വിവാദപരമായ മുട്ടിൽ മരംമുറി വഞ്ചനക്കേസിലെ വിചാരണ നടപടികൾ സ്റ്റേ ചെയ്യണമെന്ന് ആവശ്യപ്പെട്ട് പ്രതികൾ സമർപ്പിച്ച ഹർജി സുപ്രീംകോടതി നാളെ പരിഗണനയ്ക്ക് എടുക്കും. റോജി അഗസ്റ്റിൻ, ആന്റോ അഗസ്റ്റിൻ, ജോസ്കുട്ടി അഗസ്റ്റിൻ എന്നിവരാണ് കോടതിയെ സമീപിച്ചിരിക്കുന്നത്.
ജസ്റ്റിസ് ജെ.ബി. പർദ്ദിവാല അധ്യക്ഷനായ ബെഞ്ചാണ് ഈ ഹർജിയിൽ വാദം കേൾക്കുന്നത്.
ചോറ്റാനിക്കര ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിലെ നിലവിലുള്ള വിചാരണ നടപടികൾ പൂർണ്ണമായി നിർത്തിവയ്ക്കണമെന്നാണ് പ്രതികളുടെ പ്രധാന ആവശ്യം. ഇതുമായി ബന്ധപ്പെട്ട് പ്രതികൾ നൽകിയിരുന്ന സമാനമായ ഹർജി നേരത്തെ ഹൈക്കോടതി തള്ളിക്കളഞ്ഞിരുന്നു.
വയനാട്ടിലെ കേസിൽ അന്തിമ അന്വേഷണ റിപ്പോർട്ട് സമർപ്പിക്കുന്നത് വരെ ചോറ്റാനിക്കര കോടതിയിലെ വിചാരണ നടപടികൾ തടയണമെന്നായിരുന്നു ഇവരുടെ ആവശ്യം. എന്നാൽ ഈ വാദം ഹൈക്കോടതി തള്ളുകയായിരുന്നു.
തുടർന്ന് ചോറ്റാനിക്കര കോടതിയിൽ വിചാരണ നടപടികൾ പുനരാരംഭിക്കാൻ നിർദ്ദേശം ലഭിച്ചതോടെയാണ് പ്രതികൾ സുപ്രീംകോടതിയെ സമീപിച്ചത്. വയനാട് മേപ്പാടി റേഞ്ചിൽ നിന്ന് നിയമവിരുദ്ധമായി മുറിച്ചുകടത്തിയ തടികൾ വനംവകുപ്പിന്റെ ഔദ്യോഗിക അനുമതിയുള്ളതാണെന്ന് തെറ്റിദ്ധരിപ്പിച്ച് വ്യവസായിക്ക് വിറ്റ് 1.40 കോടി രൂപ തട്ടിയെടുത്തു എന്നതാണ് അമ്പലമേട് പോലീസ് രജിസ്റ്റർ ചെയ്തിട്ടുള്ള ഈ കേസ്.
ഹൈക്കോടതിയുടെ മുൻ ഉത്തരവ് തിരിച്ചടിയായ സാഹചര്യത്തിലാണ് അഗസ്റ്റിൻ സഹോദരന്മാർ സുപ്രീംകോടതിയിൽ നിന്ന് അടിയന്തര നിയമപരമായ ആശ്വാസം തേടുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
