മന്ത്രിമാരുടെ ചാർട്ടേഡ് വിമാന യാത്ര; സ്പോൺസർമാരെ മുഖ്യമന്ത്രി മറച്ചുപിടിക്കുന്നുവെന്ന് പി. രാജീവ്

കൊച്ചി: മന്ത്രിമാരുടെ യാത്രാ വിവാദത്തിൽ സംസ്ഥാന സർക്കാരിനെതിരെ രൂക്ഷ വിമർശനവുമായി സിപിഎം കേന്ദ്രകമ്മിറ്റിയംഗം പി. രാജീവ് രംഗത്ത്.

ചാർട്ടേഡ് വിമാനയാത്രയുടെ സ്പോൺസർ ആരെന്ന് മുഖ്യമന്ത്രി മറച്ചുവയ്ക്കുന്നുവെന്ന് അദ്ദേഹം കുറ്റപ്പെടുത്തി. മന്ത്രിമാരുടേത് ഇരിക്കുന്ന സ്ഥാനം മറന്നുള്ള പ്രസ്താവനകളാണെന്നും സർക്കാരിന് നഷ്ടം ഇല്ലെന്ന വാദം തെറ്റാണെന്നും അദ്ദേഹം വ്യക്തമാക്കി.

മുഖ്യമന്ത്രിയുടെ യാത്രകൾ അങ്ങേയറ്റം ദുരൂഹമാണെന്നാണ് അദ്ദേഹം ആരോപിക്കുന്നത്. ചാർട്ടേർഡ് വിമാനയാത്രയുടെ സ്പോൺസർ ആരെന്ന് മുഖ്യമന്ത്രി മറച്ചു വയ്ക്കുന്നു.

നേരത്തെ മംഗലപുരം യാത്രയും ആര് സ്പോൺസർ ചെയ്തെന്നത് മറച്ചു വച്ചു. ഇത് ജനങ്ങളുടെ സർക്കാർ അല്ല, മുതലാളിമാരുടെ സർക്കാരാണ്.

വൈദ്യുതി ഇല്ലാതെ നാട്ടുകാർ ബുദ്ധിമുട്ടുമ്പോൾ സ്വകാര്യ നിമിഷങ്ങൾ ആസ്വദിക്കേണ്ടതില്ലേ എന്ന് പറയുന്ന നീറോ ചക്രവർത്തിമാരാണ് കേരളം ഭരിക്കുന്നത്. സണ്ണി ജോസഫ് ഇതുവരെ മന്ത്രിയുടെ പക്വതയിലേക്ക് എത്തിയിട്ടില്ല.

ഇരിക്കുന്ന സ്ഥാനം മറന്നുള്ള പ്രസ്താവനകൾ തുടരുകയാണ് മന്ത്രിമാർ. സ്പോൺസർമാരുടെ ചിലവിലാകുമ്പോൾ സർക്കാരിന് നഷ്ടം ഇല്ലെന്ന വാദം തെറ്റാണ്.

മന്ത്രിമാർക്ക് സൗജന്യം നൽകാൻ നിരവധി പേരുണ്ടാകും. സമ്മർദ്ദങ്ങൾക്കും താത്പര്യങ്ങൾക്കും വിധേയരാവാതിരിക്കാനാണ് സർക്കാർ തന്നെ ചെലവുകൾ വഹിക്കുന്നതെന്നും മുൻ വ്യവസായ വകുപ്പ് മന്ത്രി കൂടിയായ അദ്ദേഹം കൂട്ടിച്ചേർത്തു.