസിന് കൈമാറുകയാണ് വേണ്ടത്. എന്നാൽ, 2023 ഡിസംബർ 15-ന് മുഖ്യമന്ത്രിയുടെ ബസിനുനേരെ കരിങ്കൊടി കാണിച്ച കെഎസ്‌യു ജില്ലാ പ്രസിഡന്റ് എ.ഡി.തോമസിനെയും യൂത്ത് കോൺഗ്രസ് സംസ്ഥാന സെക്രട്ടറി അജയ് ജ്യുവൽ കുര്യാക്കോസിനെയും മർദിച്ച ഉദ്യോഗസ്ഥർ ഈ ചട്ടങ്ങളെ കാറ്റിൽ പറത്തിയതായി എസ്ഐടി ചൂണ്ടിക്കാട്ടുന്നു.

ഗുരുതരമായ സുരക്ഷാവീഴ്ചകൾ
സുരക്ഷാ ഉദ്യോഗസ്ഥർ വിഐപിയുടെ ഏറ്റവും അടുത്തായിരിക്കണമെന്നും അദ്ദേഹത്തിന്റെ വാഹനം നീങ്ങുമ്പോൾ മാത്രം ഒപ്പം സഞ്ചരിക്കണമെന്നുമാണ് ചട്ടം. എന്നാൽ, പിണറായി വിജയന്റെ വാഹനം കടന്നുപോയ ശേഷം വാഹനം നിർത്തി പുറത്തിറങ്ങിയ സുരക്ഷാ ഉദ്യോഗസ്ഥർ പ്രതിഷേധക്കാരെ മർദിക്കുകയായിരുന്നു.

ഇവർ വാഹനവ്യൂഹത്തിൽ നിന്ന് വിട്ടുനിന്നത് വലിയ സുരക്ഷാവീഴ്ചയായാണ് വിലയിരുത്തപ്പെടുന്നത്. കൂടാതെ, സുരക്ഷാ ഉദ്യോഗസ്ഥരുടെ വാഹനങ്ങൾ നടുറോഡിൽ നിർത്തിയത് ആംബുലൻസുകളും അഗ്നിരക്ഷാസേനയുടെ വാഹനങ്ങളും ഉൾപ്പെടെയുള്ള വാഹനവ്യൂഹത്തെ ഗതാഗതക്കുരുക്കിലാക്കി.

അനധികൃത ആയുധങ്ങളുടെ ഉപയോഗം
സംഭവസ്ഥലത്ത് ലോക്കൽ പൊലീസ് പ്രതിഷേധക്കാരെ ശാന്തരാക്കിയ ശേഷമാണ് സുരക്ഷാ ഉദ്യോഗസ്ഥർ മർദനം നടത്തിയത്. പൊലീസ് വകുപ്പ് ഔദ്യോഗികമായി നൽകുന്ന തോക്കുകൾക്ക് പകരം നീളമേറിയ ചൂരൽവടികളാണ് ഇവർ ഉപയോഗിച്ചത്.

ഇത്തരത്തിലുള്ള ആയുധങ്ങൾ പൊലീസ് സേന ആർക്കും നൽകിയിട്ടില്ലെന്ന് എസ്ഐടി സ്ഥിരീകരിച്ചു. നിലവിൽ മാധ്യമപ്രവർത്തകരുടെ പക്കൽനിന്നും സിസിടിവി ദൃശ്യങ്ങളിൽ നിന്നും ലഭിച്ച തെളിവുകൾ കോടതിയിൽ സമർപ്പിച്ചിട്ടുണ്ട്.

കേസിലെ അഞ്ച് പ്രതികളായ ഉദ്യോഗസ്ഥരെ ചോദ്യം ചെയ്യുന്നതിനായി വിപുലമായ തെളിവുശേഖരണമാണ് നടക്കുന്നത്. തുടർ നടപടികളുടെ ഭാഗമായി പ്രതികൾക്ക് ഉടൻ തന്നെ നോട്ടിസ് അയക്കുമെന്ന് അന്വേഷണ സംഘം അറിയിച്ചു.