ഉത്തരേന്ത്യൻ വിപണിയിൽ ഡിമാൻഡ്േറി; വയനാട്ടിൽ പനങ്കുരു കൃഷിയിടങ്ങളിൽ പുതിയ വരുമാന സ്രോതസാകുന്നു

പനമരം പനമരം മേഖലയിൽ മുൻകാലങ്ങളിൽ ആർക്കും വേണ്ടാതെ കൃഷിയിടങ്ങളിൽ വീണു നശിച്ചിരുന്ന പനങ്കുരുവിന് വിപണിയിൽ ഇപ്പോൾ മികച്ച സ്വീകാര്യത. പച്ചക്കുരുവിന് നിലവിൽ കിലോയ്ക്ക് 13 രൂപ മുതൽ 15 രൂപ വരെയാണ് വില ലഭിക്കുന്നത്.

അതേസമയം, പച്ചക്കുരു വെള്ളത്തിലിട്ട് ചീയിച്ച ശേഷം തൊലികളഞ്ഞ് പരിപ്പാക്കി മാറ്റിയാൽ കിലോയ്ക്ക് 45 മുതൽ 60 രൂപ വരെ കർഷകർക്ക് ലഭിക്കും. ഉയർന്ന ഗുണനിലവാരമുള്ള ഒന്നാംതരം ഉണക്കക്കുരുവിന് വിപണിയിൽ 90 രൂപ വരെയാണ് വിലയുള്ളത്.

പനമരം, കണിയാമ്പറ്റ, കോട്ടത്തറ പഞ്ചായത്തുകളിൽ പനങ്കുരു തേടി നിരവധി ആളുകളാണ് എത്തിച്ചേരുന്നത്. നല്ല സാമ്പത്തിക നേട്ടം ലഭിക്കുന്നുണ്ടെങ്കിലും വിളവെടുപ്പ് ജോലികൾ ഏറെ ദുഷ്കരമാണ്.

ഉയരമുള്ള പനകളിൽ കയറാൻ വിദഗ്ധരായ തൊഴിലാളികൾ തന്നെ ആവശ്യമാണ്. പനങ്കുല വെട്ടിയെടുക്കുന്ന വേളയിൽ കടുത്ത ചൊറിച്ചിൽ അനുഭവപ്പെടുന്നതിനാൽ സാധാരണക്കാർ ഈ ജോലിക്കായി തയ്യാറാകാറില്ല.

എങ്കിലും, ആകർഷകമായ കൂലി ലഭിക്കുന്നതിനാൽ പനങ്കുല വെട്ടിയെടുക്കുന്നത് മാത്രമായി ഉപജീവനമാർഗം കണ്ടെത്തിയവരും ഗ്രാമപ്രദേശങ്ങളിലുണ്ട്. പനങ്കുരു ശാസ്ത്രീയമായി സംസ്കരിച്ചെടുത്താൽ ഒരു പനയിൽ നിന്ന് മാത്രം കർഷകർക്ക് 2,000 രൂപ മുതൽ 5,000 രൂപ വരെ ആദായം നേടാൻ സാധിക്കും.

ഉത്തരേന്ത്യൻ സംസ്ഥാനങ്ങളിൽ പനങ്കുരുവിന് ആവശ്യക്കാർ ഏറിയതാണ് വയനാടൻ ഗ്രാമങ്ങളിലെ കർഷകർക്ക് പുതിയൊരു വരുമാന മാർഗം തുറന്നു നൽകിയത്. മുൻപ് ഉപയോഗശൂന്യമായി പാഴായിപ്പോയിരുന്ന പനങ്കുരു ശേഖരിക്കാൻ ഇപ്പോൾ ഇടനിലക്കാരുൾപ്പെടെയുള്ളവർ പനകളുള്ള കൃഷിയിടങ്ങൾ തേടി എത്തുന്നുണ്ട്.

വിവിധ തരത്തിലുള്ള പശകൾ, പെയിന്റുകൾ എന്നിവയുടെ നിർമാണത്തിനും, ഉത്തരേന്ത്യയിൽ സുഗന്ധമുറുക്ക്, പാൻമസാല ഉൽപ്പന്നങ്ങൾ എന്നിവയിലെ പ്രധാന ചേരുവയായും പനങ്കുരു വൻതോതിൽ ഉപയോഗിക്കുന്നുണ്ട്. ജില്ലയിൽ കൂടുതൽ വിപണന സൗകര്യങ്ങളും ആധുനിക സംസ്കരണ കേന്ദ്രങ്ങളും സ്ഥാപിക്കുകയാണെങ്കിൽ പനങ്കുരു കർഷകർക്കും ശേഖരിക്കുന്ന തൊഴിലാളികൾക്കും ഇതൊരു സ്ഥിരമായ മികച്ച വരുമാന മാർഗമായി മാറുമെന്ന് ഈ മേഖലയിൽ പ്രവർത്തിക്കുന്നവർ വ്യക്തമാക്കുന്നു.